REGİONLAR
Muxtar respublikada muzey ziyarətləri davam edir
Naxçıvan, 1 avqust, AZƏRTAC
Naxçıvan Muxtar Respublikası Ali Məclisi Sədrinin “Muzeylərlə əlaqələrin daha da gücləndirilməsi haqqında” Sərəncamına uyğun olaraq muxtar respublikada dövlət orqanları işçilərinin muzeylərə kollektiv gedişi təmin olunur.
AZƏRTAC-ın Naxçıvan bürosu xəbər verir ki, ötən şənbə günü Naxçıvan Muxtar Respublikası Ali Məclisi Aparatının kollektivi və Naxçıvan Muxtar Respublikası Ali Məclisinin Naxçıvanşünaslıq Mərkəzinin əməkdaşları Naxçıvan şəhərində yerləşən “Naxçıvanqala” Tarixi-Memarlıq Muzey Kompleksində olublar.
Ekskursiya çərçivəsində məlumat verilib ki, Naxçıvan Muxtar Respublikasının ərazisi dünyanın ən qədim insan məskənlərindən biridir. Bunun nəticəsidir ki, tarixin bütün dövrlərinə aid bu ərazidə zəngin mədəniyyət və memarlıq nümunələri yaradılıb. Bu abidələr sırasında “Naxçıvanqala” Tarix-Memarlıq Muzey Kompleksi mühüm əhəmiyyət kəsb edir. Belə abidələrin bərpası və qorunması gələcək nəsillərə Azərbaycanın qədim tarixinin çatdırılması, eyni zamanda, Naxçıvana turistlərin marağının artırılması baxımından mühüm əhəmiyyət daşıyır. XVII əsrin ortalarınadək müdafiə istehkamı kimi mövcud olmuş “Naxçıvanqala” müharibələr nəticəsində dağıdılmış və əvvəlki möhtəşəmliyini itirmişdi. 2010-cu ildə “Naxçıvanqalanın” bərpasına başlanılıb, tarixi ərazidə yenidənqurma işləri aparılıb, qalanın əvvəlki görkəmi özünə qaytarılıb. Naxçıvanın qədim tarixi- mədəni irsinin mühafizəsini təmin etmək məqsədilə burada “Naxçıvanqala” Tarix-Muzey Kompleksinin yaradılıb. Orijinal tərtibatı ilə seçilən muzeydə Naxçıvan Muxtar Respublikasının ərazisində aşkarlanan tarixi əşyalar xronoloji ardıcıllıqla düzülüb. Eramızdan əvvəl V minilliyə aid təsərrüfat küpü, eramızdan əvvəl V-III minilliyə aid müxtəlif məişət əşyaları, Tunc və Erkən Dəmir dövrünə aid keramika məmulatları, mis qab və alətlər, qəbirüstü abidələr, silahlar muzeyin eksponatları sırasındadır. Bununla yanaşı, kompleksin ekspozisiyasındakı görkəmli rəssam Şamil Qazıyevin “Xırmanda”, “Taxılbiçənlər”, “Çarıqçılar”, “Qalayçılar”, “Öküzlərin nallanması”, “Örtülü bazar”, “Naxçıvanqala”, “Köhnə Naxçıvan” və digər tabloları realist təsviri və etnoqrafik cizgiləri ilə qədim Naxçıvan haqqında təsəvvür yaradır.
Qeyd olunub ki, memarlıq abidələrimiz arasında özünəməxsus yeri olan “Naxçıvanqala” yalnız müdafiə məqsədi daşımayıb. Bu qala, eyni zamanda, burada formalaşmış ilkin şəhər mədəniyyətinin ayrılmaz elementinə çevrilib. Orta əsrlərə aid mənbələrdə tarixçilər Naxçıvan şəhərini ətrafı möhkəmləndirlmiş qala kimi xarakterizə edirlər. Naxçıvan şəhərinin 1827-ci ilə aid planında Naxçıvanqalanın sxematik təsviri də verilib. Plana əsasən, qala iki hissədən - kiçik qala, yəni Narınqala və Böyükqaladan ibarət olub. Xalqımız Narınqalanın qalıqlarını günümüzə qədər qoruyub saxlaya bilib.
Diqqətə çatdırılıb ki, əsrlər boyu milli-mənəvi dəyərlərinə, tarixinə və etnoqrafiyasına sahib çıxan dövlətimiz mədəni irsimizin daşıyıcısı olan türbələrimizi, tarixi hamamlarımızı, habelə qədim qala abidələrimizi qoruyub saxlayıb, onu gələcək nəsillərə miras buraxıb. Belə ki, Naxçıvan Muxtar Respublikası Ali Məclisi Sədrinin 2013-cü il 5 iyun tarixli Sərəncamı ilə “Naxçıvanqala” Tarix-Memarlıq Muzey Kompleksinin yaradılması da tariximizə, milli kimliyimizə bağlılığın bariz nümunəsidir.
Həmin gün Nazirlər Kabinetinin kollektivi Naxçıvan Dövlət Xalça Muzeyində, Ali Məhkəmənin, Naxçıvan Şəhər Məhkəməsinin və ixtisaslaşdırılmış məhkəmələrinin əməkdaşları Cəmşid Naxçıvanski Muzeyində, Daxili İşlər Nazirliyinin kollektivi Xatirə Muzeyində, Dövlət Təhlükəsizlik Xidmətinin əməkdaşları Bəhruz Kəngərli Muzeyində, Naxçıvan Muxtar Respublikası Prokurorluğunun, Hərbi Prokurorluğun və Naxçıvan Şəhər Prokurorluğunun kollektivi Hüseyn Cavidin Ev-Muzeyi və Xatirə Kompleksində olublar. Muxtar respublikanın bir sıra digər qurumlarının kollektivləri də müxtəlif mədəniyyət müəssisələrini ziyarət ediblər.