ELM VƏ TƏHSİL
Birinci sinfə şagird qəbuluna başlanılır
Bakı, 21 fevral, AZƏRTAC
Fevralın 21-də Təhsil Nazirliyində birinci sinfə şagird qəbulunun elektron sistem vasitəsilə təşkilinə həsr olunmuş mətbuat konfransı keçirilib.
AZƏRTAC xəbər verir ki, tədbirdə Təhsil Nazirliyinin ictimaiyyətlə əlaqələr sektorunun müdiri Cəsarət Valehov 2018-2019-cu dərs ilində birinci sinfə şagird qəbulu ilə bağlı məlumat verib. Qeyd edilib ki, Bakı ilə yanaşı, Gəncə, Sumqayıt şəhərləri və Abşeron rayonu üzrə ümumtəhsil məktəblərində birinci sinfə şagird qəbulu elektron sistem vasitəsilə həyata keçiriləcək. Bu prosesə fevralın 22-dən Gəncə və Sumqayıt şəhərlərində, martın 12-dən isə Abşeron rayonunda başlanılacaq. Təhsil Nazirliyinin birbaşa tabeliyindəki lisey və gimnaziyalara, eləcə də Bakı, Gəncə, Sumqayıt şəhərləri və Abşeron rayonu üzrə ümumtəhsil müəssisələrinə birinci sinfə şagird qəbulu valideynin (qanuni nümayəndənin) elektron ərizəsinin mektebeqebul.edu.az saytında qeydiyyatı yolu ilə həyata keçiriləcək. Sentyabrın 15-dək davam edəcək elektron ərizənin qeydiyyatı prosesində valideynlər məktəbi, təlim dilini və müəllimi seçməlidirlər. Hər hansı səbəbdən özü elektron qeydiyyatdan keçə bilməyən şəxslər Bakı şəhəri üzrə 52, Gəncə şəhəri üzrə beş, Sumqayıt şəhəri üzrə dörd, Abşeron rayonu üzrə altı məktəbdə yaradılmış alternativ qeydiyyat mərkəzlərinə müraciət edə bilərlər. Valideynlərlə qeydiyyat və sənəd qəbulu üzrə yarana biləcək mübahisəli məsələlərin həlli məqsədilə Bakı şəhəri üzrə altı, Gəncə və Sumqayıt şəhərləri və Abşeron rayonu üzrə bir ümumtəhsil müəssisəsində apellyasiya komissiyaları təşkil olunub.
Bakı Şəhəri üzrə Təhsil İdarəsinin informasiya təminatı sektorunun müdiri İlhamə Abdullayeva tətbiq olunan yeniliklər barədə danışıb. Bildirilib ki, ümumtəhsil müəssisələrinin birinci sinfinə sentyabrın 15-dək altı yaşı tamam olan uşaqlar qəbul edilirlər. Eləcə də Təhsil Nazirliyi tərəfindən müəyyənləşdirilmiş qaydada xüsusi istedadlı uşaqların vaxtından əvvəl birinci sinfə qəbulu üzrə müsahibədən uğurla keçmiş, 2012-ci il sentyabrın 16-dan dekabrın 31-dək olan dövrdə doğulmuş və dövlət ümumtəhsil müəssisələrində ödənişsiz məktəbəhazırlıq qrupunu bitirmiş uşaqlar da qəbul edilirlər.
Qeyd olunub ki, nazirliyin birbaşa tabeliyindəki ümumtəhsil müəssisələrində və Bakı Şəhəri üzrə Təhsil İdarəsinin tabeliyində fəaliyyət göstərən 287 nömrəli “Zəkalar” liseyi, eləcə də 160 nömrəli Klassik Gimnaziyada 2018-2019-cu dərs ili üçün birinci sinfə, ilk növbədə, həmin ümumi təhsil müəssisələrinin müəyyənləşdirilmiş mikroərazisində yaşayan vətəndaşların ərizələrinin qeydiyyatı aparılır. Digər ərazilərdə yaşayan valideynlərin uşaqları qeyd olunan ümumtəhsil müəssisələrinə yalnız müsabiqə yolu ilə qəbul üçün qeydiyyatdan keçə bilərlər.
Məktəbəhazırlıq qruplarında təhsil alan uşaqların valideynlərinin istəyini nəzərə alaraq, onların birinci sinifdə də eyni sinifdə komplektləşdirilməsi və eyni müəllimə həvalə olunması nəzərdə tutulur. Bu qayda 2017-2018-ci tədris ilində məktəbəhazırlıq qruplarında dərs deyən, 2018-2019-cu tədris ilində birinci sinifdə tədris aparması planlaşdırılan müəllimlərin dərs dediyi siniflərə şamil olunur.
Vətəndaşları maraqlandıran məsələlərə daha geniş aydınlıq gətirmək üçün BŞTİ-nin rəsmi “Facebook” səhifəsində fevralın 22-dən martın 2-dək birinci sinfə qəbulla bağlı suallara cavab veriləcək.
Konfransda 2018-2019-cu tədris ilində elektron sistem vasitəsilə uşaqların birinci sinfə qəbulu barədə videoçarx nümayiş etdirilib.