SİYASƏT
Elmar Məmmədyarov: Azərbaycan reallaşdırdığı layihələrlə Avrasiyanın əhəmiyyətli regionlarını birləşdirir
Tbilisi, 19 fevral, AZƏRTAC
Yüksək səviyyəli ikitərəfli və üçtərəfli münasibətlər, bu formatda keçirilən müntəzəm görüşlər ölkələrimiz arasında strateji əməkdaşlığın genişləndirilməsində əhəmiyyətli rol oynayır və müxtəlif sahələrdə əməkdaşlığımızın vəziyyətinin nəzərdən keçirilməsinə imkan yaradır. Bu baxımdan 2013-2015-ci illəri əhatə edən Üçtərəfli Sahəvi Əməkdaşlıq Fəaliyyət Planı üçün nəzərdə tutulan üçtərəfli layihələri xüsusi qeyd etmək olar.
Bu fikirləri xarici işlər naziri Elmar Məmmədyarov fevralın 19-da Tbilisidə Azərbaycan, Gürcüstan və Türkiyə xarici işlər nazirlərinin beşinci üçtərəfli görüşündə bildirib.
Nazir qeyd edib ki, ölkələrimizin coğrafi yerləşməsi rəqabətli tranzit imkanlarından faydalanmaq üçün əlverişli imkanlar yaradır. Ona görə də bizim coğrafi məkanda nəqliyyat infrastrukturu, xüsusilə kommunikasiya xətlərinin qarşılıqlı bağlılığı və infrastrukturun inkişafı əsas əməkdaşlıq sahələrindən biri olmalıdır.
E.Məmmədyarov bildirib ki, Azərbaycan hər zaman Xəzərin enerji ehtiyatlarının Qərb bazarlarına çıxarılması üçün öz tranzit imkanlarını təklif edib. Bakı-Tbilisi-Ceyhan layihəsinin uğurla həyata keçirilməsindən sonra biz regionda bir sıra əhəmiyyətli layihələrin təşəbbüskarı olmuşuq. Azərbaycan “Cənub” qaz dəhlizinin əsas xətləri olan Trans-Anadolu kəməri (TANAP), Bakı-Tbilisi-Qars dəmir yolu və yeni Bakı Beynəlxalq Dəniz Ticarət Limanı layihələrinin həyata keçirilməsi vasitəsilə Avrasiyanın ən əhəmiyyətli regionlarını birləşdirir. Bakı-Tbilisi-Qars dəmir yolu və yeni Bakı Beynəlxalq Dəniz Ticarət Limanı Şərq-Qərb dəhlizinin əsas seqmenti olacaq.
Nazir deyib: “Bununla yanaşı, regionda sülhə və inkişafa maneələr də qalmaqdadır. Dövlətlərin suverenliyinə, ərazi bütövlüyünə və beynəlxalq səviyyədə tanınmış sərhədlərinin toxunulmazlığına hörmətin təmin edilməsinə, eləcə də regionda sülhün və sabitliyin qorunması üçün təcavüzkar siyasətdən imtina olunmasına ehtiyac var. Ermənistan-Azərbaycan münaqişəsinin həll edilməsində uğursuzluq regionda sülh və təhlükəsizliyə, o cümlədən regional əməkdaşlığa ən böyük təhlükədir. İşğalçı siyasətinə görə Ermənistan bütün regional layihələrdən kənarda qalıb”.
Azərbaycan xarici siyasət idarəsinin rəhbəri qarşılıqlı səylərin müxtəlif sahələrdə ölkələrimizin inkişafına töhfə verəcəyinə əmin olduğunu bildirib.
Xətayi Əzizov
AZƏRTAC-ın xüsusi müxbiri
Tbilisi