Astara, 12 dekabr, Bağır Əliyev, AZƏRTAC

Azərbaycan xalqının ümummilli lideri, dünya şöhrətli siyasətçi Heydər Əliyevin əbədiyyətə qovuşmasından 15 il keçsə də, onun ideyaları və əməlləri daim yaşayır. Heydər Əliyev həyatını doğma xalqının azadlığına, müstəqilliyinə və milli tərəqqisinə həsr etməklə hər bir azərbaycanlının qəlbində özünə möhtəşəm abidə ucaldıb, xalqın Ümummilli Liderinə çevrilib.

AZƏRTAC-ın bölgə müxbiri xəbər verir ki, ulu öndər Heydər Əliyevin anım günü ilə əlaqədar Astara rayonunun bütün yaşayış məntəqələrində, ərazi icra nümayəndəliklərində və bələdiyyələrdə, təhsil, səhiyyə və mədəniyyət müəssisələrində, idarə və təşkilatlarda tədbirlər, mərasimlər keçirilib.

Astara Pedaqoji Kollecində və rayonun bütün ümumtəhsil məktəblərində dərs məşğələlərinin ilk saatları Ulu Öndərin anım gününə həsr edilib.

Ümummilli lider Heydər Əliyev dəfələrlə Astaraya səfər edib, ölkəmizin bu dilbər guşəsi, onun zəhmətsevər insanları haqqında gözəl, səmimi və xoş sözlər söyləyib. Onun söylədiyi “Astara Azərbaycanın cənubunda dövlətçiliyin sütunlarından biridir, astaralılar bu sütunun etibarlı keşikçiləridir, dövlətçiliyə sədaqətlidirlər” sözləri hər bir rayon sakininin qəlbində sonsuz qürur və fərəh hisləri yaradıb.

Dekabrın 12-də rayonun minlərlə sakini şəhərin mərkəzi meydanına - Heydər Əliyev Parkına gələrək Ulu Öndərin abidəsini ziyarət ediblər.

Astara Rayon İcra Hakimiyyətinin başçısı Qəzənfər Ağayev, Yeni Azərbaycan Partiyası Astara rayon təşkilatının idarə heyətinin üzvləri, ağsaqqallar, gənclər, tələbələr, məktəblilər, idarə, müəssisə və təşkilatların, ictimaiyyətin nümayəndələri Ulu Öndərin abidəsi önünə əklil və gül dəstələri düzərək xatirəsini ehtiramla anıblar.

Rayon Ağsaqqallar Şurasının sədri, təqaüddə olan dövlət qulluqçusu Hamlet Əliyev xalqımızın Ümummilli Lideri ilə bağlı xoş xatirələri yada salaraq deyib: “Artıq 15-ci ildir ki, Heydər Əliyevin anım gününü dərin kədər və hüznlə qeyd edirik. Ulu Öndərin Astaraya hər səfəri yaddaşımda əbədi izlər qoyub. Böyük rəhbərimiz Astaraya gələndə təsərrüfatlara baş çəkər, qayğılarımızla maraqlanar, tövsiyə və tapşırıqlarını verərdi. Biz bu tövsiyə və tapşırıqları canla-başla yerinə yetirərdik. Bu gün Ümummilli Liderimiz cismən aramızda olmasa da, o, hər bir azərbaycanlının qəlbində yaşayır. Heydər Əliyevin ideyaları yaşayır və qalib gəlir”.

Mərasim iştirakçıları Heydər Əliyev Mərkəzinə gələrək, böyük rəhbərin büstü önünə gül dəstələri düzüb, burada nümayiş etdirilən tarixi sənədlər və arxiv materiallarına, Ulu Öndərin ömür yolundan bəhs edən fotolara və sənədli filmlərə baxıb, rəy kitabına ürək sözlərini yazıblar.

X X X

Dekabrın 12-si Azərbaycanın hər yerində olduğu kimi, Lənkəranda da Ulu Öndərin anım günü ümumxalq sevgisinin nümayişinə çevrilib.

Heydər Əliyevin Lənkəranın sosial-iqtisadi inkişafı ilə bağlı əvəzsiz xidmətləri var. O, Azərbaycana rəhbərlik etdiyi illərdə dəfələrlə Lənkəranda səfərdə olub, sakinlərlə görüşərək onları narahat edən problemləri dinləyib və həlli ilə bağlı tapşırıqlarını verib, yeni infrastrukturun yaradılmasını, yaşayış massivlərinin salınmasını, təhsil, səhiyyə, mədəniyyət ocaqlarının, emal müəssisələrinin tikilməsini birbaşa diqqətində saxlayıb. Bu gün hər bir lənkəranlı qürur hissi keçirir ki, onlar bu diqqət və qayğını Ulu Öndərin layiqli davamçısı Prezident İlham Əliyevdən görürlər. Lənkəran şəhərinin sosial-iqtisadi inkişafının sürətləndirilməsi ilə bağlı Azərbaycan Prezidentinin imzaladığı sərəncamları lənkəranlılar sonsuz sevinc və minnətdarlıq hissi ilə qarşılayırlar.

