Bakı, 24 noyabr, AZƏRTAC

Noyabrın 24-də İqtisadi İslahatların Təhlili və Kommunikasiya Mərkəzində Avropa İttifaqı, İqtisadi Əməkdaşlıq və İnkişaf Təşkilatı və SIGMA-nın birgə təşkilatçılığı ilə “Dövlət idarəçiliyinin prinsipləri: beynəlxalq təcrübə və inkişaf perspektivləri” adlı konfrans keçirilib.

AZƏRTAC xəbər verir ki, İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı Azərbaycanda dövlət idarəetməsi ilə bağlı islahatların yeni iqtisadi paradiqmanın tələblərinə uyğun olaraq uğurla davam etdirildiyini deyib. Bildirib ki, dövlətə məxsus müəssisələrin səmərəliliyinin qiymətləndirilməsi sahəsində tətbiq olunan və beynəlxalq təcrübədə tövsiyə edilən qabaqcıl qaydalar öyrənilib tətbiq ediləcək. Dövlət müəssisələri üçün effektiv fəaliyyət üçün uyğun mexanizmlər müəyyənləşdiriləcək. Bu sahədə də dövlət idarəetməsi islahatları mərhələli şəkildə həyata keçiriləcək. V.Qasımlı, eyni zamanda, milli iqtisadiyyatın strateji yol xəritəsi çərçivəsində də dövlət idarəetmə islahatlarının istiqamətlərinin müəyyənləşdirildiyini diqqətə çatdırıb.

Azərbaycan Respublikası Prezidentinin İqtisadi İslahatlar üzrə Köməkçisi Xidmətinin sektor müdiri Elxan Mikayılov bildirib ki, son zamanlar ölkəmizdə ciddi islahat tədbirləri, o cümlədən institusional islahatlar həyata keçirilir. Azərbaycanda biznes mühitinin təkmilləşdirilməsi, sahibkarlar üçün əlverişli şəraitin yaradılması ilə bağlı islahatlar keçirilib. Biznes mühitin vacib elementlərindən biri də dövlət idarəetməsinin sahibkarlığın fəaliyyəti üçün əlverişli idarəetmə prinsipləri əsasında qurulmasından ibarətdir. Bugünkü tədbir aparılan islahatlar çərçivəsində xüsusi əhəmiyyət kəsb edən seqmenti əhatə edir.

SIGMA-nın rəhbəri xanım Karen Hill qeyd edib ki, tədbirin məqsədi Azərbaycanın iqtisadi və sosial inkişafı üçün səmərəli, məsuliyyətli, effektiv və şəffaf dövlət idarəçiliyinin həyata keçirilməsinin mühümlüyünü çatdırmaq, o cümlədən islahatlarla bağlı müvafiq tədbirləri müəyyən etmək və bu prosesə dəstək verməkdir. K.Hill dövlətin maliyyə vəsaitindən səmərəli şəkildə istifadəni, iqtisadi və sosial sahələrdə nailiyyətlərin əldə olunması və bununla da vətəndaşların rifahının yaxşılaşdırılması və ölkənin beynəlxalq arenadakı mövqeyinin möhkəmləndirilməsi üçün yaxşı idarəetmənin mühüm əhəmiyyət kəsb etdiyini deyib. Bildirib ki, hər ölkədə olduğu kimi, Azərbaycanda da dövlət idarəçiliyinin daha yaxşı fəaliyyət göstərməsi üçün potensial var. Bu məqsədə nail olmaq üçün bir sıra tədbirlər həyata keçirilir. Bu tədbirlər qurumların müvafiq şəkildə fəaliyyət göstərməsinə imkan yaradacaq, o cümlədən iqtisadi və sosial islahatlar üçün zəruri əlavə dəstək rolunu oynamaqla uğurlu fəaliyyətə zəmin yaradacaq.

Avropa İttifaqının Azərbaycandakı daimi nümayəndəliyinin rəhbəri Malena Mard “İnstitusional islahatlar - uğurlu inkişaf üçün əsas şərt” mövzusunda məruzə ilə çıxış edib. Azərbaycan ilə Avropa İttifaqı arasında əlaqələrin və əməkdaşlığın genişləndirilməsi imkanlarını diqqətə çatdıran Malena Mard bildirib ki, Avropa İttifaqı Azərbaycanın ən böyük iqtisadi tərəfdaşıdır, Azərbaycana birbaşa investisiyaların ən böyük hissəsini təmin edir. Avropa İttifaqı ilə Azərbaycan uzun müddətdir əməkdaşlıq edir. “Xüsusi qeyd etmək istəyirəm ki, dövlət idarəçiliyi sektorunda müxtəlif sahələrdə həyata keçirdiyimiz vacib layihələrimiz var”, - deyə M.Mard bildirib.

Milli Məclisin iqtisadi siyasət, sənaye və sahibkarlıq komitəsinin sədri, akademik Ziyad Səmədzadə Azərbaycanın spesifik inkişaf modelinə malik olduğunu və bu strateji inkişaf kursunun ulu öndər Heydər Əliyev tərəfindən başlanıldığını, Azərbaycan Respublikasının Prezidenti İlham Əliyevin həyata keçirdiyi siyasətin nailiyyətləri sayəsində isə yeni mərhələyə qədəm qoyduğunu diqqətə çatdırıb.

“Prezident İlham Əliyevin rəhbərliyi ilə son illər iqtisadiyyatın inkişafı yönündə mühüm addımlar atılıb. Bunun nəticəsində də Azərbaycan regionda iqtisadi baxımdan ən güclü dövlətdir”, - deyə Z.Səmədzadə qeyd edib.

Akademik, həmçinin əlavə edib ki, milli iqtisadiyyatımızın inkişafı istiqamətində hazırda sistemli islahatlar həyata keçirilir və bu islahatlar gələcək perspektivlər baxımından böyük əhəmiyyət kəsb edir. Buna görə də Azərbaycan dünyada layiqli yerini tutmağa müvəffəq olub. Ziyad Səmədzadə qeyd edib ki, beynəlxalq qurumlar da Azərbaycanla əməkdaşlıqda maraqlıdır.

Milli Məclisin deputatı Vüsal Hüseynov və “ASAN xidmət”in aparat rəhbəri Azad Cəfərli “Azərbaycanda cari islahatlar və potensial islahatlar üzrə əsas təmərküzləşmə sahələri” mövzusunda məruzə ediblər.

Avropa İttifaqının əməkdaşlıq departamentinin rəhbəri Jeroen Viilems qurumun institusional islahatlarını dəstəkləyən hazırkı və potensial fəaliyyət istiqamətləri barədə danışıb.

Müzakirələrin sonunda iştirakçıların rəyi dinlənilib.