REGİONLAR


Daxili bazardakı qiymətlər cəlilabadlı üzümçüləri qane etmir - məhsulu xarici bazarlara çıxarmağa üstünlük verirlər FOTO VİDEO

Cəlilabad, 6 sentyabr, İsmayıl Cəfərli, AZƏRTAC

Cəlilabadın üzüm bağlarında yığım davam edir. Mövsüm başlayandan bu günədək toplanan 7 min tondan çox məhsulun 300 tona yaxını xarici bazarlara ixrac olunub. Bağ sahibləri daxili bazarda qiymətin ucuz olmasından narazıdırlar.

AZƏRTAC xəbər verir ki, Cəlilabadın üzüm bağlarında məhsul bu il də boldur. Artıq bir aydır ki, bağ sahibləri məhsul yığımına başlayıblar. “Həməşərə”, “Bayanşirə”, “Mədrəsə”, “Ağşanı”, “Qaraşanı” və digər adı dillər əzbəri olan üzüm sortları ilə tanınan Cəlilabadda, hazırda xarici ölkələrdən gətirilən 9 sort məhsuldar üzüm növü də becərilir.

Üzümçülük və Şərabçılıq Elmi-Tədqiqat İnstitutunun Cəlilabad dayaq məntəqəsinin müdiri Azad Əkbərovla söhbət zamanı bildirib ki, fermerlər bağlara yaxşı qulluq ediblər, lazımi aqro-texniki qulluq tədbirləri vaxtında aparılıb. Ona görə də yaxşı məhsul var: “Cəlilabad rayonunda bu il məhsuldarlıq çox yüksəkdir. Keçən il 15-17 ton məhsul yığılmışdısa, bu il 18-20 ton məhsul gözlənilir”.

Ötən aydan yığıma başlayan fermer Əliheydər Salmanov isə minbir zəhmətlə ərsəyə gətirdiyi məhsulun son iki ildə ucuz satılmasına görə narahatdır. “Məhsuldarlıq yüksəkdir, dövlət tərəfindən lazımi dəstəyi və köməyi alırıq. Amma bir problemimiz var, o da məhsulun qiymətidir. On il bundan əvvəl 1 manata satdığımız məhsulu bu gün 30-50 qəpiyə satmaq məcburiyyətindəyik”.

Hazırda tədarük olunan məhsul elə bağda işçilər tərəfindən çeşidlənərək yerli və xarici bazar üçün qablaşdırılır. İxraca əsasən “Artika”, “Sultaniyyə”, “Prima” kimi Fransız üzüm sortları göndərilir.

Söhbət etdiyimiz digər fermer Mirhəbib Salmanlının 15 hektara yaxın üzüm bağı var. Bu bağda 9 sort üzüm yetişdirib. Hələlik 4 sort üzümün yığımı aparılır. “Yığdığımız “Sultaniyə”, “Sentenial”, “Arktika” və “Ora” sortlarıdır. Bunların tingləri Fransadan gətirilib. Yaxın günlərdə o biri sortları da yığmağa başlayacağıq. Keçən ilə nisbətən məhsuldarlıq yaxşıdır. Satış məsələsində problemlərimiz var. Belə ki, daxili bazarda qiymətlər ucuzdur. Ona görə də, hələ ki, xaricə ixrac etməyə üstünlük veririk”.

Qeyd edək ki, rayon üzrə 1475 hektar üzüm bağları var, bunun da 1400 hektarı bar verir. Orta məhsuldarlıq hələlik 120 sentnerdən çoxdur. Məhsulun 300 tondan çoxu Rusiya bazarlarına ixrac olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.