Noyabrın 5-də Milli Məclisin iqtisadi siyasət, aqrar siyasət, sosial siyasət, insan hüquqları məsələləri, təbii ehtiyatlar, energetika və ekologiya məsələləri daimi komissiyalarının birgə iclasında “Azərbaycan Respublikasının 2004-cü il dövlət büdcəsi haqqında” qanun layihəsi müzakirə olunmuşdur.

İqtisadi siyasət daimi komissiyasının sədri Səttar Səfərov demişdir ki, Azərbaycan Prezidenti İlham Əliyevin seçkiqabağı platformasında irəli sürülmüş tezislər 2004-cü ilin dövlət büdcəsinin əsas xəttinin müəyyən olunmasında mühüm rol oynamışdır. Əvvəlki illərdən fərqli olaraq, 2004-cü ilin dövlət büdcəsində gəlirlər və xərclər tam aydınlıqla göstərilmiş, eləcə də qarşıdan gələn üç ilin proqnozları da layihədə öz əksini tapmışdır.

Sonra maliyyə naziri Əvəz Ələkbərov büdcə layihəsi ilə bağlı məlumat vermişdir. O demişdir ki, 2003-cü ilin 9 ayı ərzində ÜDM 25,7 trilyon manata çatmışdır. Orta aylıq əmək haqqı 377 min manat, inflyasiyanın səviyyəsi 2 faiz olmuşdur. İqtisadiyyatdakı müsbət meyllər dövlət büdcəsinin icrasında da özünü göstərmişdir. 2003-cü ilin dövlət büdcəsinin mədaxil proqnozu 103,3 faiz və ya 137,2 milyard manat çox icra edilmişdir. Cari ilin 9 ayında dövlət büdcəsinin xərcləri 4 trilyon 411 milyard manat proqnoza qarşı 4 trilyon 163 milyard manat icra olunmuşdur.

Daxil olan vəsaitin 43,8 faizi və yaxud 1 trilyon 825,1 milyard manatı sosialyönümlü tədbirlərə yönəldilmişdir. 2004-cü ilin dövlət büdcəsinin proqnozları hazırlanarkən bu göstəricilər nəzərə alınmışdır. Layihə Azərbaycan Respublikasının ortamüddətli maliyyə siyasətinin tərkib hissəsi olmaqla, ölkənin sosial-iqtisadi konsepsiyasına və proqnoz göstəricilərinə, 2003-2005-ci illər üçün yoxsulluğun azaldılması və iqtisadi inkişaf üzrə dövlət proqramına uyğun olaraq hazırlanmışdır. Büdcə sistemi haqqında Qanuna əsasən, 2004-cü il üçün dövlət büdcəsinin zərfinə dövlət borcları, prioritet xərclər, növbəti büdcə ili və sonrakı üç il üçün icmal büdcənin proqnozu əlavə edilmişdir.

Azərbaycan Respublikasının 2004-cü il dövlət büdcəsinin gəlirləri ÜDM-in 18,7 faizi həcmində, mütləq ifadədə 6 trilyon 957 milyard manat olacaqdır ki, bu da 2003-cü illə müqayisədə 865 milyard manat çoxdur. Büdcə gəlirlərinin strukturunda vergi orqanlarının xüsusi çəkisi 66,6 faiz, gömrük orqanlarının 16,1 faiz, sair daxilolmalar isə 17,3 faiz nəzərdə tutulmuşdur.

2004-cü il üçün icmal büdcəsinin gəlirləri 9 trilyon 965,6 milyard manat olmaqla ÜDM-in 26,7 faizini təşkil edəcəkdir. Dövlət büdcəsi kəsirinin yuxarı həddi 315000 milyon manat məbləğində müəyyən edilmişdir. 2004-cü ilin dövlət büdcəsinin xərcləri 7 trilyon 272 milyard manat proqnozlaşdırılmışdır ki, bu da 2003-cü ilə nisbətən 849 milyard manat çoxdur. Sosialyönümlü xərclər büdcənin 60 faizini təşkil edəcəkdir.

Müzakirələr zamanı komissiya sədrləri, deputatlar layihə ilə bağlı fikirlərini

bildirmişlər. Layihənin Milli Məclisin müzakirəsinə çıxarılması qərara alınmışdır.

Müzakirələrdə Milli Məclis sədrinin birinci müavini Arif Rəhimzadə, sədrin

müavini Gövhər Baxşəliyeva, iqtisadi inkişaf, rabitə, nəqliyyat və digər

nazirliklərin, komitələrin rəhbərləri iştirak etmişlər.

X X X

2004-cü ilin dövlət büdcəsi haqqında qanun layihəsi Milli Məclisin regional məsələlər daimi komissiyasının noyabrın 5-də keçirilən iclasında da müzakirə olunmuşdur. Komissiya üzvləri layihənin parlamentin müzakirəsinə çıxarılmasını tövsiyə etmişlər.