REGİONLAR


Kür Təcrübə Nərə Balıqartırma zavodunda yenidənqurma işləri yekunlaşmaq üzrədir VİDEO

Neftçala, 2 iyul, İsmayıl Cəfərli, AZƏRTAC 

Neftçalada yenidən qurulan balıqartırma zavodunda təmir tikinti işləri yekunlaşmaq üzrədir. Burada, həmçinin müasir standartlara cavab verən yem anbarı, qaraj və emalatxana, personal üçün nəzərdə tutulmuş yeməkxana, həmçinin qonaq evi binası inşa edilir. Ümumilikdə 21 tikilidən ibarət, 60 hektar ərazini əhatə edən zavodun ərazisində açıq havada hər biri 1 hektar olmaqla 35 nohur da yaradılıb.

AZƏRTAC xəbər verir ki, Neftçalanın Yenikənd kəndində 20 ildən çoxdur fəaliyyətini tamamilə dayandıran Kür Təcrübə Nərə Balıqartırma zavodunda yenidənqurma işlərinə başlanılıb. 1954-cü ildə inşa olunan zavod hazırda ən müasir texnoloji yeniliklər tətbiq edilməklə əsaslı şəkildə təmir olunur. Artıq zavodun ərazisində inzibati və yardımçı tikililərdə inşaat işləri demək olar ki, yekunlaşmaq üzrədir. Bu işlərlə paralel olaraq istehsal sahələrində, həmçinin qapalı su sistemləri çevrəsində də avadanlıqlar quraşdırılır. Məqsəd həm də Neftçala rayonunda balıqçılıq sənayesini yenidən bərpa etmək, balıq və kürü istehsalını artırıb dünya bazarlarına çıxarmaqdır. Zavodun köhnə tikililəri muzey kimi qorunub saxlanılacaq. Bununla həm də müəssisə sənaye turizmi istiqamətində də fəaliyyət göstərəcək.

Kür Təcrübə Nərə Balıqartırma zavodunun direktoru Elşən Məcidov görülən işlərlə bağlı deyib: “Qapalı su sistemləri çevrəsinin quraşdırılmasında əsas məqsəd körpə nərə cinsli balıqların həmin filtirasiya olunmuş suda və müvafiq temperaturda daha yaxşı inkişaf etdirilməsidir. 1954-cü ildə inşa edilmiş köhnə zavodun binasına isə gələcəkdə tələbələrin, məktəblilərin, həmçinin təbiətsevərlərin ekskursiyalarının təşkili planlaşdırılır. On görə ki, gələcək nəsillər bu yerdə ilk dəfə bu prosesin necə aparıldığını bilməlidirlər”.

Müasir tələblərə uyğun qurulan Kür Təcrübə Nərə Balıqartırma müəssisəsində nərə cinsli balıqların kürüsündən körpə balıqlar alınacaq. Filtirasiya olunmuş suda yetişdirilən balıqların bir hissəsi ekoloji layihə olaraq Kür çayı və Xəzər dənizinə buraxılacaq. Məqsəd bioloji müxtəlifliyi qorumaq, bərpa etmək, adı çəkilən su hövzələrində nərə cinsli balıqların nəsli kəsilmə təhlükəsini aradan qaldırmaqdır. Yetişdirilən nərə cinsli balıq körpələrinin bir hissəsi böyüdülərək əmtəəlik məqsədilə istifadə ediləcək. İstehsal olunan balıq əti və kürü təbii su hövzələrindən ovlanan balıqlardan alınan məhsullardan seçilməyəcək. Bunun üçün müəssisədən 14 km məsafədə, rayonun Şirvanlı kəndi ərazisində Xəzər dənizinə yaxın 8 hektar sahədə yardımçı təsərrüfat da yaradılıb. Burada diametrləri 19, 9 və 6 olan 64 dairəvi hovuz tikilib və dəniz suyu ilə doldurulub. Dəniz suyu hovuzlara təbii yolla doldurulur. Bunun üçün qurudan dənizin 800 metr dərinliyinə borular çəkilib.

“Təsərrüfatımızda nərə cinslilərdən nərə, bölgə, uzunburun, kələmo və bu tip nərə cinsli balıqların artırılması planlaşdırılır. Ümumilikdə təsərrüfat tam gücü ilə işlədiyi zaman 180 ton nərə balığı əti, 10 ton qara kürü istehsal edilməsi planlaşdırılır”,-deyə Elşən Məcidov bildirib.

Bu il təsərrüfata gətirilən törədici fond balıqlardan artıq 20 min ədədə yaxın kiçik balıq sürfələri alınıb. Həmin balıqların çəkisi 100 qram olduğunda Şirvanlıda yerləşən hovuzlara buraxılacaq. Əldə edilən məhsulun bir qismi yerli tələbatın ödənilməsi üçün ayrılacaq, qalanı isə ixrac ediləcək.

Qeyd edək ki, zavodun tikintisinə 2018-ci ilin oktyabr ayında başlanılıb və yaxın müddətdə istifadəyə verilməsi gözlənilir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.