CƏMİYYƏT
FHN-in Bakı Regional Mərkəzi kompleks mülki müdafiə təlimi keçirib
Bakı, 14 oktyabr, AZƏRTAC
Fövqəladə Hallar Nazirliyinin (FHN) Bakı Regional Mərkəzi “Baku Steel Company” MMC-də “Fövqəladə halların nəticələrinin aradan qaldırılması zamanı qəza-xilasetmə və digər təxirəsalınmaz işlərin aparılması” mövzusunda kompleks mülki müdafiə təlimi keçirib.
FHN-dən AZƏRTAC-a bildiriblər ki, təlimin keçirilməsində məqsəd obyektin mülki müdafiə planının reallığının yoxlanılması, mülki müdafiə orqan və qüvvələrinin zədələnmə ocağında təyinatı üzrə hazırlıq səviyyəsinin yoxlanılması, idarəetmə, rabitə və xəbərdarlıq sistemlərinin etibarlılığının yoxlanılması, qəza-xilasetmə və digər təxirəsalınmaz işlərin təşkili və aparılması zamanı obyektin rəhbər və komandir-rəis heyətinin idarəetmə üzrə bilik və bacarıqlarının təkmilləşdirilməsi olub. O cümlədən mülki müdafiə qüvvələrinin hazırlıq səviyyələrinin yüksəldilməsi, obyektin mülki müdafiə orqan və qüvvələrinin fövqəladə hal şəraitində birgə fəaliyyətlərinin uzlaşdırılması, fövqəladə hallar zamanı obyektin dayanıqlı işinin, eləcə də işçilərin mühafizəsinin üsul və qaydalarının təkmilləşdirilməsi, rəhbər heyətinə işçi sənədlərin hazırlanması üzrə bacarıq və vərdişlərin aşılanması, mülki müdafiə qüvvələrinə yüksək mənəvi-psixoloji keyfiyyətlərin, eləcə də ekstremal vəziyyətlərdə fəaliyyət bacarığının aşılanmasından ibarət olub.
Kompleks mülki müdafiə təlimi “Baku Steel Company” MMC-nin fonunda yaradılmış dörd fövqəladə hal şəraiti üzrə xəbərdarlıq siqnalları verilməklə idarəetmə orqanlarının, qüvvə və vasitələrin hazır vəziyyətə gətirilməsi, zədələnmə ocağında vəziyyətin qiymətləndirilməsi, qərarın qəbul edilməsi, əlaqələndirilməsi, idarəetmə və hərtərəfli təminatın təşkili, əməliyyat əmrinin verilməsi, qəza-xilasetmə və digər təxirəsalınmaz işlərin aparılması üzrə məsələlərin ardıcıl işlənilməsilə iki mərhələ üzrə keçirilib.
Birinci mərhələ MMC-nin aparatı və struktur bölmələrinin, aidiyyəti qurumların fövqəladə hal barədə xəbərdar edilməsi, iş rejimi (hazırlıq) dərəcələrinə gətirilməsi, fövqəladə halların nəticələrinin aradan qaldırılması üzrə fəaliyyətləri əhatə edib. İlk olaraq işçilərin xəbərdar olunması, onların inzibati binadan təhlükəsiz əraziyə təxliyəsi, zavodun mühafizəsinin gücləndirilməsi, obyekt mülki müdafiə qüvvələrinin hadisənin baş verdiyi əraziyə yeridilməsi, vəziyyət barədə məlumatların toplanılması, təhlili və qiymətləndirilməsi, tabeçilikdə olanlara tapşırıqların qoyulması, qəza-xilasetmə və digər təxirəsalınmaz işlərin aparılması, idarəetmə, qarşılıqlı fəaliyyət, hərtərəfli təminat üzrə tədbirlərin yerinə yetirilməsi, əlavə qüvvə və vasitələrin hadisə rayonuna yeridilməsi, obyektin dayanıqlı işinin təmini ilə bağlı fəaliyyətlər icra olunub.
İkinci mərhələ qəza-xilasetmə və digər təxirəsalınmaz işlərin davam etdirilməsi, xilasetmə əməliyyatlarının başa çatdırılması, qüvvə və vasitələrin daimi dislokasiya yerlərinə qaytarılması üzrə fəaliyyətləri əhatə edib. İkinci mərhələdə MMC-nin “Qəzaların ləğvi planı”na müvafiq olaraq tədbirlərin həyata keçirilməsi, qəza-xilasetmə və digər təxirəsalınmaz işlərin davam etdirilməsi və başa çatdırılması, obyektin aidiyyəti üzrə təhvil verilməsi, qüvvə və vasitələrin daimi dislokasiya yerlərinə qaytarılması fəaliyyətləri icra edilib.
Təlimin gedişində şərti olaraq xəsarət alan 10 nəfər və dağıntılar altında qalan 13 nəfər çıxarılaraq, ilkin və təcili tibbi yardım göstərilərək aidiyyəti səhiyyə müəssisələrinə təhvil verilib.
Tədbirdə yerinə yetirilən tapşırıqlara vasitəçilər tərəfindən nəzarət edilib, təhlükəsizlik qaydalarına ciddi riayət olunub.
Sonda təlim rəhbərliyi tərəfindən kompleks mülki müdafiə təliminin təhlili aparılıb, müvafiq tövsiyə və tapşırıqlar verilib.
Təlimdə Bakı Regional Mərkəzinin, Dövlət Yanğından Mühafizə Xidmətinin, Bakı Şəhər Baş Polis İdarəsinin, Bakı Şəhər Təcili və Təxirəsalınmaz Tibbi Yardım Stansiyasının qüvvə və vasitələri, MMC-nin işçi heyəti iştirak edib.