İQTİSADİYYAT
Gömrük Akademiyasında “İqtisadiyyat” ixtisası üzrə tələbələrin yekun dövlət attestasiyası keçirilir
Bakı, 3 iyul, AZƏRTAC
Dövlət Gömrük Komitəsinin Akademiyasının (DGKA) “İqtisadiyyat” ixtisası üzrə tələbələrinin yekun dövlət attestasiyası (buraxılış işinin müdafiəsi) keçirilir.
Komitənin Mətbuat və İctimaiyyətlə Əlaqələr İdarəsindən AZƏRTAC-a bildirilib ki, iyulun 3-də Gömrük Komitəsinin inzibati binasında keçirilən imtahan prosesində DGK sədri, gömrük xidməti general-leytenantı Səfər Mehdiyev, “İqtisadiyyat” ixtisası üzrə komissiyanın sədri - Vergilər naziri Mikayıl Cabbarov, eyni zamanda, komitənin müvafiq strukturlarının rəhbərləri, Gömrük Akademiyasının, həmçinin Azərbaycan Dövlət İqtisad Universitetinin, Azərbaycan Dövlət İqtisad Universitetinin Rus İqtisad məktəbinin, Milli Aviasiya Akademiyasının professor-müəllim heyəti iştirak ediblər.
İmtahandan əvvəl akademiyanın rəisi Qulu Novruzov DGKA-nın “İqtisadiyyat” ixtisası üzrə bitirən tələbələr barədə məlumat verib, onların bir sıra dövlət qurumlarında - İqtisadiyyat Nazirliyi, Dövlət Gömrük Komitəsi, Auditorlar Palatası, Maliyyə Bazarlarına Nəzarət Palatasında təcrübə keçdiklərini bildirib və gənclərə yekun dövlət attestasiyasında müvəffəqiyyətlər arzulayıb.
Sonra S.Mehdiyev və M.Cabbarov tələbələrə uğurlar arzulayaraq ali təhsilin ilk pilləsində qazandıqları biliklərin şəxsiyyətlərinin formalaşmasında və gələcək fəaliyyətlərinin qurulmasında mühüm rol oynayacağını bildirib, mövcud potensiallarından səmərəli şəkildə istifadə edərək daima dövlətə, xalqa və dövlətçiliyə sədaqətlə xidmət etməyi tövsiyə ediblər.
Tələbələr seçdikləri mövzuya uyğun buraxılış işlərini təqdim edib, imtahan komissiyası üzvlərinin suallarını ətraflı cavablandırıblar. Bu il Dövlət Gömrük Komitəsinin Akademiyasında “İqtisadiyyat” ixtisası üzrə 22 tələbənin təhsili başa vurması gözlənilir.