CƏMİYYƏT
Elmi-Praktiki Hemofiliya Mərkəzində qeydiyyatda olan xəstələrin sayı 1541-ə çatıb VİDEO
BakI, 8 fevral, AZƏRTAC
Hemofiliya xəstəliyinə dair 2016-2020-ci illər üzrə Dövlət Proqramının həyata keçirilməsində məqsədyönlü nəticələr əldə edilib. Bu işlər sırasına hemofiliyalı xəstələrə göstərilən tibbi yardımın təkmilləşdirilməsi də daxildir. Belə ki, hemofiliyalı xəstələrin ilkin diaqnostikası İEQAST proqramına qoşulmuş laboratoriyada aparılır. Həmin müayinələrin nəticələri vaxtaşırı İngiltərənin “Relis” hemostaz laboratoriyası tərəfindən yoxlanılır.
Səhiyyə Nazirliyinin mətbuat xidmətindən AZƏRTAC–a bildiriblər ki, görülən işlər sırasına gələcəkdə əlilliyin qarşısının alınması məqsədilə ilkin müraciətdən sonra ağır formalı uşaqlar birincili və ikincili profilaktikanın aparılması xəstələrin həyat keyfiyyətinin yaxşılaşdırılması və respublikanın bəzi rayonlarında (Şəki, Şirvan, Gəncədə) hemofiliyalı xəstələrə hematoloji tibbi yardımın göstərilməsinin təşkili də daxildir.
Ötən il ərzində Elmi-Praktiki Hemofiliya Mərkəzində qeydiyyatda olan xəstələrin sayı 1541 çatıb. Bunlardan - 745 xəstə Bakı, 76 xəstə Sumqayıt, 720 xəstə isə rayonların payına düşür. Bütün hemofiliyalı xəstələrin ilkin diaqnostikası və təkrar müayinələri mərkəzin laboratoriyasında aparılır. 2016-cı ildə 89 ilkin müayinə olunmuş, 69 xəstədə hemofiliya təsdiq olunaraq dispanser qeydiyyata götürülüb. Dövlət Proqramı çərçivəsində hemofiliyalı xəstələr faktor preparatları ilə tam təmin olunaraq stasionar, ambulator və ev şəraitində müalicə alırlar. Müxtəlif qanaxmalarla 2847 xəstə ev şəraitində ambulator, 307 ağır xəstə isə stasionar müalicə alıb.
Bundan başqa 15-49 yaş arasında olan 950 xəstədən 130-na ağır xəstə kimi ikincili profilaktika aparılıb. Bu o deməkdir ki, xəstələrin oynaqlarında qanaxma və onun fəsadları aradan götürülənə qədər həftədə iki dəfə faktor konsentratı köçürülür. Bir nəfər fəsadlaşmış ingibitor formalı xəstə Avropada tətbiq edilən İTİ proqramı üzrə müalicəyə götürülmüşdür. 5 inhibitor formalı göstərişə uyğun yüksək dozada standart profilaktika müalicəsi alır. 30 hemofiliyalı xəstə üzərində böyük cərrahi əməliyyat olunub.
2011-2016-cı illərdə hemofiliya xəstəliyi səbəbindən ölüm halı qeydə alınmayıb.
Dünya ölkələrinin yalnız 20 faizində hemofiliyalı xəstələr dövlət hesabına faktor preparatları ilə təmin olunurlar, Azərbaycan da bu ölkələr sırasına daxildir.