CƏMİYYƏT
Dövlət Komissiyasının 802 - qaynar xətt zəng xidməti həftənin şənbə günləri fəaliyyətə başlayıb
Bakı, 10 may, AZƏRTAC
Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının 802 - qaynar xəttinə daxil olan vətəndaş müraciətlərinin çoxluğunu nəzərə alaraq və eyni zamanda, vətəndaş məmnunluğunu təmin etmək məqsədilə bu ilin aprelindən etibarən qaynar xətt zəng xidməti həftənin şənbə günləri də (saat 9:00-17:00) fəaliyyətə başlayıb.
Dövlət Komissiyasından AZƏRTAC-a bildiriblər ki, yanvar-aprel aylarında 802 - qaynar xətt telefon zəng xidmətinə 671 vətəndaş müraciəti daxil olub. Onların 75-i narkotik vasitələrin qanunsuz dövriyyəsi, 269-u narkotik asılılıqdan müalicə, 327-si isə digər məsələlərlə (təkrar müraciət, qanunvericiliyin müddəalarının izah edilməsi, məcburi müalicəyə dair prosedurlar və s.) bağlı olub. Qeyd olunan müraciətlər üzrə müvafiq tədbirlərin görülməsi üçün aidiyyəti orqanlara 347 məktub ünvanlanıb.