ELM VƏ TƏHSİL
Məktəblilər arasında keçirilən “STEM plyus” bilik olimpiadasının qalibləri mükafatlandırılıb
Bakı, 23 may AZƏRTAC
Qərbi Kaspi Universitetinin təşkilatçılığı ilə məktəblilər arasında “STEM plyus” bilik olimpiadası keçirilib.
Universitetdən AZƏRTAC-a bildirilib ki, science (elm), technology (texnologiya), engineering (mühəndislik), math (riyaziyyat) sözlərinin baş hərflərinin birləşməsindən ibarət olan STEM texnologiya və mühəndislik sahələrinin gündəlik həyatda birgə tətbiqi deməkdir. Suallar texniki sahə və şagirdlərin dünyagörüşü ilə əlaqəli olduğu üçün yarışma “STEM plyus” adlandırılıb.
Əvvəlcə şagirdlərə universitet barədə məlumat verilib. Bildirilib ki, Qərbi Kaspi Universiteti məktəblilərin iştirakı ilə müxtəlif məzmunlu layihə və tədbirlər həyata keçirir. Tədrisin keyfiyyətinin və praktik yönümünün gücləndirilməsinə yönəlmiş tədbirlər, eyni zamanda, infrastruktur layihələri həyata keçirən universitetdə bu tədris ilindən mühəndislik ixtisasları üzrə kadr hazırlığı aparılır. Universitetdə bu məqsədlə Yüksək Texnologiyalar və İnnovativ Mühəndislik Məktəbi, Yüksək Texnologiyalar Parkı (Texnopark) fəaliyyət göstərir. Texnoparkda biznes-inkubasiya mərkəzi, texnoloji transfer ofisi, mexatronika və robototexnika laboratoriyası, ideya bankı və başqa mərkəzlər var. Texnoparkdan sərbəst istifadə imkanı yaradılıb. İdeyası olan tələbə və şagirdlər Texnoparka müraciət edərək dəstək ala bilirlər. Texnopark orta məktəb şagirdlərini müntəzəm olaraq müxtəlif layihələrə, praktik çalışmalara cəlb edir və onlarda mühəndislik sahələrinə olan marağı artırmaq, eləcə də bacarıq və qabiliyyətləri inkişaf etdirmək üçün səy göstərir. Texnoparkda işlənən layihələrdən biri bu günlərdə Türkiyədə keçirilən beynəlxalq müsabiqədə finala vəsiqə qazanaraq təltif edilib.
Məktəblilərdən ibarət 50-dək komandanın qatıldığı yarış olduqca maraqlı və gərgin mübarizə şəraitində keçib. Şagirdlər mühəndislik, texnologiya, riyaziyyat və elmin müxtəlif sahələri ilə bağlı sualları cavablandırıblar.
Yekunda Bakı şəhər 280 nömrəli orta məktəb birinci, 299 və 121 nömrəli orta məktəblər isə müvafiq olaraq ikinci və üçüncü yerləri tutub.
Sonda qalib gələn komandalara diplom və mükafatlar təqdim olunub.