Həkimlər Səudiyyə Ərəbistanı Kralı Salman bin Əbdüləzizin səhhətində problem görmürlər

Qahirə, 9 may, AZƏRTAC

Səudiyyə Ərəbistanının Kralı Salman bin Əbdüləziz Ciddədəki Kral Faysal Hospitalında kolonoskopiya müayinəsindən keçib və onun səhhəti yaxşıdır.

AZƏRTAC xəbər verir ki, bu barədə rəsmi SPA agentliyi məlumat yayıb. Məlumatda qeyd olunub ki, həkimlər onun bir neçə gün hospitalda qalmasını məsləhət görüblər. Həkimlər kralın yoğun bağırsağının müayinəsi zamanı ciddi fəsadlar olmadığını aşkar ediblər.

Səudiyyə Ərəbistanının 86 yaşlı kralı hospitala bu gün səhər saatlarında yerləşdirilib. O, bundan əvvəl öd kisəsindən əməliyyat olunub.

Oqtay Bayramov

AZƏRTAC-ın xüsusi müxbiri

Qahirə