CƏMİYYƏT
Könüllü: 2020-ci ilin “Könüllülər İli” elan olunması Azərbaycan gəncliyinə verilən dəyərdir
Bakı, 20 fevral, Səadət Hakıyeva, AZƏRTAC
Azərbaycan Dövlət İqtisad Universitetinin birinci kursunda oxuduğum zaman tələbələrdən ibarət “Birlik” xeyriyyə klubu fəaliyyətə başladı. İnsanlara yardım etməyi çox sevirdim. Bu səbəbdən kluba üzv oldum. Hazırda həmin klubda sədrin müavini kimi fəaliyyət göstərirəm. Düşünürəm ki, ehtiyacı olanlara təmənnasız kömək etmək, onları sevindirmək hər birimizin insanlıq borcudur. Düşünürəm ki, insanın həyatının mənası başqalarına lazımlı olmaqdır. Vətənə, xalqa xidmət etmək isə hər bir insanın vətəndaşlıq borcudur.
Bu sözləri AZƏRTAC-a müsahibəsində könüllü Asya Mehdiyeva söyləyib.
Xeyriyyəçiliklə bağlı tədbirlərdə fəal iştirak etdiyini bildirən A.Mehdiyeva deyib: “Körpələr evinin uşaqlarını sevindirməkdən gözəl nə ola bilər? Ata-ana qayğısından məhrum körpələr üçün oyuncaq yığmağa çox vaxt sərf etmirsən, amma onların gözlərindəki işığı görəndə, həyatın anlamını daha aydın hiss edirsən. Bu da insanı çox sevindirir”.
A.Mehdiyeva ötən ildən Azərbaycan Gimnastika Federasiyasının Təşkilat Komitəsinin könüllülər proqramına qoşulub. O, könüllü kimi Milli Gimnastika Arenasında keçirilən yarışların təşkilində iştirak edir. 2015-ci ildən alpinizm idman növü ilə məşğul olan Asya Mehdiyevanı AGF-yə gətirən elə idmana olan sevgisi olub. O deyib: “AGF-də könüllülər üçün çox yaxşı şərait yaradılıb. Könüllülük fəaliyyəti insanın dünyagörüşünün formalaşmasında mühüm rol oynayır. Burada yeni dostlar qazanırsan. İş təcrübəsi əldə edirsən, insanlarla işləməyi öyrənirsən. Könüllü olmaq həm də, gənclərə karyera qurmaqda ən gözəl yardımçıdır”.
Ötən il gimnastikadan başqa, Formula 1 yarışlarında da iştirak etdiyini deyən A.Mehdiyeva bildirib ki, “Azeristudent” və “Studynetgroup”un təşkil etdiyi təhsil sərgilərində fəal iştirak edib: “Könüllülük hərəkatı bir həyat tərzi kimi peşəkarlıq, sədaqət tələb edən bir fəaliyyətdir. Beynəlxalq standartlarla işləyən ciddi şirkətlərin əksəriyyətində isə qəbul prosesində könüllülük təcrübəsinə böyük əhəmiyyət verilir və qiymətləndirilir. Könüllü layihələr həm də yaradıcılıq üçün böyük imkanlar açır. Həmyaşıdlarıma deyərdim ki, özünüzü ifadə etməyin yollarını axtarırsınızsa, könüllü olmalısınız”.
Tələbə bildirib ki, Azərbaycan Respublikasının Prezidenti İlham Əliyev tərəfindən 2020-ci ilin “Könüllülər İli” elan olunması bütün gənclərin ürəyincədir. Dövlət başçısının sərəncamı Azərbaycan gəncliyinə verilən dəyərin ifadəsidir.