MƏDƏNİYYƏT
İtaliyada bayramsayağı payız
Bakı, 1 oktyabr, AZƏRTAC
Bu payız İtaliyada turistləri dolğun və rəngarəng festival proqramları və maraqlı hadisələr gözləyir ki, bunların bəziləri haqqında sizə danışmaq istəyirik.
Komakkoda angvil balığı bayramı
Sentyabrın son və oktyabrın ilk iki həftəsinin istirahət günlərində (oktyabrın 5-7-si və 12-14-də) Komakkoda (Ferrarı əyalətinin Emiliya-Romanya vilayətində) angvil balığı bayramı qeyd olunacaq. Bayram vaxtı ziyarətçiləri zəngin proqram - konsertlər, dünyanın məşhur aşpazları tərəfindən kulinariya şoularının təqdimatı gözləyir. Burada təkcə angvil balığından hazırlanmış valehedici yeməklərdən ləzzət almaq deyil, bayramın fəal iştirakçısına da çevrilmək mümkündür. Siz yerli restoranlar üzrə qastronomiya marşrutunuzu yoxlaya bilərsiniz. Burada sizə müasir tərzdə hazırlanmış ənənəvi yeməklər təklif olunacaq, tarixi mərkəzdə və kanal boyunca ərzaq, şirniyyat və yerli ustaların əl işlərinin satıldığı stendləri gəzmək, həmçinin peşəkar bələdçinin müşayiəti ilə qayıqda, velosipeddə, avtobusda və ya piyada Avropada biomüxtəlifliyinə görə unikal yer olan Po çayının deltasındakı parkda maraqlı səyahət etmək fürsəti yaradılacaq.
Şabalıd və ağ göbələk bayramı
Rokkamonfina Kazerta əyalətində (Kampaniya vilayəti) Santa-Kroçe dağının ətəyində yerləşən, gözəl mənzərələri ilə insanı valeh edən kiçik şəhərdir. Hər ilin payızında bu şəhərdə şabalıd və ağ göbələk bayramı qeyd edilir. Oktyabr ayının hər istirahət günü tarixi mərkəzdə şabalıddan hazırlanan müxtəlif təamları (şabalıd mürəbbəsi, siropda şabalıd və s.) dadmaq olar. Burada, həmçinin yüksək dəyər verilən ağ göbələyin (İtaliyada bu göbələk “porçini” adlandırılır) həm təzə, həm də qurudulmuş şəkildə dadına baxmaq mümkündür. Naharda yerli restoranlarda dadlı ənənəvi yeməklər verilir, folklor ansambllarının çıxışları, cürbəcür konsertlər və uşaqlar üçün kukla tamaşaları isə gözəl ab-hava yaradır. Qonaqlara qonşu meşədə gəzmək, şabalıd və göbələk yığmaq, həmçinin 1000 metrə yaxın hündürlükdə yerləşən, İtaliyada böyüklüyünə görə 4-cü krater sayılan sönmüş Rokkomanfina vulkanına qalxmaq fürsəti yaradılır.
“Milan qəsrində ferma” qastronomiya bayramı
Oktyabrın 7-də Milanın lap mərkəzində “Qəsrdə ferma” bayramı keçiriləcək. “Kannone” meydanında Katello Sfortsesko hersoqluğu qəsrinin parkında Lombardiya regionunun istehsalçıları tərəfindən təqdim edilən ənənəvi ərzaq məhsulları olan cürbəcür kolbasa, pendir, süd məhsulları, bal, şirniyyat və düyünün şən və qızğın ticarəti aparılacaq. Yarmarkada balacalar üçün öyrədici və əyləncəli oyunlar təşkil ediləcək. Axşama doğru arzu edənlərə sağlamlıq üçün faydalı olan təbii məhsullar əsasında hazırlanmış ziyafət təqdim olunacaq.
Boltsanoda məhsul bayramı
Boltsanonun “Valterplats” meydanında keçirilən məhsul bayramı Cənubi Tirolda ən populyar tədbirlərdən biridir və hər il minlərlə turist toplayır. Bununla əlaqədar oktyabrın 13-də təşkil ediləcək bayramsayağı fermer bazarı yerli qida məhsulları istehsalçıları ilə tanış olmağa, fermer məhsullarını dadmağa və almağa gözəl fürsətdir.
Lombardiyada cəngavər turniri
Oktyabrın 13-14-də Vijdevanoda (Lombardiya vilayəti) Palo Delle Kontrade cəngavər turniri əsas hadisə olacaq. Həmçinin təmtəraqlı orijinal geyimlərlə bəzənəcək 500-dən çox insan Korteo Storiko tarixi yürüşünü səhnələşdirəcəklər. Yürüş və bütün bayram təbil vurmaları, şeypur səsləri, rəqslər, jonqlyor və akrobatların çıxışları ilə müşayiət olunacaq. Bu günlərdə qədim sənətlər yenidən dirçəlir, ulu nənələrin reseptləri ilə hazırlanan yeməklər təqdim edilir, bu kiçik şəhərə ötən əsrlərin ruhu qayıdır.
