İDMAN
Cavad Ağayev: Məqsədim gələn il keçiriləcək Yay Olimpiya Oyunlarında çempion olmaqdır
Ümid edirəm ki, Meksikada dünya çempionatındakı bürünc medalı Bakıdakı mundialda qızıla çevirəcəyəm
Bakı, 25 yanvar, Məmməd İsayev, AZƏRTAC
Ötən ilin avqust ayında Türkiyənin Konya şəhərində V İslam Həmrəyliyi Oyunları keçirildi. Bu oyunların yalnız final döyüşündə Olimpiya çempionu, özbəkistanlı rəqibimə məğlub olaraq ikinci yeri tutdum. Kişilərin yarışında məndən başqa Həşim Məhəmmədov (58 kq) həmin turnirdə bürünc medala yiyələndi. Albaniyada sentyabrda təşkil olunmuş 21 yaşlılar arasında Avropa çempionatında ikinci yerə layiq görüldüm. Noyabrda Meksikanın Qvadalaxara şəhərindəki taekvondo üzrə böyüklər arasında dünya çempionatında isə Azərbaycan milli komandasının heyətində yer alaraq fəxri kürsünün üçüncü pilləsində qərarlaşdım.
Bunu AZƏRTAC-a açıqlamasında taekvondo üzrə dünya, Avropa çempionatının və İslam Oyunlarının mükafatçısı Cavad Ağayev (68 kq) ötən il keçirilmiş yarışlarda qazandığı nailiyyətlər barədə danışarkən söyləyib.
Taekvondoçumuz bildirib ki, 2022-ci il onun üçün çox uğurlu keçib. Doğrudur, o bəzi yarışlarda qızıl medal qazanacağını gözləyirmiş. Lakin ayağındakı zədə səbəbindən həmin turnirlərə tam hazırlaşa bilmədiyi üçün Qran-Pri yarışlarda da istədiyi nəticəni əldə edə bilməyib. İdmançı ümid edir ki, Meksikadakı qazandığı bürünc medalı Bakıda qızıla çevirəcək.
Ötən il dünya çempionatında bürünc, U-21-in Avropa çempionatında və İslam Həmrəyliyi Oyunlarında gümüş mükafatı yığmamızın aktivinə yazdıran 20 yaşlı taekvondoçu növbəti yarışlarda da yüksək nailiyyətlər əldə etməyə çalışacağını vurğulayıb.
Altmış səkkiz kiloqram çəki dərəcəsində dayanq üzərinə çıxan idmançımızın sözlərinə görə, daha da yaxşı hazırlaşıb bu ilin mayında Azərbaycanın ev sahibliyi edəcəyi dünya çempionatında qızıl medal qazanmaq arzusundadır: “2023-cü ilin ötən ildən də daha uğurlu olacağına inanıram. Bizi qarşıda böyük yarışlar gözləyir. Əsas məqsəd doğma Vətənimizdə keçiriləcək dünya çempionatında inamlı çıxış etməkdir. Mənə olan ümidləri doğrultmağa çalışacağam. Hər bir idmançının məqsədi çempion olmaqdır. Mən də dünya çempionu olmaq istəyirəm. Keçən il mundiala qızıl medal qazanmaq məqsədilə qatıldım. Lakin təəssüf ki, üçüncü yerlə kifayətləndim. Bu il ölkəmizdə keçiriləcək mötəbər yarışda komanda yoldaşlarımla birgə bütün gücümüzü ortaya qoymaya çalışacağıq. Hədəfimiz yalnız qızıl medal qazanmaqdır”.
Cavad Ağayev əlavə edib ki, hər bir idmançı kimi, o da “Paris-2024” Yay Olimpiya Oyunlarında çempion olmağı qarşısına məqsəd qoyub: “Beynəlxalq yarışlarda uğur qazanmaqla həmin hədəfə doğru inamla irəliləyirəm. Paytaxtımızda keçiriləcək mundiala hazırlığı isə artıq indidən başlamışıq. Artıq yığmanın digər taekvondoçuları ilə birgə kişilərdən ibarət milli komandanın baş məşqçisi Reza Mehmandost və böyük məşqçi Elnur Amanovun rəhbərliyi ilə təlim-məşq toplanışlarında iştirak edirik”.
Taekvondo üzrə Olimpiya reytinqində ilk onluqda, dünya reytinqində isə 14-cü yerdə qərarlaşdığını vurğulayan idmançı deyib: “Olimpiya reytinqində ilk altılığa daxil olan idmançılar Olimpiya Oyunlarına birbaşa vəsiqə qazanır, odur ki, lisenziya qazanmağa ehtiyac qalmır. Qarşıdakı beynəlxalq yarışlarda yaxşı nəticə əldə etməklə ilk altılıqda yer almaq istəyirəm”.
Dünya çempionumuz, həmçinin qeyd edib ki, fevralda Türkiyənin İstanbul şəhərində “President Cup” və “Türkish Open” turnirləri baş tutacaq. Bundan başqa, mundialın ardınca iyunda Polşada təşkil olunacaq Avropa Oyunlarında iştirak etməyi planlaşdırırıq. Həmin yarışda da üçrəngli bayrağımızı yüksəklərdə dalğalandırmaq üçün mübarizə aparacağam”.
Xatırladaq ki, bu il yanvarın 9-da 2022-ci ilin idman yekunlarına həsr olunan mərasim keçirilib. Dövlətimizin başçısı, Milli Olimpiya Komitəsinin Prezidenti İlham Əliyevin iştirak etdiyi tədbirdə idmanın inkişafında xidmətləri olan idmançılara və idman mütəxəssislərinə mükafatlar təqdim olunub. Onların arasında yığmamızın taekvondoçusu Cavad Ağayev də yer alıb. Beynəlxalq yarışların mükafatçısına mənzil hədiyyə edilib. Taekvondoçumuz ona Prezident tərəfindən hədiyyə olunan mənzilin həyatında ən dəyərli hədiyyə olduğunu bildirərək deyib: “Prezident İlham Əliyev həmişə idmanı və idmançıları diqqətdə saxlayır. Bizim yarışlarda uğur qazanmağımız da məhz dövlətin bizə diqqət və qayğısının təzahürüdür. Buna görə dövlətimizin başçısına dərin minnətdarlığımı çatdırıram”.