REGİONLAR
Kartof sahələrində yığım prosesini izləmək üçün mediatur təşkil olunub VİDEO
Qazax, 28 iyul, Ruslan Novruzoğlu, AZƏRTAC
İqtisadi Zonaların İnkişafı Agentliyinin təşkilatçılığı ilə kartof yığımına başlanılmasına dair “Buta-Group” MMC-nin Qazaxdakı əmtəəlik kartof təsərrüfatı sahəsinə və İsmayıllıdakı aqroparkına media nümayəndələrinin tanışlıq səfəri təşkil olunub.
AZƏRTAC xəbər verir ki, artıq bir neçə gündür “Buta-Group” MMC-nin Qazax rayonunun İkinci Şıxlı kəndi ərazisində kütləvi əmtəəlik kartofun yığımı aparılır. İqtisadi Zonaların İnkişafı Agentliyinin təşkilatçılığı ilə media nümayəndələri də bu prosesi izləyib. Müasir texnikalar vasitəsilə, həmçinin əl əməyindən də istifadə etməklə sahələrdən kartofun yığımı həyata keçirilir. Günəmuzd çalışanlar da buradan gündəlik qazanclarını əldə edirlər. Bu da işlərin sürətlə aparılmasını təmin edir.
Baş aqronom Şaban Maxsudovun sözlərinə görə, yaz aylarında havaların isti keçməsi kartofçuluğa təsir edir, lakin sonda bol məhsul əldə olunur.
“Son dövrlər ölkəmizdə kartofun becərilməsi ilə bağlı güclü dinamika müşahidə olunur. Kartof taxıl, qarğıdalı və çəltikdən sonra dünyada dördüncü ən çox becərilən bitkidir. Bu bitki Azərbaycanda da hektarlarla ərazilərdə becərilməyə başlanıb. Bizim də gələcək planlamamızda sahələri genişləndirmək var. Belə ki, toxumluq sahəmizlə birlikdə 260 hektar sahəni becərmişiksə, gələn il bunu bir qədər də artıq sahədə becərməyi planlayırıq” – deyə baş aqronom bildirib.
Sahələr dəmyəlik relyefə malik olsa da, burada suvarma sistemlərinin qurulması, müasir aqrotexniki qulluğun göstərilməsi bol məhsul götürməyə imkan verib. Torpaqdan səmərəli istifadə məqsədilə kartof yığıldıqdan sonra dərhal şumlamanın aparılması və yerində taxıl əkilməsi planlaşdırılıb. Məhsulun sahədən daşınmasında, anbarlara aparılmasında, qablaşdırılmasında da heç bir problem yaşanmır.
Aqroparkda əsasən Almaniyadan gətirilmiş bernina, colomba, çelencer kartof toxumları əkilib. 42 nəfərin daimi, 260 nəfərin isə mövsümi işlə təmin edildiyi aqroparkda 11 ədəd texnika və 37 ədəd aqreqat mövcuddur. İqtisadiyyat Nazirliyi tərəfindən verilmiş investisiya təşviqi sənədi sayəsində aqropark texnika, texnoloji avadanlıqlar və qurğuların idxalına görə 0.39 milyon manata qənaət edib. İndiyədək aqroparka 10 milyon manatdan çox investisiya yatırılıb.
İsmayıllıda İqtisadi Zonaların İnkişafı Agentliyinin idarəçiliyində olan “Buta-Group” MMC-nin rayonun Kürdmaşı kəndində yerləşən aqroparkının ümumi ərazisi 224 hektardır və aqropark kartof toxumçuluğu üzrə ixtisaslaşıb. Aqroparkda gücü saatda 40 ton olan kartofun təmizlənməsi, çeşidlənməsi və qablaşdırılması xətti qurulub, ümumi tutumu 9700 kubmetr olan soyuducu anbar kompleksi yaradılıb. Ötən il aqroparkda 7 min ton kartof, 150 ton arpa və buğda istehsal olunubsa, bu il 283 ton buğda və 257 ton arpa məhsulu əldə edilib. Arpa üzrə orta məhsuldarlıq 3,5 ton, buğda üzrə isə 6 ton olub. Bu il aqroparkın 42 hektarında kartof toxumu əkilib. Yaxın günlərdə məhsulun yığımına başlanılacaq və ümumi olaraq 1600 ton kartofun əldə edilməsi planlaşdırılır.
Qeyd edək ki, hazırda respublikanın 32 rayonu üzrə 240 min hektar ərazidə ümumi layihə dəyəri 2,4 milyard manat olan 51 aqroparkın yaradılması üzrə işlər davam etdirilir. Aqroparkların 34-ü bitkiçilik, 14-ü bitkiçilik və heyvandarlıq, 1-i heyvandarlıq, 2-si isə emal sənayesi üzrə ixtisaslaşıb. Sözügedən aqroparklardan 44-ü artıq fəaliyyətə başlayıb, digərlərində isə layihələndirmə və ya tikinti işləri aparılır. Aqroparkların yaradılması kənd təsərrüfatı sahəsində elmi yanaşma və qabaqcıl texnologiyanın tətbiqi, məhsuldarlığın artırılması və maya dəyərinin aşağı salınması, ölkədə ərzaq təhlükəsizliyinin təmin edilməsi, idxaldan asılılıq səviyyəsinin azaldılması və ixrac potensialının artırılması ilə yanaşı, regionların tarazlı inkişafının və əhalinin məşğulluq səviyyəsinin yüksəldilməsinə mühüm töhfə verir.
Aqroparkların yaradılması ölkədə yeni iş yerlərinin açılması istiqamətində atılan çox önəmli addımlardan biridir. Hazırda aqroparklarda ümumi olaraq 4491 nəfər daimi, 6303 nəfər isə mövsümi işlə təmin olunub, gələcəkdə əlavə 5000-dən çox iş yerinin yaradılması nəzərdə tutulur.