CƏMİYYƏT
Məktəb səhiyyəsi üzrə milli sistemlər çərçivəsində göstərilən xidmətlər şagirdlərin davamiyyətinə müsbət təsir göstərir
Bakı, 4 sentyabr, AZƏRTAC
Səhiyyə Nazirliyinin əməkdaşları “Ümumdünya Səhiyyə Təşkilatının Avropa bölgəsi üzrə ölkələrdə milli məktəb səhiyyə sistemlərinin yaxşılaşdırılması məqsədilə keçirilən araşdırmalar” mövzusunda virtual formatında keçirilən potensialın artırılmasına dair seminarda iştirak ediblər.
Səhiyyə Nazirliyinin mətbuat xidmətindən AZƏRTAC-a bildiriblər ki, “Ümumdünya Səhiyyə Təşkilatının Avropa bölgəsi üzrə ölkələrdə milli məktəb səhiyyə sistemlərinin yaxşılaşdırılması məqsədilə keçirilən araşdırmalar”ın tərtib olunması uşaq və gənclərə göstərilən tibbi xidmətlərin keyfiyyətinin artırılması və həmin xidmətlərin BMT-nin “Uşaq Konvensiyasına” uyğun olaraq göstərilməsinə yönəlmiş cari beynəlxalq prosesin bir hissəsidir.
Ölkələrin milli koordinatorlarının hazırlanması üzrə növbəti seminar bu gün, sentyabrın 4-də keçirilib.
Seminar çərçivəsində hər ölkə üzrə seçilmiş milli koordinator araşdırma ilə tanış olub, araşdırmanın aparılması üzrə konsepsiya və metodologiyanın müəyyənləşdirilməsinə dair öz töhfələrini verib. Eyni zamanda, müxtəlif maraqlı tərəflərdən məlumatların toplanılması prosesini daxil etməklə araşdırmanın aparılması və tətbiqi üçün zəruri olan məqsəd və funksiyaların dəqiqləşdirilmə metodları ətrafında geniş müzakirələr aparılıb.
Seminarda Azərbaycan, Rusiya Federasiyası, Belarus, Qazaxıstan, Qırğızıstan, Moldova, Tacikistan və Özbəkistandan olan nümayəndələr iştirak ediblər. Bundan başqa, seminara Rusiya Federasiyası Səhiyyə Nazirliyi, “Uşaqların sağlamlığı üzrə milli tibbi tədqiqat mərkəzi” Federal Dövlət Muxtar Təşkilatı, ÜST-nin Avropa Regional Ofisi, SHE şəbəkəsi katibliyinin əməkdaşları da qatılıb.
Qeyd edək ki, səhiyyə təhsil ilə sıx bağlıdır. Yaxşı təhsil həyat keyfiyyətini artırır, möhkəm səhhət isə yaxşı təhsil almaq üçün imkanları genişləndirir. Məhz buna görə ÜST-nin Avropa bölgəsindəki ölkələrdə xüsusi yaradılmış məktəb səhiyyəsi üzrə milli sistemlər bütün təhsil qurumlarında uşaq, yeniyetmə və gənclərin sağlamlığını gücləndirmə və profilaktikası üzrə xidmətləri eləcə də sağlam davranışı təmin edir, onların inkişafını müşahidə etmək vasitəsilə sağlamlığın və təhsilin keyfiyyətini artırır.
Məktəb səhiyyəsi üzrə milli sistemlər çərçivəsində göstərilən xidmətlər tibbi problemləri həll etmək və sağlam təhsil mühitini formalaşdırmaqla yanaşı, həm də şagirdlərin davamiyyətinə və müvəffəq təhsilinə müsbət təsir göstərir. Eyni zamanda, həmin sistemlər uşaq və gənclərin inkişaf etmələrini təmin edib, sağlamlıqlarının qorunması sahəsində qeyri-bərabərliyin artmasının qarşısını alır. Bundan əlavə, məktəb səhiyyəsi üzrə milli sistemlər təhsil ocağı, səhiyyə və sosial qurumlarla sıx əməkdaşlıq edərək, sağlamlığın sosial determinantlar probleminin həllolunma prosesində bağlayıcı rol oynayır.
Məktəb səhiyyəsi üzrə milli sistemlərin işini təkmilləşdirmək üçün davamlı olaraq onların fəaliyyətinin monitorinq və qiymətləndirilməsi aparılır. Rusiya Federasiyasının dəstəyi ilə Şərqi Avropa və MDB-nin 8-9 ölkəsində növbəti genişmiqyaslı qiymətləndirmə araşdırmasının keçirilməsi 2020–2021-ci illərdə həyata keçiriləcək.