REGİONLAR
Keyfiyyətli təhsil və yüksək ixtisaslı kadr hazırlığı qarşıda duran əsas vəzifələrdəndir
Gəncə, 11 sentyabr, Rauf Hacıyev, AZƏRTAC
2017-2018-ci dərs ilinin yekunları və yeni tədris ilində qarşıda duran vəzifələr Gəncə müəllimlərinin ənənəvi sentyabr konfransında müzakirə edilib.
Konfransdan öncə təhsil işçiləri ulu öndər Heydər Əliyevin abidəsini ziyarət edib, önünə gül dəstələri qoyublar.
AZƏRTAC-ın bölgə müxbiri xəbər verir ki, Gəncə Şəhər Təhsil İdarəsinin müdiri Zakir Hüseynov konfransda 2017-2018-ci tədris ilində görülən işlərə dair hesabat məruzəsi ilə çıxış edib. Bildirilib ki, bu ildən etibarən hazırlıq qruplarına uşaqların qəbulu elektron qaydada aparılır. Bu tədris ilində 2013-cü ildə anadan olmuş 3 min 749 uşağın 75 faizi, yəni 2 min 812 nəfəri 141 hazırlıq qrupuna qəbul ediləcək. Bu günədək Gəncə Şəhər Təhsil İdarəsinin tabeliyində fəaliyyət göstərən ümumtəhsil məktəblərinin 183 birinci sinfinə 4 min 200 şagird qəbul olunub. Hazırda 1-ci siniflərə elektron qaydada qəbul davam etdirilir.
Bu il ali məktəblərə qəbul olanların sayı ötən ilə nisbətən daha yüksəkdir. Belə ki, ali məktəblərə qəbul olanların 264 nəfəri 500-dən yuxarı, 90 nəfəri 600-dən yuxarı və 1 nəfər 700 bal toplayıb. Dövlət İmtahan Mərkəzinin statistik məlumatına əsasən, 2017-2018-ci tədris ilinin məzunlarından 1991 nəfəri ali məktəblərə sənəd təqdim edib. Onlardan 1048 nəfəri respublikanın ali məktəblərinə, 61 nəfəri isə xüsusi təyinatlı ali təhsil müəssisələrinə qəbul olunub. Bundan başqa, 195 abituriyent 11 illik təhsil bazasından orta ixtisas təhsil müəssisələrinə ali və orta ixtisas məktəblərinə qəbul olunub. İyirmidən çox məzun xarici ölkələrin ali məktəblərində təhsillərini davam etdirəcəklər.
Təhsil nazirinin müavini Məhəbbət Vəliyeva çıxış edərək təhsil işçilərini yeni tədris ili münasibətilə təbrik edib, onlara çətin və şərəfli peşələrində uğurlar arzulayıb. Nazir müavini həllivacib məsələlərlə bağlı fikirlərini bildirərək, yeni dərs ilində təhsil ictimaiyyətinin qarşısında duran əsas vəzifələri diqqətə çatdırıb. Məhəbbət Vəliyeva ölkəmizin təhsil sisteminin qarşısında duran əsas vəzifələrdən birinin keyfiyyətli təhsil və yüksək ixtisaslı kadr hazırlığının olduğunu bildirib.
Nazir müavini 2017-2018-ci dərs ilinin “Ümumi təhsildə keyfiyyət ili” elan edilməsinin bu vəzifənin uğurla həll olunmasında mühüm rol oynadığını vurğulayıb.
Gəncə Şəhər İcra Hakimiyyətinin başçısı Niyazi Bayramov konfransda çıxış edərək, son illər təhsildə qazanılan uğurları dövlət qayğısının nəticəsi kimi dəyərləndirib. Bildirib ki, Gəncədə fəaliyyət göstərən məktəblərdən 34-ü tam təmirlidir. 1076 şagird yerlik 7 nömrəli tam orta məktəbin binasında isə əsaslı təmir işləri davam etdirilir. Gəncədə təhsilin inkişafı, onun maddi-texniki bazasının möhkəmləndirilməsi istiqamətində həyata keçirilən və keçirilməsi nəzərdə tutulan işlərdən danışan Niyazi Bayramov kollektivə tövsiyələrini verib və onlara yeni dərs ilində uğurlar arzulayıb.
Çıxışlardan sonra bu il qəbul imtahanında 700 bal toplayan İsrafil Məmmədov adına 27 nömrəli məktəb-liseyin məzunu Selcan Məmmədliyə və 695 bal toplayan 30 nömrəli tam orta məktəbin məzunu Altun Balayevə noutbuk hədiyyə edilib.