REGİONLAR


Dövlətimizin başçısının dediyi hər bir söz, ordumuzun qazandığı hər bir uğur Qələbəyə olan inamı daha da artırır

Naxçıvan, 12 oktyabr, AZƏRTAC

Ermənistan silahlı qüvvələrinin sentyabrın 27-də Azərbaycana qarşı növbəti təxribatının qarşısı hər zaman olduğu kimi qətiyyətlə alındı, səbri tükənmiş ordumuz bu dəfə vandallardan ibarət düşmən ordusunu torpaqlarımızdan tamamilə qovub çıxarmağa başladı.

AZƏRTAC-ın Naxçıvan bürosuna müsahibəsində bu sözləri deyən AMEA Naxçıvan Bölməsinin Tarix, Etnoqrafiya və Arxeologiya İnstitutunun Arxeoloji xidmət şöbəsinin müdiri Zeynəb Quliyeva bildirib ki, hər dəfə belə təxribatlardan sonra cavablarını alaraq qınlarına çəkilən, eyni zamanda xaricdəki havadarlarını vasitəçi edərək Azərbaycan Ordusunun dayandırılmasına alışmış erməni dəstələri bu dəfə yanıldıqlarını anladılar və ona görə də çaşqınlıq içində döyüş postlarını tərk edərək qaçmağa üz qoyublar. Qaçarkən də öz xislətlərindən əl çəkmir, gah sərhədyanı bölgələrimizi atəşə tutur, gah da beynəlxalq aləmə saxta məlumatlar ötürməklə imdad diləyirlər. Lakin bu dəfə onların xaricdəki havadarları da köməklərinə çata bilmir. Çünki artıq Azərbaycan həqiqətləri lazımi səviyyədə dünyaya çatdırır. Son günlərdə Azərbaycan Respublikasının Prezidenti İlham Əliyevin “Əl-Cəzirə” kanalına, həmçinin Türkiyənin, Rusiyanın nüfuzlu televiziya kanallarına verdiyi müsahibələrdə konkret faktlarla ermənilərin feyk xəbərlərini tamamilə alt-üst etməsi bunun ən gözəl sübutudur.

“Prezidentin, Ali Baş Komandanın xalqa müraciəti zamanı söylədiyi hər bir söz, hər bir cümlə insanlarımızın qəlbini riqqətə gətirir və Qələbəyə olan inamı daha da artırır. Bu inamdır Azərbaycan igidlərini düşmən qarşısında sarsılmaz edən, 2016-cı ilin Aprel döyüşlərindən, 2018-ci ildə Günnüt zəfərindən başlanan qəhrəmanlıq salnaməsini yenidən yazdıran”, - deyən Zeynəb Quliyeva qeyd edib ki, dövlətimizin başçısı oktyabrın 9-da xalqa müraciətində də qeyd etdiyi kimi, Moskva danışıqları Ermənistan üçün sonuncu şansdır. Ölkə rəhbəri deyib: “Əgər Ermənistan bu şansdan istifadə etməsə və Azərbaycan tərəfinin şərtləri ilə razılaşmasa, Ermənistanı daha ağır günlər gözləyir. Bundan sonra onlara heç kəs kömək edə bilməyəcək”.

Bu gün şanlı Azərbaycan Ordusunun Qarabağımızda tarix yazdığını vurğulayan AMEA Naxçıvan Bölməsinin Tarix, Etnoqrafiya və Arxeologiya İnstitutunun Arxeoloji xidmət şöbəsinin müdiri bildirib ki, bu tarix elə bir tarixdir ki, uğrunda fəda olan müqəddəs şəhid ruhlarının nigarançılığına son qoyacaq. Bu tarix elə bir tarixdir ki, atalarını, övladlarını, qardaşlarını bu yolda qurban verərək yanan ürəklərə su səpəcək. Bu tarix elə bir tarixdir ki, ikili standartlara yol verənlərə İlahi ədalətin necə təcəlli etdiyini göstərəcək.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.