Vaşinqton, 17 mart (AZƏRTAC). İsveçrəli jurnalist Andre Vidmerin Ermənistan-Azərbaycan, Dağlıq Qarabağ münaqişəsi və azərbaycanlı məcburi köçkünlərin həyatı barədə yazdığı “Unudulmuş münaqişə” (Forgotten Conflict) sərlövhəli kitab Los-Ancelesdə təqdim olunmuşdur.

Azərbaycanın Los-Ancelesdəki baş konsulluğunda keçirilən təqdimatda ABŞ Dövlət Departamentinin nümayəndələri, Los-Anceles Vilayətinin rəsmiləri, xarici ölkələrin baş konsulları və digər şəxslər iştirak etmişlər.

Tədbiri açan Azərbaycanın Los-Ancelesdəki baş konsulu Nəsimi Ağayev Ermənistan tərəfindən Azərbaycan torpaqlarının işğalı, bu ərazilərdə həyata keçirilmiş etnik təmizləmə siyasəti və mülki azərbaycanlı əhaliyə qarşı törədilmiş hərbi cinayətlər, eləcə də BMT Təhlükəsizlik Şurasının işğalı pisləyən qətnamələri barədə iştirakçıları məlumatlandırmışdır. İşğal nəticəsində yüz minlərlə azərbaycanlının məcburi köçkünə çevrildiyini bildirən baş konsul onların sosial rifahının yaxşılaşdırılması üçün Azərbaycan hökuməti tərəfindən görülən tədbirlər, xüsusilə çadır şəhərciklərinin bütün şəraitə malik yeni şəhərciklər ilə əvəz edilməsi barədə danışmışdır. Eyni zamanda, diplomat məcburi köçkünlərin yalnız bir arzusunun olduğunu – doğma el-obalarına qayıtmaq istədiklərini, ancaq Ermənistan hökumətinin öz işğalçılıq siyasətini davam etdirərək buna imkan vermədiyini diqqətə çatdırmışdır.

Baş konsul bildirmişdir ki, ənənəvi Qərb jurnalistikasından fərqli olaraq, Andre Vidmer yüksək cəsarət göstərərək Qarabağ həqiqətlərini öz kitabında tam obyektiv şəkildə təqdim etmişdir. Qeyd olunmuşdur ki, jurnalist işğal altındakı ərazilərimizə səfər edərək, orada, xüsusilə Ağdam və Şuşada Ermənistan tərəfindən törədilmiş dağıntıları kitabında əks etdirmiş, eləcə də azərbaycanlı məcburi köçkünlərlə görüşərək, onların həyatı barədə oxucuları məlumatlandırmışdır.

Tədbirdə daha sonra çıxış edən A.Vidmer ilk dəfə Azərbaycanın işğal olunmuş ərazilərinə 2008-ci ildə səfər etdiyini və gördüklərindən dəhşətə gəldiyini bildirmişdir. O, vaxtilə azərbaycanlıların yaşadığı şəhər və kəndlərin işğaldan sonra böyük dağıntılara məruz qaldığını, bəzilərinin isə hətta yerlə-yeksan edildiyini qeyd etmişdir. Bu səpkidə A.Vidmer vaxtilə 50 mindən çox azərbaycanlının yaşadığı Ağdam şəhərinin bu gün artıq mövcud olmadığını və baş vermiş dağıntıların böyük əksəriyyətinin məhz işğaldan sonra həyata keçirildiyini diqqətə çatdırmışdır.

Şuşa şəhərində törədilən dağıntılardan danışan jurnalist bunun nəinki mənəvi bir cinayət, eləcə də ciddi beynəlxalq hüquq pozuntusu olduğunu vurğulamışdır. Cəbhəyanı ərazilərdə yaşayan azərbaycanlı məcburi köçkünlərlə görüşləri barədə danışan A.Vidmer öz evlərini və doğma torpaqlarını itirmiş bu insanların böyük haqsızlığa məruz qaldığını, ancaq beynəlxalq ictimaiyyətin münaqişənin bu faciəvi humanitar aspektinə lazımi diqqət göstərmədiyini qeyd etmişdir. Ermənistan hökumətinin bütün bunları dünya ictimaiyyətindən gizlətmək üçün əlindən gələni etdiyini, ancaq həqiqətin əvvəl-axır üzə çıxdığını deyən A.Vidmer öz kitabı ilə azərbaycanlılara qarşı törədilmiş bu ədalətsizlikləri işıqlandırmaq niyyətində olduğunu bildirmişdir.

Daha sonra Kaliforniya San Dieqo Universitetinin professoru, sabiq ABŞ diplomatı Ceyms Koyl çıxış edərək, Ermənistan-Azərbaycan münaqişəsinin geosiyasi aspektləri barədə iştirakçıları məlumatlandırmışdır.

Təqdimatdan sonra iştirakçılar Ağdam şəhərinin yerlə-yeksan edilməsinə həsr olunmuş “Qafqazın Hiroşiması” başlıqlı foto-sərgi ilə tanış olmuşlar. Sərgidə Ağdamın işğaldan öncəki və işğalsonrası fotoşəkilləri nümayiş etdirilmişdir.

Kaliforniyaya səfəri müddətində A.Vidmer öz kitabını Çəpmən Universitetinin tələbə və professor heyətinə də təqdim etmişdir.

Yusif Babanlı

AZƏRTAC-ın xüsusi müxbiri

Vaşinqton