Azərbaycan mədəniyyətinə ağır itki üz vermişdir. Milli teatr sənətinin görkəmli nümayəndəsi, Dövlət mükafatı laureatı, Azərbaycan Respublikası Prezidentinin fərdi təqaüdçüsü, xalq artisti Nəsibə Cahangir qızı Zeynalova 2004-cü il martın 10-da ömrünün 88-ci ilində vəfat etmişdir.

Nəsibə Zeynalova 1916-ci il aprelin 20-də Bakı şəhərində Azərbaycan professional teatrının banilərindən olan Cahangir Zeynalovun ailəsində anadan olmuşdur. Əmək fəaliyyətinə 1936-cı ildə Azərbaycan Dövlət Filarmoniyasının rəqs ansamblında başlayan Nəsibə Zeynalova sonrakı taleyini Azərbaycan Dövlət Musiqili Komediya Teatrı ilə bağlamışdır. O, 1942-ci ildə Bakı Teatr Texnikumunu, sonra isə Azərbaycan Dövlət İncəsənət İnstitutunu musiqili komediya aktyoru ixtisası üzrə bitirmişdir.

Nəsibə Zeynalovanın yaradıcılığı Azərbaycan mədəniyyəti tarixinə böyük hadisə kimi daxil olmuşdur. Onun canlandırdığı obrazların gücü yüksək dərəcədə təbiiliyi, milliliyi və müasirliyi ilə səciyyələnirdi. Sənətkarın yaratdığı özünəməxsus, koloritli və təkrarsız obrazlar qalereyası Azərbaycan musiqili komediya teatrının qızıl fonduna əbədi daxil olmuşdur.

Görkəmli aktrisa ömrünün altmış ildən artıq bir dövrünü milli teatr sənətinin inkişafına həsr etmişdir. O, geniş diapazonlu sənətkar kimi bu illər ərzində doğma teatrın səhnəsində, kinofilmlərdə və televiziya tamaşalarında çox sayda obrazlara səhnə həyatı vermişdir. Milli teatr tarixinin yetirdiyi böyük sənətkarlar nəslinin yaradıcılıq ənənələrinə sadiq qalan Nəsibə xanım bütün səhnə həyatı boyu yüksək peşəkarlıq, müasirlərin mənəvi aləminə dərindən nüfuz edə bilmək və zamanın ruhunu gözəl əks etdirmək bacarığı nümayiş etdirmişdir. Obrazların daxili aləmini ən xırda incəliklərinə qədər açmaq məharəti onun yaradıcılığının ən mühüm cəhətlərindəndir. Hər bir ifası tamaşaçılar tərəfindən səbirsizliklə gözlənilən və böyük rəğbətlə qarşılanan Nəsibə xanım insanlara bol sevinc bəxş edərək, öz sənəti ilə gülüşün böyük tərbiyəvi əhəmiyyətə malik olduğunu bir daha sübuta yetirmişdir.

Musiqili komediya ustası kimi tanınan Nəsibə Zeynalovanın ifasında istedadla yaradılan dolğun və rəngarəng qadın obrazları özlərinin danışıq və davranış tərzləri ilə yadda qalmış, onların hər sözü el arasında dillər əzbəri olmuşdur. Özünəməxsus ifa tərzi ilə milli səhnəyə yeni ab-hava gətirən, yüz minlərlə tamaşaçının yaddaşında silinməz izlər qoyan və Azərbaycan səhnəsinin həqiqi ulduzuna çevrilən Nəsibə xanım milli teatr sənəti salnaməsinə parlaq və unudulmaz səhifələr yazmışdır. Onun zirvələr fəth edən yaradıcılığı böyük aktyor sənətinin yüksək nümunəsidir.

Nəsibə Zeynalova milli kino sənətimizin inkişafında da müstəsna xidmətləri olan görkəmli sənətkarlarımızdan idi. Onun ekran həyatı verdiyi yaddaqalan personajlar uğurlu tale yaşamış, Azərbaycan kinematoqrafiyası xəzinəsinə həmişəlik daxil olmuşdur.

Nəsibə Zeynalovanın xəlqiliklə seçilən yaradıcılığı gənc nəslin milli-mənəvi dəyərlərə bağlılıq ruhunda tərbiyə olunması işində əhəmiyyətli rol oynamışdır. Keçdiyi şərəfli sənət yolu ilə bir məktəb yaradan Nəsibə xanımın yaradıcılığı neçə-neçə aktyor nəsli üçün bundan sonra da örnək olacaqdır.

Xalq sənətkarı Nəsibə Zeynalovanın milli mədəniyyətimizin inkişafı sahəsində göstərdiyi böyük xidmətlər dəfələrlə yüksək qiymətləndirilmişdir. O, respublikanın Dövlət mükafatına, xalq artisti fəxri adına layiq görülmüş, orden və medallarla, müstəqil Azərbaycan Respublikasının ali mükafatı olan “Şöhrət” ordeni ilə təltif edilmişdir.

Görkəmli sənətkar, qayğıkeş və səmimi insan Nəsibə Zeynalovanın işıqlı xatirəsi xalqımızın, bütün sənətsevər insanların qəlbində həmişə yaşayacaqdır.

Allah rəhmət eləsin!

İlham Əliyev, Murtuz Ələsgərov,

Artur Rasizadə, Ramiz Mehdiyev,

Elçin Əfəndiyev, Hacıbala Abutalıbov,

Fatma Abdullazadə, Polad Bülbüloğlu,

Zəhra Quliyeva, Nizami Xudiyev,

Anar Rzayev, Rüstəm İbrahimbəyov,

Azər Paşa Neymətov, Hacıbaba Bağırov,

Əliabbas Qədirov, Firəngiz Şərifova,

Cənnət Səlimova, Siyavuş Aslan,

Afaq Bəşirqızı

X X X

Mərhumun cənazəsi vidalaşmaq üçün 2004-cü il martın 12-də saat 12-dən 15-ə kimi Azərbaycan Dövlət Musiqili Komediya Teatrının binasında qoyulacaqdır (Azərbaycan prospekti, 8).