Bakı, 20 yanvar, AZƏRTAC

Fransa prezidentliyinə namizədlərin Azərbaycan ərazilərinə qanunsuz səfəri azmış kimi, bu cinayət xarakterli əmələ ölkənin xarici işlər naziri tərəfindən müəyyən mənada haqq qazandırılması, ilk növbədə, böyük diplomatik səhvdir. Bu, eyni zamanda, Fransa-Azərbaycan münasibətlərinə mənfi təsir edir.

Prezident İlham Əliyevin də haqlı olaraq bəyan etdiyi kimi, əgər prezidentliyə namizəd Valeri Pekresin son qanunsuz səfərindən xəbərimiz olsaydı, biz onları geri buraxmayacaqdıq. Dövlət başçımızın bu mövqeyi tamamilə məntiqli və hüquqi əsaslıdır. Çünki söhbət Azərbaycan ərazilərinə qanunsuz səfərdən gedir. Azərbaycanın suverenliyinin və ərazi bütövlüyünün təməl prinsiplərinə bu cür etinasız münasibət heç bir halda qəbul edilə bilməz.

Bu fikirləri AZƏRTAC-a açıqlamasında Milli Məclisin deputatı Könül Nurullayeva söyləyib.

Deputatın sözlərinə görə, hər halda, Fransa ərazisinə də bu cür qanunsuz səfərlər baş tutsaydı, rəsmi Paris məsələyə eyni mövqedən yanaşacaqdı. Lakin Fransanın Avropa və xarici işlər üzrə naziri Jan İv Lö Drian Milli Assambleyada beynəlxalq hüquqa zidd mövqe ortaya qoyaraq, əslində, bəzi hökumət və bir sıra parlament nümayəndələrinin cinayət xarakterli əməllərini ört-basdır etmiş oldu. Milli Assambleyanın Respublikaçılar Partiyasından olan üzvü Erik Siotti həddini aşaraq təhqirə cəhd etdiyi üçün yerində oturdulmalı idi. Bu həyasızlığın qarşısında susmaq ona haqq qazandırmaq anlamına gəlir. Bu tərzdə yanaşma diplomatiya ənənələrilə ziddiyyət təşkil edir.

"Ümumiyyətlə, fransalı namizədlərin Ermənistana səfəri və ya məntiqsiz, revanşist açıqlamaları başadüşülən deyil. Bu şəxslər Fransanın daxili işləri və problemləri ilə bağlı açıqlamalar verməkdənsə, öz seçki şüarlarını nədənsə erməniləri maraqlandıran məsələlər üzərində qururlar. Sanki seçkilər Ermənistanda keçiriləcək. Aydındır ki, burada əsas məqsəd erməni seçicilərin səsini qazanmaqdır. Amma məsələ burasındadır ki, Fransada yalnız ermənilər yaşamır. Bu ölkədə müsəlmanlar da yaşayır. Fransada antisemitizm, islamofob fikirlərin yayılması olduqca ağır nəticələrə gətirib çıxara bilər”,- deyə K.Nurullayeva vurğulayıb.

Fransalı namizədlərin bu yanaşmasının birbaşa Azərbaycan-Fransa münasibətlərini korlamağa hesablandığını diqqətə çatdıran deputat bildirib ki, Fransa növbəti dəfə ATƏT-in Minsk qrupunun həmsədri statusuna zidd addım atmaqda davam edir. Bu isə Fransanın artıq bu və ya digər şəkildə bölgədə sülh yaratma missiyasında iştirakındakı səmimiliyi şübhə altına alır. Təsadüfi deyil ki, Fransa hökuməti 44 günlük müharibə və ondan sonrakı dövrdə də həmsədrlik missiyasına zidd olaraq, işğalçı Ermənistanın tərəfində olduğunu nümayiş etdirdi. Təəssüf ki, bu gün də eyni yanaşmanı davam etdirir.

Milli Məclisin deputatı Fransa Parlament üzvlərini beynəlxalq qanunları kobud şəkildə pozan cinayət xarakterli bu cür əməllərə son qoymağa çağırırıq. Çünki bu, açıq şəkildə Qafqaz regionunun sabitliyini və inkişafını pozmağa yönəlmiş təxribatçı addımdır.