İQTİSADİYYAT
İpoteka və Kredit Zəmanət Fondunun istiqrazları üzrə faiz və nominal ödənişləri açıqlanıb
Bakı, 22 noyabr, AZƏRTAC
Azərbaycan Respublikasının İpoteka və Kredit Zəmanət Fondu tərəfindən emissiya edilmiş AZ2050008682 İSİN-li istiqrazın emissiya prospektinə əsasən, istiqrazlar üzrə faiz ödənişləri günündə faiz ödənişi ilə yanaşı istiqrazların nominal üzrə qalıq dəyərinin müəyyən bir hissəsinin (ipoteka örtüyünə daxil olan aktivlər üzrə əsas borc ödənişlərinə bərabər hissəsinin) ödənilməsi nəzərdə tutulub.
Bakı Fond Birjasından AZƏRTAC-a bildirilib ki, Azərbaycan Respublikasının İpoteka və Kredit Zəmanət Fondundan daxil olan məlumata əsasən, noyabrın 21-də AZ2050008682 İSİN-li istiqraz üzrə növbəti faiz ödənişi emitent tərəfindən həyata keçirilib. Buna əsasən, noyabrın 21-dən etibarən sözügedən istiqrazların nominal üzrə qalıq məbləği 880,64 manat təşkil edir.
Növbəti faiz ödəniş dövründə 3 faizlik faiz gəliri 880.64 manat məbləği əsasında hesablanacaq. Bakı Fond Birjasında AZ2050008682 SİN-li istiqraz ilə ticarət edərkən istiqrazların baza qiymətinin 880,64 manat olması nəzərə alınmalıdır.