Lənkəran Şəhər İcra Hakimiyyətinin başçısı Taleh Qaraşov, ağsaqqallar, ziyalılar, din xadimləri, təhsil, səhiyyə, mədəniyyət işçiləri, əmək kollektivlərinin üzvləri, gənclər, tələbələr, idmançılar, rayonun hüquq-mühafizə orqanlarının nümayəndələri həzin musiqi sədaları altında Ulu Öndərin abidəsi önünə gül dəstələri düzərək, böyük rəhbərin xatirəsini ehtiramla yad ediblər.

Ulu Öndərin vəfatının 15 illiyi ilə bağlı rayonun idarə və təşkilatlarında, Lənkəran Dövlət Universitetində, Lənkəran Humanitar və Tibb kolleclərində, ümumtəhsil məktəblərində, mədəni-maarif müəssisələrində silsilə tədbirlər keçirilib.

X X X

Dekabrın 12-də Cəlilabadda Ulu Öndərin xatirəsi böyük məhəbbətlə anılıb.

Ulu öndər Heydər Əliyevin anım günü ilə əlaqədar Cəlilabad rayonunun bütün yaşayış məntəqələrində, ərazi icra nümayəndəliklərində və bələdiyyələrdə, təhsil, səhiyyə və mədəniyyət müəssisələrində, idarə və təşkilatlarda tədbirlər, mərasimlər keçirilib.

Azərbaycan Dövlət Pedaqoji Universitetinin Cəlilabad filialında və rayonun bütün ümumtəhsil məktəblərində dərs məşğələlərinin ilk saatları Ulu Öndərin anım gününə həsr edilib.

Dekabrın 12-də rayonun minlərlə sakini şəhərin mərkəzi meydanına - Heydər Əliyev Parkına gələrək Ulu Öndərin abidəsini ziyarət ediblər.

Cəlilabad Rayon İcra Hakimiyyətinin başçısı Namiq Zeynalov, hüquq-mühafizə orqanlarının rəhbərləri, Yeni Azərbaycan Partiyası Cəlilabad rayon təşkilatının idarə heyətinin üzvləri, ağsaqqallar, gənclər, tələbələr, məktəblilər, idarə, müəssisə və təşkilatların, ictimaiyyətin nümayəndələri Ulu Öndərin abidəsi önünə əklil və gül dəstələri düzərək, dahi rəhbərin xatirəsini ehtiramla anıblar.

Rayon icra hakimiyyətinin başçısı N.Zeynalov Göytəpə şəhərindəki Heydər Əliyev adına park-bulvarda və Heydər Əliyev adına Alar kənd 1 saylı tam orta məktəbin həyətində Ümummilli Liderin abidəsini ziyarət edib.

Anım günü rayonun yaşayış məntəqələrində Ulu Öndərin xatirəsinə ehsanlar verilib, ruhuna dualar oxunub.

X X X

Dekabrın 12-də ümummilli lider Heydər Əliyevin anım günü ilə əlaqədar səhər saatlarından başlayaraq Masallı şəhərindəki Heydər Əliyev Parkında minlərlə rayon sakini böyük rəhbərin abidəsini ziyarət edib.

Masallı Rayon İcra Hakimiyyətinin başçısı Rafil Hüseynov, idarə, müəssisə və təşkilatda çalışanlar, ağsaqqallar, müharibə veteranları, gənclər, məktəblilər və ictimaiyyət nümayəndələri Ulu Öndərin abidəsi önünə gül dəstələri düzərək xatirəsini ehtiramla anıblar.

Mərasim iştirakçıları Heydər Əliyev Mərkəzində böyük rəhbərin zəngin və mənalı ömür yolunu əks etdirən eksponatlar və fotoşəkillərlə tanış olub, sənədli filmə baxıblar.

Anım tədbiri Masallı şəhərindəki Heydər Əliyev Mərkəzində ulu öndər Heydər Əliyevin vəfatının 15-ci ildönümü ilə əlaqədar elmi-praktik konfransla davam etdirilib.

Tədbir iştirakçıları əvvəlcə Ümummilli Liderin xatirəsini bir dəqiqəlik sükutla yad edib, Ulu Öndərin həyat və fəaliyyətindən bəhs edən videoçarxa baxıblar.

Konfransda çıxış edən Yeni Azərbaycan Partiyası Masallı rayon təşkilatının sədri Seyfəddin Əliyev qeyd edib ki, ulu öndər Heydər Əliyev Azərbaycanın XX əsr tarixində dünyaya bəxş etdiyi əvəzolunmaz lider, böyük azərbaycanlı idi.

Diqqətə çatdırılıb ki, Ümummilli Liderin zəngin irsinə söykənən Prezident İlham Əliyev tərəfindən uğurla həyata keçirilən inkişaf strategiyasının təhlili onun üç fundamental prinsipə əməl etdiyini söyləməyə əsas verir. Bunlar güclü dövlət, səmərəli iqtisadiyyat və azad insandır. Böyük rəhbərin müasir, hüquqi və dünyəvi dövlət quruculuğu sahəsindəki siyasəti Azərbaycan Respublikasının Prezidenti İlham Əliyevin rəhbərliyi ilə uğurla davam etdirilir. Ölkəmiz dünyanın ən sürətlə inkişaf edən, yeniləşən, müasirləşən demokratik dövlətinə çevrilib.

