SİYASƏT
Günay Səlimzadə: Ermənistan ordusunun artilleriya atəşi nəticəsində xəsarət alan 121 mülki şəxsin 30-u qadın, 7-si uşaqdır
Bakı, 5 oktyabr, AZƏRTAC
Sentyabrın 27-də saat 06:00 radələrindən başlayaraq, Ermənistanın hərbi-siyasi rəhbərliyinin göstərişi ilə düşmənin silahlı qüvvələri tərəfindən Azərbaycan əhalisinin sıx yaşadığı məntəqələr ağır artilleriya atəşinə tutulur və bununla da mülki əhalimizə qarşı müxtəlif cinayətlərin törədilməsi davam edir. Oktyabrın 5-i saat 12-yə olan son məlumata əsasən, mülki əhali arasında 24 mülki şəxs həlak olub. Onlardan 5-i qadın, 3-ü uşaqdır. Bundan başqa, 121 mülki şəxs müxtəlif dərəcəli bədən xəsarətləri alıb. Onlardan 30-u qadın, 7-si isə uşaqdır.
AZƏRTAC xəbər verir ki, bunu Baş Prokurorluğun mətbuat xidmətinin rəisi Günay Səlimzadə oktyabrın 5-də keçirilən brifinqdə deyib.
Günay Səlimzadə bildirib ki, oktyabrın 4-də Ermənistanın silahlı qüvvələri tərəfindən dinc əhaliyə qarşı növbəti dəfə cinayət törədilib. Həmin gün saat 10 radələrində işğalçı ölkənin silahlı qüvvələrinin Azərbaycanın ikinci böyük şəhəri olan və döyüş bölgəsindən 80 kilometrdən çox məsafədə yerləşən Gəncə şəhərinin, eləcə də əhalimizin sıx yaşadığı məntəqələr ağır artilleriyadan atəşə tutulub. Ümumilikdə Gəncənin müxtəlif istiqamətlərinə 7 raket atılıb. Xoşbəxtlikdən 5 raket partlamayıb. Qalan 2 raketin partlaması nəticəsində bir mülki şəxs - 1999-cu il təvəllüdlü Əliyev Tunar Qoşqar oğlu həlak olub, 32 nəfər isə müxtəlif dərəcəli bədən xəsarətləri alıb və xəstəxanalara yerləşdirilib. Eyni zamanda, mülki infrastruktura və evlərə külli miqdarda ziyan vurulub. Həmin 32 şəxsdən 19-u qadın, 5-i isə uşaqdır.
Baş Prokurorluğun mətbuat xidmətinin rəisi xüsusi vurğulayıb ki, Azərbaycan Respublikasının işğal olunmuş Qarabağ bölgəsində yaradılmış qondarma “rejim”in qondarma “başçısı” Araik Arutunyan oktyabrın 4-də “Facebook”dakı səhifəsində Gəncə şəhərinin mülki əhalisinin sıx yaşadığı məntəqələrinin atəşə tutulması barədə göstəriş verdiyini açıqlayıb. Bu fakt üzrə Araik Arutunyan barəsində Azərbaycan Respublikası Cinayət Məcəlləsinin bir sıra maddələri ilə cinayət işi başlanıb. Araik Arutunyan və həmin qanunsuz qurumun digər hərbi-siyasi rəhbərliyinin sülh və insanlıq əleyhinə, o cümlədən müharibə cinayətləri törətmələri ilə bağlı cinayət məsuliyyətinə cəlb olunması üçün zəruri tədbirlər görülür. Bununla bağlı Baş Prokurorluq tərəfindən bütün beynəlxalq qurumlara müraciət ediləcək.
“Göstərilən faktlar bir daha sübut edir ki, Ermənistan tərəfi beynəlxalq hüququn norma və prinsiplərini kobud şəkildə pozmaqda davam edir, BMT Baş Assambleyasının 1974-cü il tarixli “Fövqəladə vəziyyət və hərbi münaqişələr zamanı qadın və uşaqların müdafiəsi haqqında” Bəyannaməsi ilə üzərinə düşən öhdəlikləri icra etməyərək dinc mülki əhalimizi qəsdən hədəfə alır. Bununla da kifayətlənməyən Ermənistan tərəfi oktyabrın 4-də saat 22 radələrindən başlayaraq, Ermənistanın hərbi-siyasi rəhbərliyinin göstərişi ilə düşmənin silahlı birləşmələri tərəfindən Azərbaycanın dinc əhalisinin qəsdən hədəfə alınmaqla döyüş əməliyyatlarının aparıldığı bölgədən 100 kilometrdən çox uzaqlıqda yerləşən, Azərbaycanın sənaye şəhəri, 100 mindən çox əhalisi olan Mingəçevir şəhərinin mülki əhalisinin sıx yaşadığı məntəqələri raket atəşinə tutulub. Atılmış 3 raketdən 2-si xoşbəxtlikdən partlamayıb. Həmin raketlərdən biri “Azərbaycan” İstilik Elektrik Stansiyasının qarşısına, digəri yaşayış məntəqəsinin yaxınlığına düşüb. Üçüncü raketin partlaması nəticəsində 5 mülki şəxs müxtəlif dərəcəli bədən xəsarətləri alıb. Eyni zamanda, evlərə də külli miqdarda ziyan dəyib”, - deyə Günay Səlimzadə vurğulayıb.
Diqqətə çatdırılıb ki, baş vermiş bu cinayət hadisələri ilə bağlı rayon prokurorluqları tərəfindən ümumilikdə 19 cinayət işi başlanıb. Hazırda prokurorluq əməkdaşları tərəfindən döyüş şəraitində mümkün olan bütün istintaq-əməliyyat tədbirləri həyata keçirilir. Yaralananların xəsarətlərinin ağırlıq dərəcələrini, o cümlədən mülki infrastruktura və evlərə dəymiş maddi ziyanın məbləğini müəyyənləşdirmək məqsədilə müvafiq ekspertizalar təyin olunub.
Hazırda cinayət işləri üzrə istintaq davam etdirilir.