REGİONLAR
İtaliyalı tələbələr Qəbələnin “Savalan” şərab zavodunda istehsalat təcrübəsi keçirlər
Qəbələ, 26 sentyabr, Şahnəzər Bəşirov, AZƏRTAC
İtaliyanın Udineza Universitetinin tələbələri Qəbələ rayonunda fəaliyyət göstərən “ASPİ-AGRO” MMC-nin “Savalan” üzüm emalı və şərab istehsalı zavodunda elmi istehsalat təcrübəsi keçməyə başlayıblar.
AZƏRTAC xəbər verir ki, İtaliyada üzüm texnologiyası üzrə təhsil alan tələbələr əvvəlcə zavodda “Savalan” brendi ilə istehsal olunan məhsulların keyfiyyəti, saxlanılma şəraiti və şərabların xarici bazara ixracı barədə məlumat əldə ediblər. Bildirilib ki, zavodun 343 hektar sahədə üzüm bağı mövcuddur. Bunun 298 hektarı texniki, 45 hektarı isə süfrə növlərindən olan üzüm bağlarıdır. Şirkətin Qəbələ rayonundakı üzüm bağlarında İtaliya və Fransadan gətirilən 21 növ texniki və 14 növ süfrə üzüm sortları yetişdirilir. Hazırda zavodda “Savalan” brendi ilə 16 çeşiddə şərab istehsal olunur və onların əksəriyyəti xarici ölkələrə ixrac edilir. Zavodun məhsulları bir sıra beynəlxalq şərab və dequstasiya sərgilərində qızıl medal qazanıb.
Tələbə Filippo Montaqner AZƏRTAC-a müsahibəsində bildirib ki, təhsil aldığı üç il ərzində ilk dəfə xarici ölkədə ixtisası üzrə təcrübə keçməyə başlayıb. O, Qəbələdə müasir avadanlıqlarla təchiz edilən “Savalan” şərab zavodunun fəaliyyətini, burada təcrübə keçmək üçün italiyalı tələbələrə yaradılan şəraiti yüksək qiymətləndirib, rayonun təbiətinə, insanların qonaqpərvərliyinə, milli yeməklərimizə heyran qaldığını bildirib. “Biz bilirik ki, bu müəssisə İtaliya şirkətləri və Udineza Universiteti ilə sıx əməkdaşlıq edir. “Savalan” şərabları İtaliyada keçirilən sərgilərdə nümayiş olunur. İtaliyadan gətirilmiş avadanlıqların quraşdırıldığı bu zavodda 7 ildir ki, texnoloq kimi çalışan italiyalı mütəxəssislər Daniel Dandrea və Elisa Vagnoni bizim burada yaxşı təcrübə qazanmağımıza kömək edir. Zavodun bir neçə yerli işçisi müxtəlif vaxtlarda İtaliyada təcrübə keçərkən və italiyalı mütəxəssislərlə birgə işləyərək bizim dildə danışmağı öyrənib, ona görə də biz bu gün burada onlarla ünsiyyət qurmaqda çətinlik çəkmirik”.
Digər tələbə Allesandro Sant isə İtaliya şərablarının dünyada məşhur olmasına baxmayaraq, qədim şərabçılıq ənənələrinə malik Azərbaycanda da istehsal edilən “Savalan” şərablarını çox bəyəndiyini, onun keyfiyyətinin və istehsal texnologiyasının tam fərqləndiyini və heç də Avropa şərablarından geri qalmadığını bildirib. “Burada təcrübə keçməyimiz, yaxşı qidalanmağımız, istirahətimiz üçün hər cür şərait yaradılıb. İtaliyada belə böyük üzüm plantasiyası olan şərab zavodları çox azdır. Bizim zavodların hər birində 5-6 çeşiddə şərab istehsal olunursa, İtaliya texnologiyasının tətbiq edildiyi “Savalan” şərab zavodunda 16 çeşiddə məhsul istehsal edilir və xarici bazarlara çıxarılır”, - deyə qeyd edib.
İtaliyalı tələbələr “Savalan” üzüm emalı və şərab istehsalı zavodunda 3 aylıq elmi istehsalat təcrübəsi zamanı üzüm bağlarına qulluq edəcək, istehsal prosesi və laboratoriya analizləri ilə yaxından tanış olacaqlar.