RƏSMİ XRONİKA
HEYDƏR ƏLİYEV ADINA BEYNƏLXALQ HAVA LİMANINDA YENİ AEROVAĞZAL BİNASI İSTİFADƏYƏ VERİLMİŞDİR
Azərbaycan Prezidenti İlham Əliyev bu münasibətlə keçirilən açılış mərasimində iştirak etmişdir.
Binanın qarşısına toplaşan mülki aviasiya işçiləri, paytaxt sakinləri dövlətimizin başçısını hərarətli alqışlarla qarşıladılar.
Prezident İlham Əliyev rəmzi açılışı bildirən qırmızı lenti kəsdi, müasir standartlara cavab verən aerovağzal binası ilə yaxından tanış oldu.
“Azərbaycan Hava Yolları” Dövlət Konserninin baş direktoru Cahangir Əsgərov dövlətimizin başçısına məlumat verdi ki, ümummilli liderimiz Heydər Əliyevin təşəbbüsü ilə yenidən qurulmuş aerovağzal binasının açılışı ulu öndərimizin, müstəqil Azərbaycanın qurucusunun anadan olmasının 81-ci ildönümünə aviatorların hədiyyəsidir. Mülki aviasiyamızın bugünkü inkişafına görə Heydər Əliyevə borcluyuq. Aerovağzal kompleksinin təməlini 1981-ci ildə Heydər Əliyev qoymuşdur. Lakin sonrakı dövrdə tikinti uzanmış, nəhayət, tamamilə dayandırılmışdı. Yalnız Heydər Əliyev yenidən Azərbaycan rəhbərliyinə qayıtdıqdan sonra kompleksin tikintisinin başa çatdırılması barədə qərar vermişdir.
Ümumi sahəsi 10,5 min kvadratmetr olan aerovağzal binası saatda 500 sərnişinə xidmət göstərəcəkdir. Kompleksdə mərkəzləşmiş istilik, soyutma və havalandırma sistemi, elektrik enerjisinə olan tələbatı ödəmək üçün gücü 1600 kVt olan iki transformator və 400 kVt-lıq iki dizel generatoru quraşdırılmışdır. Birinci və ikinci mərtəbələrin döşəmələri, əsasən, Avropa ölkələrindən və Türkiyədən gətirilmiş qranitlə üzlənmişdir ki, bu da binanın daxili görünüşünə xüsusi gözəllik verir.
Binanın ikinci mərtəbəsi, əsasən, böyük gözləmə salonundan ibarətdir. Burada 300 nəfərdən çox sərnişin üçün rahat oturacaqlar quraşdırılacaqdır. Qeydiyyatdan keçəndən sonra uçuşu gözləyən sərnişinlərdən ötrü salon da vardır. Aviasiya təhlükəsizliyi, hava nəqliyyatında polis və baş gömrük idarələri və ayrı-ayrı strukturlar üçün də şərait yaradılmışdır. Cənubi Koreyada istehsal edilən, hər birinin yükgötürmə qabiliyyəti 3 ton olan iki lift quraşdırılmış, mebel avadanlığı alınmışdır.
Türkiyənin Azərbaycanda qeydiyyatdan keçmiş “Eren İnşaat” şirkətinin apardığı tikinti işlərinə konsern 36,4 milyard manat vəsait xərcləmişdir.
Azərbaycan Prezidenti İlham Əliyev binada jurnalistlər üçün brifinq zalına, televiziya kanallarının çəkiliş qrupları üçün xüsusi kabinələrə, birinci mərtəbədə sərnişinlərin ixtiyarına verilmiş hər cür rahatlığı ilə seçilən gözləmə salonuna, məlumat bürosu köşklərinə, diktor otağına, itən baqajları saxlamaq üçün kameraya, kafeyə, VİP salonuna, müasir tərtibatı ilə seçilən “Şərəf salonu”na və digər xidmət sahələrinə baxdı, yaradılmış şəraitlə yaxından tanış oldu.
Baş nazir Artur Rasizadə, Prezident Administrasiyasının rəhbəri Ramiz Mehdiyev, Bakı Şəhəri İcra Hakimiyyətinin başçısı Hacıbala Abutalıbov və digər rəsmi şəxslər mərasimdə iştirak edirdilər.