Bakı, 23 oktyabr, AZƏRTAC

Nəqliyyat, Rabitə və Yüksək Texnologiyalar Nazirliyi yanında Dövlət Dəniz Agentliyində “Türk Loydu Uyğunluq Qiymətləndirmə Xidmətləri” təsnifat cəmiyyətinin idarə heyətinin sədri və digər rəhbər şəxsləri ilə görüş keçirilib.

Dövlət Dəniz Agentliyinin mətbuat xidmətindən AZƏRTAC-a bildirilib ki, Azərbaycanla Türkiyə arasında dəniz nəqliyyatı sahəsində əməkdaşlığın yüksək səviyyədə olduğunu vurğulayan Dövlət Dəniz Agentliyinin direktoru Qüdrət Qurbanov Azərbaycan Respublikasının Prezidenti İlham Əliyevin diqqət və qayğısı nəticəsində dəniz nəqliyyatı sahəsində əldə olunan uğurlardan danışıb. Q.Qurbanov donanmanın yenilənməsi istiqamətində görülən işlər, respublikamızın nəqliyyat dəhlizlərinin inkişafına verdiyi töhfə, qazanılan nailiyyətlərdən söz açıb.

Tarixi inkişaf yolu keçən dəniz nəqliyyatı bütün zamanlarda öz əhəmiyyətliyini saxlayıb deyən Q.Qurbanovun sözlərinə görə, Azərbaycan 1995-ci ilin may ayında BMT-nin nüfuzlu orqanı olan Beynəlxalq Dəniz Təşkilatına tam səlahiyyətli üzv qəbul olunub. Ölkəmiz Beynəlxalq Dəniz Təşkilatına üzv olduğu tarixdən etibarən dəniz nəqliyyatı sahəsində 20-dən çox beynəlxalq konvensiya və protokola qoşulub.

Dəniz nəqliyyatı sahəsi üzrə beynəlxalq konvensiyaların tələblərindən irəli gələn öhdəliklərin icra vəziyyətinin qiymətləndirilməsi məqsədilə Beynəlxalq Dəniz Təşkilatının Audit Ekspert Qrupunun 2017-ci il mayın 28-dən iyunun 6-dək keçirdiyi audit yoxlaması barədə danışan Q.Qurbanov vurğulayıb ki, yoxlamanın nəticələrinə əsasən Azərbaycan 174 dünya dəniz dövləti sırasında ən qabaqcıl Avropa dövlətlərini geridə qoyaraq, statistika üzrə ön sırada yer tutub.

Görüşdə, eyni zamanda, “Türk Loydu” təsnifat cəmiyyətinin ölkəmizdə fəaliyyətinin genişləndirilməsi üçün münbit şəraitin olduğu, ölkəmizdə ticarət gəmiçiliyi sahəsinin getdikcə inkişaf etdiyi, bu şəraitdən istifadə edərək gəmilərə texniki nəzarət sahəsində məqsədyönlü tədbirlərin həyata keçirilməsinin zəruriliyi qeyd edilib. Azərbaycan dənizçilərinin təcrübəsi və fəaliyyətindən söz açılıb, istər Azərbaycan, istərsə də xarici bayraq altında üzən gəmilərdə təcrübəli azərbaycanlı dənizçilərin olduğu diqqətə çatdırılıb.

2014-cü il sentyabrın 15-19-da, 2018-ci il avqustun 6-10-da Dövlət Dəniz Agentliyinin əməkdaşları tərəfindən “Türk Loydu” təsnifat cəmiyyətində həyata keçirilən yoxlamalardan söz açılaraq bildirilib ki, bu yoxlamalar Azərbaycan Respublikasının dəniz nəqliyyatı sahəsində yerli qanunvericiliyinin, eyni zamanda, Beynəlxalq Dəniz Təşkilatının (BDT) “Tanınmış Təşkilatlar haqqında Məcəllə”sinin (RO Code), MSC.349(92), A.739(18) və A.789(19) nömrəli Qətnamələrinin tələblərinə uyğun olaraq həyata keçirilib. Görüşdə bir sıra maraq doğuran məsələlər ətrafında fikir mübadiləsi aparılıb.

Daha sonra qonaqlar Xəzəryanı ölkələrdə ilk dəfə olaraq Azərbaycanda yaradılan, ən son naviqasiya və müşahidə avadanlıqları ilə təchiz edilən Milli Mərkəzlə tanış olub.

Qonaqların diqqətinə çatdırılıb ki, “Dənizdə insan həyatının mühafizəsinə dair Beynəlxalq Konvensiya”nın (SOLAS) tələblərinin yerinə yetirilməsi məqsədilə yaradılan Milli Mərkəzin əsas funksiyaları Azərbaycanın ərazi sularında üzən gəmilərin mövqeyinin peyk və radarlar vasitəsilə izlənilməsi, onların hərəkətinin təhlükəsizliyinin təmin edilməsi, naviqasiya xəbərdarlıqlarına və hava haqqında proqnozlara dair müvafiq məlumatların gəmilərə çatdırılması, “Azərbaycan Respublikasının ərazi sularında üzmə Qaydaları”na riayət olunmasına nəzarətin həyata keçirilməsindən, gəmilərdən daxil olan həyəcan siqnallarının (SOS) və digər məlumatların aidiyyəti dövlət qurumlarına çatdırılmasının təmin edilməsi və əlaqələndirmənin təşkilindən, habelə beynəlxalq təşkilatlar daxil olmaqla, digər ölkələrin eyni adlı milli mərkəzləri və gəmiçilik şirkətləri ilə mütəmadi olaraq operativ əlaqənin yaradılması və informasiya mübadiləsinin həyata keçirilməsindən ibarətdir.

Milli Mərkəz öz texniki təchizatı baxımından bir çox qabaqcıl Avropa dövlətlərinin oxşar qurumlarından daha üstündür. Milli Mərkəzdə işə cəlb olunmuş mütəxəssislər isə xarici ölkələrin müvafiq mərkəzlərində xüsusi təlimlər keçiblər.