Milli şabalıd yarmarkası
Pyemont əyalətinin Kuneo rayonu özünün məhsuldar şabalıd ağacları ilə məşhurdur. İlk dəfə olaraq ötən əsrin əvvəllərində təşkil olunmuş Kuneo şabalıd yarmarkası bu gün də dünyanın hər yerindən yüz minlərlə ziyarətçini cəlb edir. Oktyabrın 19-21-də qonaqlar həm dadlı şabalıd (Aralıq dənizi pəhrizində mühüm inqrediyent) yeyəcək, həm də şabalıdın əsasında hazırlanan cürbəcür kulinar məhsullarını dadacaqlar. Bu böyük yarmarkanın çoxsaylı stendlərində, həmçinin Pyemontun digər səciyyəvi məhsulları və yerli sənətkarların əl işləri nümayiş etdirilir.
Aostada inək döyüşləri
Ante-Sent-Andredə keçirilən “Bataye de Reyn” inək döyüşləri zor və təcavüzsüz, dostluq ruhu hopdurulmuş böyük və şən kəndli bayramıdır. Eyni zamanda, burada Valdostan mətbəxinin ləziz təamlarından dadmağa yaxşı fürsətdir. Belə döyüşlər hər il təşkil olunur. Ən yaxşı “döyüşçülər” yekunda Aosta şəhərindəki “Kroa Noar” meydanında oktyabrın 21-də keçiriləcək regional yarışmada iştirak edir. Onun qalibi “kraliçaların kraliçası” şərəfli adına layiq görülür.
Paduada retro avtomobillərin sərgisi
“Auto e Moto d’Epoca Padova” beynəlxalq sərgisi - İtaliyada retro avtomobillərin və onların ehtiyat hissələrinin vernisajı oktyabrın 25-28-də öz ziyarətçilərini “Ferrari”, “Alfa Romeo”, “Mercedes Benz”, “Ducati” kimi ən tanınmış avtomobil və motosikl markaları ilə sevindirəcək. “Fyera di Padova” sərgi kompleksində (Paduya, Veneto regionu) daha gözəl nüsxələrə rast gəlmək mümkün olacaq ki, bunların da əksəriyyəti avtomobil istehsalı tarixinin fəxridir.
Sərgidə 4000-dən çox avtomobil nümayiş olunacaq. Bu, vernisajı avtomobil istehsalı sahəsində əsas pillə edəcək. Sərgi iri avtomobil və motosikl istehsalı zavodlarının nümayəndələri, aksesuar və ehtiyat hissələri istehsalçıları, sahibkarlar, bərpaçılar, tarix muzeyi işçiləri, tədbir təşkilatçıları və sadəcə Avropanın hər bir yerindən olan avtomobil həvəskarlarının görüşü üçün uğurlu fürsət yaradacaq.
Kolbasa bayramı
Hamıya məlumdur ki, Kremona özünün dünyada ən yaxşı skripka istehsalı ilə məşhurdur. Lakin kolbasa skripkaları geridə qoyur! Bu tarixi mərkəzdə oktyabrın 26-dan 28-dək kolbasaya həsr edilmiş irimiqyaslı mədəni-qastronomik tədbir keçiriləcək. Burada İtaliyanın 40-dan çox kolbasa və kolbasa məmulatı hazırlayan istehsalçısı iştirak edəcək. Paralel olaraq cürbəcür tədbirlər - şoular, dequstasiyalar, kolbasa hazırlama sənətinə və donuzçuluğun incəliklərinə həsr olunan seminarlar keçiriləcək.
Yeri gəlmişkən, salyaminin - İtaliyanın hər vilayətinin qastronomiyasını xarakterizə edən, bir növ onların “lakmus kağızı” olan bu kolbasa məmulatının tərkibi, istehsal prosesi və saxlama üsulları hər regionda müxtəlif cürdür.
Bolonyada caz festivalı
Caz sahəsində möhkəm ənənələri ilə şöhrət qazanan Bolonya şəhərində 10-cu “Bologna Jazz Festival” təşkil olunacaq. Festival Emiliya-Roman regionunda yerləşən Bolonya və Ferraranın teatr, bar, muzey və caz-klublarında oktyabrın 30-dan noyabrın 14-dək keçiriləcək.
Brindizi Montanya şəhərində orta əsrlər günləri
İtaliyanın cənubunda (Potentsa əyaləti, Bazilikata vilayəti) Brindizi Montanya kiçik şəhərində oktyabrın 27-28-də ötən illərin ab-havası canlanacaq. Qədim qəsrin divarları yaxınlığında “döyüşçülər”, “xanımlar” və “kavalyerlər” toplaşacaq. Bu tarixi bayram və səhnə şəhər sakinlərini uzaq 1268-ci ilə aparır. O zaman kral Karl Anjuyski yerli feodal Qvidon De Foresti Brindizi Montanya və Antsi şəhərlərinin Baş cənab tituluna (Primus Domini Brundusii De Montanea et Ansiae) layiq görüb.
“Orta əsrlər günləri” bayramı özünün qədimiliyi canlandıran nağılabənzər atributları- şair və çalğıçıları, təlxəkləri, sehrbazları, orta əsrlərə aid hərbi qoşunları, nümunəvi şahin ovları və dadlı yemək-içməyi ilə ziyarətçilərinin yaddaşlarına həkk olunacaq.
Emil Eyyubov