Naxçıvan, 10 oktyabr, AZƏRTAC

Ulu öndər Heydər Əliyevin 2002-ci ildə imzaladığı Sərəncamla hər il oktyabrın 10-u Azərbaycan yanğınsöndürənlərinin peşə bayramı kimi qeyd olunur. Bu gün yanğın təhlükəsizliyi orqanları ölkəmizdə, o cümlədən muxtar respublikamızda diqqət və qayğı ilə əhatə olunub, bu sahənin maddi-texniki bazasının gücləndirilməsi, şəxsi heyətin sosial-məişət şəraitinin yaxşılaşdırılması istiqamətində müvafiq tədbirlər görülüb. 2002-ci ildə muxtar respublikanın Sədərək rayonunda hərbiləşdirilmiş yanğın hissəsi yaradılıb və onun fəaliyyətinin təmin edilməsi üçün inzibati bina və texniki qaraj tikilib, 2003-cü ildə isə Ordubad və Şahbuz rayonlarında yanğın hissələri hərbiləşdirilmiş yanğın hissələrinə çevrilib. 2004-cü ildə Dövlət Yanğın Təhlükəsizliyi Şöbəsinə İdarə statusu verilib, onun yerli qurumları xidmətdən şöbəyə çevrilib, Kəngərli rayonunda hərbiləşdirilmiş yanğın hissəsi yaradılıb.

Naxçıvan Muxtar Respublikası Fövqəladə Hallar Nazirliyinin mətbuat xidmətinin məlumatına görə, 2006-cı ildə Dövlət Yanğın Təhlükəsizliyi İdarəsi və onun yerli qurumlarının muxtar respublikanın Fövqəladə Hallar Nazirliyinin tabeliyinə verilməsi ilə yanğın təhlükəsizliyi orqanlarının fəaliyyətində yeni mərhələnin başlanğıcı qoyulub. 2008-ci ildə Dövlət Yanğın Təhlükəsizliyi İdarəsi və Naxçıvan Şəhər Dövlət Yanğın Təhlükəsizliyi Şöbəsinin inzibati binaları əsaslı təmir edilib, Kəngərli, Şahbuz, Ordubad, Şərur, Babək və Sədərək Rayon Dövlət Yanğın Təhlükəsizliyi şöbələri üçün yeni inzibati binalar və texniki qarajlar tikilərək şəxsi heyətin istifadəsinə verilib. İdarənin yerli qurumlarının yanğınsöndürmə avtomobilləri müasirtipli radiostansiyalarla təmin olunub, struktur qurumlarla etibarlı rabitə əlaqəsi yaradılıb.

Ötən müddətdə yanğın təhlükəsizliyi orqanlarında peşə hazırlığının artırılması üzrə beynəlxalq təcrübənin öyrənilməsi, texniki təchizat və təminatın müasir standartlara uyğunlaşdırılması, həmçinin ixtisaslı kadrların hazırlanması istiqamətində tədbirlərin həyata keçirilməsi diqqət mərkəzində saxlanılıb. Yanğın təhlükəsizliyi orqanlarının ixtisaslı kadrlarla komplektləşdirilməsi, gənc kadrların hazırlanması məqsədilə 2006-2018-ci illərdə, ümumilikdə, 117 əməkdaş Azərbaycan, Ukrayna və Belarusun akademiyalarına, həmçinin Bakı Yanğın Texniki Kollecinə təhsil almağa göndərilib. Onlardan 98-i Dövlət Yanğın Təhlükəsizliyi İdarəsi və onun yerli qurumlarında xidmətlərini layiqincə davam etdirir.

Yanğın təhlükəsizliyi məsələləri ilə bağlı maarifləndirmə istiqamətində də işlər diqqətdə saxlanılır, idarə, müəssisə və təşkilatlarda, həmçinin taxıl zəmilərində və əkin sahələrində maarifləndirici tədbirlər keçirilir, bu işdə kütləvi informasiya vasitələrinin imkanlarından geniş istifadə olunur. Bununla yanaşı, yanğın təhlükəsizliyi orqanlarının əməkdaşları muxtar respublika ərazisində baş vermiş yanğınların qarşısının alınması və söndürülməsi ilə yanaşı, yol-nəqliyyat qəzalarının nəticələrinin aradan qaldırılmasında, subasmaya məruz qalan ərazilərdən suyun çəkilməsi və xilasetmə işlərinin aparılmasında öz vəzifələrini layiqincə yerinə yetirirlər.

Görülən işlər və əldə olunan nailiyyətlər dövlətimiz tərəfindən daim yüksək qiymətləndirilib, muxtar respublika yanğınsöndürənlərindən 6-sı “Dövlət qulluğunda fərqləndiyinə görə”, 4-ü “Fövqəladə hallar orqanlarında xidmətdə fərqləndiyinə görə” 3-cü dərəcəli medalı və 21-i “Rəşadətli əməyə görə” döş nişanı ilə təltif edilib, bir qrup əməkdaşa fəxri fərman və hədiyyələr təqdim olunub.

Naxçıvan Muxtar Respublikası Fövqəladə Hallar Nazirliyinin yanğınsöndürənləri əhalinin və ərazilərin fövqəladə hallardan qorunması, yanğın təhlükəsizliyinin etibarlı təmin olunması sahəsində uğurlu fəaliyyətlərini davam etdirmək üçün lazımi maddi-texniki təminata malikdirlər.

AZƏRTAC-ın Naxçıvan bürosu