İQTİSADİYYAT
Dövlət-Sahibkar Tərəfdaşlığının İnkişafı Mərkəzinin Əsasnaməsi təsdiq edilib
Bakı, 16 avqust, AZƏRTAC
İqtisadiyyat Nazirliyinin kollegiyası tərəfindən Dövlət-Sahibkar Tərəfdaşlığının (Public Private Partnership) İnkişafı Mərkəzinin Əsasnaməsi təsdiq edilib.
Nazirliyin mətbuat xidmətindən AZƏRTAC-a bildirilib ki, Kiçik və Orta Biznesin İnkişafı Agentliyinin strukturunda fəaliyyət göstərəcək mərkəzin əsas məqsədi dövlət-özəl tərəfdaşlığı sahəsində biznes mühitinin inkişaf etdirilməsi və institusional təşkilati infrastrukturun təkmilləşdirilməsi, dövlət-özəl tərəfdaşlığı üzrə proqram və layihələrin hazırlanması, həyata keçirilməsi və müvafiq benefisiar qurumlarla səmərəli əlaqələndirilməsi, belə layihələrdə kiçik və orta biznesin iştirakının genişləndirilməsi, layihələrin maliyyələşdirilməsi üzrə investorların cəlb edilməsi işinə dəstək verilməsi, eləcə də bu sahədə dövlət qurumları da daxil olmaqla bütün maraqlı tərəflərin maarifləndirilməsi və onların bilik və bacarıqlarının artırılmasıdır.
Mərkəzin fəaliyyəti Azərbaycan Respublikasının sosial-iqtisadi inkişafına dair strateji sənədlərdə qeyd olunmuş sahələrdə dövlət-özəl tərəfdaşlığı layihələrinin daha səmərəli həyata keçirilməsinə xidmət etməklə, özəl investisiyaların sosial və iqtisadi əhəmiyyət kəsb edən infrastruktur layihələrinin inkişafına yönəldilməsinə töhfə verəcək.