Gəncə, 7 sentyabr, Elcan Məmmədov, AZƏRTAC

Dekorativ tətbiqi sənət özündə bədii sənətin müxtəlif növlərini birləşdirir. Bunlar arasında xalq sənət növlərindən bədii tikmə, bədii şüşə, xarici sənət növlərindən isə dekupaj, kvillinq, ebru kimi sənətlər var.

AZƏRTAC-ın bölgə müxbiri Gəncədə fəaliyyət göstərən dekorativ tətbiqi sənət ustası Sona Məhərrəmovanın emalatxanasına baş çəkib, onun əl işləri ilə yaxından tanış olub.

Sona Məhərrəmova 2013-cü ildən dekorativ tətbiqi sənət müəlliməsi vəzifəsində işləyir. 25-dən çox yerli və xarici sərginin iştirakçısıdır. 2013-cü ildə Azərbaycan Respublikasının Prezidenti yanında Gənclər fondunun elan etdiyi 4-cü qrant müsabiqəsinin “Nağıllar aləmi” adlı layihəsinin qalibi, 2016-cı ildə Azərbaycan Respublikasının Prezidenti yanında Gənclər Fondunun elan etdiyi 8-ci qrant müsabiqəsinin “Al-əlvan Qarabağ” müsabiqəsinin birincisi seçilib.

Gəncə Gənclər Evinin metodisti vəzifəsində çalışan Sona Məhərrəmova 4 fərdi sərginin müəllifi, bir çox yerli və xarici sərgilərin iştirakçısıdır. Deyir ki, əl işlərinə daha çox turistlər maraq göstərirlər. “Düzəltdiyim əl işləri daha çox ölkəmizin qonaqlarının diqqətini cəlb edir. Xüsusilə də şüşə üzərindəki əl işləri, yəni bədii şüşə sənəti onlarda böyük maraq oyadır. Azərbaycanın zəngin çay mədəniyyətinin simvolu olan armudu stəkanlar üzərində milli atributlarımızı əks etdirən əl işlərim çoxdur, onları satmaqla kiçik biznes qurmuşam. Daha çox satış elə bu əsərlərdən olur. Kağızların və kətanın üzərində bir müddət sonra rənglərin solduğu, çatladığı üçün şüşə üzərində olan əsərlərə tələbat daha çoxdur. Çünki şüşə üzərində boyalar maye halında olduğu üçün heç vaxt rənglər solmur və quruduqda şüşə effekti verir,” - deyə Sona Məhərrəmova qeyd edib.

Onun sözlərinə görə, ərsəyə gələn əl işlərinin qiymətləri də alıcıları qane edir. Armudu stəkanlarda hazırlanan əl işləri naxışlarına görə 15-50 manat, bədii tikmə sənətində hazırlanan portretlər isə dizayn və formasına görə 100-400 manat arasında dəyişir.

On ildən çoxdur bədii sənət növləri ilə məşğul olan Sona Məhərrəmova deyir ki, çoxəsrlik tarixi olan bu sənət duyğuların, düşüncələrin sənətidir. “Məndə yaradıcılığa maraq irsən keçib. Atam oymaçı-rəssam, qardaşım isə rəssamdır. Bu işdə çalışmağıma və incəsənəti dərindən sevməyimə səbəb olan da məhz qardaşımdır. İndiyədək 500 şagirdim olub, onlardan çoxu ali məktəblərdə tələbə adını qazanıb. Gənclərdə qədim xalq sənət növlərinə marağın bu cür yüksək olması məni sevindirir,” - deyə dekorativ tətbiqi sənət ustası bildirib.