Milli Məclisin deputatı, Azərbaycan İqtisad Universitetinin rektoru Əli Abbasovun başçılıq etdiyi nümayəndə heyəti Azərbaycan Respublikasının Ukraynadakı səfirliyinin dəvəti ilə aprelin 13-də Kiyevə gəlmişdir. Nümayəndə heyəti “Azərbaycan-Ukrayna: strateji tərəfdaşlığın inkişaf perspektivləri” mövzusunda elmi-praktik konfransda iştirak edəcəkdir. 

Nümayəndə heyətinin üzvləri və diplomatlarımız akademik Zərifə xanım Əliyevanın adını daşıyan küçəyə baş çəkmək və buradakı Zərifə parkında Azərbaycan xalqının şanlı qızının abidəsinin ucaldılacağı yerdə xatirə daşı qoyulması mərasimində iştirak etmək üçün aprelin 14-də İrpen şəhərinə gəldilər.

Şəhər icra hakimiyyətində nümayəndə heyətini Kiyev Vilayət İcra Hakimiyyəti sədrinin birinci müavini İ.Şovkun və İrpenin meri V.Skarjinski səmimiyyətlə qarşıladılar, qonaqlara duz-çörək təqdim olundu.

Sonra Azərbaycan nümayəndə heyəti şəhər və vilayət rəhbərlərinin müşaiyəti ilə böyük Ukrayna şairi Taras Şevçenkonun abidəsini ziyarət etdilər. Böyük Kobzarın bu abidəsi İrpendə yaşayan azərbaycanlıların təşəbbüsü və vəsaiti hesabına ucaldılmışdır. Azərbaycan nümayəndə heyətinin üzvləri adından abidənin önünə gül qoyuldu.

Qonaqlar sonra akademik Zərifə Əliyevanın adını daşıyan küçəyə gəldilər. Xatırladaq ki, Azərbaycan Respublikasının Ukraynadakı səfirliyinin səyləri sayəsində bu küçə çox qısa bir müddətdə tanınmaz dərəcədə dəyişmişdir.

Zərifə xanım Əliyevanın abidəsinin ucaldılacağı yerdə xatirə daşının qoyulması münasibətilə mitinq keçirildi. İrpenin meri mitinqi açaraq dedi ki, şəhərin sakinləri burada mərkəzi küçələrdən birinə qardaş xalqın ən layiqli qızının adını vermək şərəfinə nail olduqlarına görə, səfirliyin simasında Azərbaycan tərəfinə minnətdarlıqlarını bildirirlər.

Sonra Azərbaycan nümayəndə heyətinin başçısı, Milli Məclisin deputatı A.Abbasov, Azərbaycan-Ukrayna parlamentlərarası dostluq qrupunun sədri V.Abdullayev, Milli Məclisin deputatı, istefada olan general-mayor V.Timoşenko, Azərbaycan Prezidenti yanında Dövlət İdarəçilik Akademiyasının rektoru, professor S.Qəndilov, habelə İ.Şovkun və Ukrayna Azərbaycanlıları Konqresinin sədri O.Əfəndiyev çıxış edərək gözəl həkim, böyük alim, səmimi insan Zərifə Əliyevanın dünya oftalmologiyasına verdiyi böyük töhfədən, xalqlarımızı bir-birinə bağlayan dostluq tellərinin sarsılmazlığından danışdılar.

Ölkəmizin Ukraynadakı səfiri T.Əliyev xoş mərama və dostluğumuzu konkret işlərlə möhkəmləndirmək arzusuna görə Kiyev vilayət rəhbərliyinə və şəhərin meri V.Skarjinskiyə səmimi minnətdarlığını bildirdi. O, küçənin abadlaşdırılmasında, xatirə daşının qoyulmasında səfirliyə maliyyə yardımı göstərmiş həmyerlilərimizin adlarını açıqladı. Səfir İrpeni xalqlarımız arasında rəmzi dostluq körpüsü adlandıraraq bildirdi ki, bu yaxınlarda şəhərin meri Azərbaycan paytaxtının Qaradağ rayonu ilə tərəfdaşlıq əlaqələri yaratmaq üçün Bakıya səfər edəcəkdir.

Xatirə daşının qoyulduğu yer tər gül-çiçəyə qərq oldu.

Mitinqdə irpenli şair Nataliya İsrafilova-Leşşenkonun akademik Zərifə Əliyevaya həsr olunmuş və ölkəmizin Ukraynadakı səfirliyinin maliyyə yardımı ilə nəfis şəkildə çap edilmiş “Qanadlar. Azərbaycan- mənim taleyim” kitabının təqdimatı da oldu.

Mərasim Zərifə parkında qardaş xalqların dostluğunun rəmzi olan iki tingin əkilməsi ilə başa çatdı.

Zeynal Ağazadə

AZƏRTAC-ın xüsusi müxbiri

Kiyev –İrpen