Bakı, 19 oktyabr, AZƏRTAC

İndiyədək Kiçik və Orta Biznesin İnkişafı Agentliyinə (KOBİA) Ermənistanın təxribatı nəticəsində ailə təsərrüfatı, ticarət və ictimai iaşə sahəsində fəaliyyət göstərən 200-dək sahibkara ziyanın dəyməsi barədə məlumatlar daxil olub.

KOBİA-dan AZƏRTAC-a bildirilib ki, KOBİA-nın idarə heyətinin sədri Orxan Məmmədovun Argentinanın ölkəmizdəki səfiri Serxio Osvaldo Perez Qunella ilə görüşündə Ermənistanın sentyabrın 27-dən etibarən Azərbaycana qarşı hərbi təxribatı barədə məlumat verilib. Vurğulanıb ki, BMT Təhlükəsizlik Şurasının Ermənistan silahlı qüvvələrinin Azərbaycanın işğal edilmiş ərazilərindən çıxarılmasını nəzərdə tutan qətnamələrinə baxmayaraq, torpaqlarımız 30 ilə yaxındır ki, Ermənistanın işğalı altındadır. Ermənistanın Azərbaycana qarşı davam edən son hərbi təxribatında əsas hədəf mülki əhali və obyektlərdir. Ölkəmizin vətəndaşlarının təhlükəsizliyini təmin etmək məqsədilə beynəlxalq humanitar hüquq çərçivəsində apardığı əks-hücum əməliyyatı Azərbaycanın öz ərazisində həyata keçirilir. Oktyabrın 10-da tərəflər arasında əldə olunan humanitar atəşkəsə baxmayaraq, oktyabrın 11-də və 17-də Ermənistan Azərbaycanın Gəncə şəhərinə raket atıb və nəticədə mülki şəxslər, o cümlədən uşaqlar həlak olub və yaralanıb. Həmçinin Ermənistanın təxribatı nəticəsində Azərbaycanın sahibkarlıq subyektlərinə, xüsusilə də KOB subyektlərinə xeyli ziyan dəyib. Hazırda KOBİA sahibkarlara dəymiş ziyanın müəyyənləşdirilməsi istiqamətində məlumatların toplanması və zərərin yerində öyrənilməsi istiqamətində tədbirlər görür. İndiyədək KOBİA-ya Ermənistanın təxribatı nəticəsində ailə təsərrüfatı, ticarət və ictimai iaşə sahəsində fəaliyyət göstərən 200-ə yaxın sahibkara ziyanın dəyməsi barədə məlumatlar daxil olub.

Görüşdə KOBİA-nın sədri Azərbaycan və Argentinanın sahibkarlıq subyektləri arasında əlaqələrin qurulması və mövcud əməkdaşlığın genişləndirilməsinin əhəmiyyətini vurğulayıb, hər iki ölkənin bu sahədə böyük potensiala malik olduğunu bildirib. Agentliyin kiçik və orta sahibkarlığın inkişafı sahəsində ən yaxşı beynəlxalq təcrübələrin öyrənilməsində Argentinanın bu sahədə fəaliyyət göstərən müvafiq qurumları ilə əməkdaşlıqda maraqlı olduğu qeyd edilib. O.Məmmədov pandemiya şəraitində KOB-ların dəstəklənməsi məqsədilə həyata keçirilən dövlət dəstəyi tədbirləri, KOBİA-nın bu sahədə fəaliyyəti barədə də məlumat verib.

Səfir baş vermiş hadisələr nəticəsində mülki şəxslərin həlak olması və yaralanmasından təəssüfləndiyini bildirib. Ölkəmizdə yaradılmış əlverişli biznes mühitinin xarici investorlar üçün cəlbediciliyini vurğulayan Argentina səfiri pandemiyanın KOB-lara mənfi təsirinin aradan qaldırılması istiqamətində müvafiq tədbirlərin davam etdirilməsinin zəruriliyini qeyd edib.

Görüş çərçivəsində, həmçinin Azərbaycanda kənd təsərrüfatı, qida emalı, bərpaolunan enerji sahələrində müştərək müəssisələrin yaradılması imkanlarına dair fikir mübadiləsi aparılıb, daşınmaz əmlak, əczaçılıq, turizm, İKT, dövlət-özəl tərəfdaşlığı və digər sahələrdə potensial investisiya layihələrinin mübadiləsinə, KOBİA ilə Argentinanın KOB-ların inkişafına dəstək sahəsində fəaliyyət göstərən müvafiq qurumları arasında əməkdaşlığın genişləndirilməsi barədə razılığa gəlinib.