Heydər Əliyev Mərkəzinin direktoru Dilbər İbayeva, rayon Ağsaqqallar Şurasının sədri Ələşrəf Niftiyev çıxışlarında qeyd ediblər ki, ölkənin ən ağır vəziyyətində xalqın tələbi ilə siyasi hakimiyyətə qayıdan Heydər Əliyev dövlətimizi məhv olmaq təhlükəsindən xilas etdi, Azərbaycanı inkişaf yoluna çıxardı.

X X X

Dekabrın 12-də Lerik şəhərindəki Heydər Əliyev Meydanında Azərbaycan xalqının ümummilli lideri, ulu öndər Heydər Əliyevin vəfatının 15-ci ildönümü münasibətilə anım mərasimi keçirilib.

Lerik Rayon İcra Hakimiyyətinin başçısı Rövşən Bağırov, hüquq-mühafizə orqanlarının rəhbərləri, idarə, müəssisə və təşkilatlarda çalışanlar, ictimaiyyət təmsilçiləri Ümummilli Liderin abidəsini ziyarət edərək, xatirəsini ehtiramla anıblar.

Anım mərasimi Lerik şəhərindəki Heydər Əliyev Mərkəzində Ümummilli Liderin həyat və fəaliyyətinə həsr olunmuş elmi-praktik konfransla davam etdirilib.

Konfrans iştirakçıları Ümummilli Liderin həyat və fəaliyyətini əks etdirən eksponatlarla tanış olub, Ulu Öndərin ömür yolunu əks etdirən “Dastana sığmayan ömür” adlı sənədli filmə baxıblar.

Sonra Lerik Rayon İcra Hakimiyyətinin başçısı Rövşən Bağırovun “Heydər Əliyev və Azərbaycan dövlətçiliyi” mövzusunda məruzəsi dinlənilib.

Qeyd edilib ki, 1993-cü ildə Heydər Əliyevin hakimiyyətə qayıdışından sonra Azərbaycan xalqında ruh yüksəkliyi yarandı, gələcəyə inam oyandı. Ölkəmiz təcrid vəziyyətindən çıxdı, dünya birliyinin üzvü oldu, mötəbər beynəlxalq təşkilatlara qəbul edildi. Müstəqilliyin və dövlətçiliyin möhkəmləndirilməsi, siyasi, iqtisadi və hüquqi sahədə islahatlara başlanıldı, ölkə quruculuq, demokratik cəmiyyət və hüquqi dövlət yaradılması yoluna qədəm qoydu.

Bildirilib ki, Azərbaycançılıq məfkurəsini dövlətçilik ideologiyasına çevirən Ulu Öndərin əbədiyyətə qovuşmasından 15 il ötsə də, onun ideyaları Prezident İlham Əliyev tərəfindən uğurla həyata keçirilir. Dünyada müharibələrin və iqtisadi böhranın davam etdiyi bir vaxtda Azərbaycanda sabitlik hökm sürür, dövlətimiz gündən-günə inkişaf edir.

Konfransda Yeni Azərbaycan Partiyası Lerik rayon təşkilatının aparat rəhbəri Elxan Qənbərov “Heydər Əliyev və Yeni Azərbaycan Partiyası”, Lerik Rayon Məhkəməsinin sədri Atabəy Kiçibəyov “Ulu Öndərin hüquqi dövlət quruculuğu sahəsində gördüyü işlər”, Lerik “Uzunömürlülər” muzeyinin direktoru Dilara Fətullayeva “Ölkəmizdə dövlət qadın siyasətinin banisi”, Lerik Rayon Gənclər və İdman İdarəsinin rəisi Natiq İsaqov “Qloballaşma şəraitində gənclərin milli ruhda tərbiyəsində Ulu Öndərin rolu” mövzularında çıxış ediblər.

Həmin gün Lerik şəhərində rayon icra hakimiyyəti tərəfindən ulu öndər Heydər Əliyevin anım günü ilə əlaqədar ehsan süfrəsi açılıb.

X X X

Dekabrın 12-də Yardımlı şəhərindəki Heydər Əliyev Parkında ümummilli lider Heydər Əliyevin vəfatının 15-ci ildönümünə həsr olunmuş ümumrayon anım mərasimi keçirilib.

Rayon icra hakimiyyətinin başçısı Ayaz Əsgərov, hüquq-mühafizə orqanlarının, idarə, müəssisə və təşkilatların rəhbərləri, ziyalılar, İkinci Dünya və Qarabağ müharibəsi veteranları və ictimaiyyət nümayəndələri ulu öndər Heydər Əliyevin abidəsi önünə gül dəstələri düzərək xatirəsini ehtiramla yad ediblər.

Anım mərasimində böyük rəhbərin ruhuna dualar oxunub, şəhərdəki mərasim zalında ehsan süfrəsi açılıb.