REGİONLAR
Naxçıvan Dövlət Universiteti ilə Azərbaycan Tibb Universiteti arasında əməkdaşlıq müqaviləsi imzalanıb
Naxçıvan, 18 iyun, AZƏRTAC
Azərbaycan Tibb Universitetinin rektoru, professor Gəray Gəraybəylinin rəhbərlik etdiyi nümayəndə heyəti Naxçıvan Dövlət Universitetində olub.
NDU-nun Televiziya, mətbuat və ictimaiyyətlə əlaqələr bölməsindən AZƏRTAC-ın Naxçıvan bürosuna bildirilib ki, ali təhsil ocağında ilk dəfədir təşkil olunan I Beynəlxalq Tibbi Forum çərçivəsində universitetin Diplomatiya kabinəsində ikitərəfli görüş keçirilib. Universitetin rektoru Elbrus İsayev qonaqları salamlayıb, hər iki ali təhsil ocağının birgə təşkilatçılığı ilə keçirilən forumun işinə uğurlar arzulayıb. Universitetin maddi-texniki bazası, ixtisasları, beynəlxalq əlaqələri haqqında məlumat verən rektor ali təhsil ocağında qurulan texnopark və onun fəaliyyət sahələri barədə danışıb, beynəlxalq əməkdaşlıq məsələləri qonaqların diqqətinə çatdırılıb. Elbrus İsayev universitetdə tədrisi Azərbaycan və ingilis dillərində həyata keçirilən ixtisaslar haqda məlumat verib, yeni açılan ixtisaslar və perspektivlər vurğulanıb. Regionda ingilis dilinin fəaliyyətinə xüsusi dəstək məqsədilə ali təhsil ocağında qurulan IELTS qeydiyyat və imtahan mərkəzinin üstünlükləri və muxtar respublika təhsil sisteminə verəcəyi perspektivlər qeyd olunub.
Elbrus İsayev ali təhsil ocağında artıq 23 ildir fəaliyyət göstərən Tibb fakültəsinin muxtar respublika səhiyyəsinə verdiyi töhfələri diqqətə çatdırıb. Bildirib ki, muxtar respublikanın səhiyyə sisteminin kadrla təminatının 80 faizdən çox tibb personalı məhz universitetin məzunları hesabına həyata keçirilir. Fakültə yarandığı dövrdən etibarən qardaş Türkiyə universitetləri ilə beynəlxalq əməkdaşlıq əlaqələri qurub və hər il müəllim tələbə heyəti ilə birgə həmin universitetlərdə təcrübə keçmək imkanı əldə edirlər. Universitetdə 32 ixtisas üzrə rezidentura təhsili həyata keçirilir.
Azərbaycan Tibb Universitetinin rektoru, professor Gəray Gəraybəyli ilk dəfədir ki, NDU-da olmaqdan məmnunluğunu bildirib. NDU-nun Tibb fakültəsi ilə əlaqələrdən danışan professor hər iki universitet arasında uzun illərdir davam edən əməkdaşlıq məsələləri barədə məlumat verib. Vurğulanıb ki, xarici ölkələrdən professor müəllim heyətinin universitetə dəvət olunması və təcrübə mübadiləsi aparması tibb təhsilində beynəlxalq təcrübənin bölüşdürülməsi baxımından çox əhəmiyyətlidir. Rektor ali təhsil ocağında 6 dissertasiya şurasının fəaliyyət göstərdiyini diqqətə çatdırıb və gələcəkdə NDU-ya bu sahədə xüsusi dəstək göstərilməsinin önəmini vurğulayıb.
Sonra hər iki universitet arasında birgə əməkdaşlıq məsələləri müzakirə olunub və memorandum imzalanıb. Protokolda təhsil prosesinin beynəlxalq standartlara uyğunlaşdırılması və inkişaf etdirilməsi, birgə elmi tədqiqatların aparılması, layihələrin həyata keçirilməsi, təhsilin bütün sahələrində elmi mövzular haqqında məqalələrin yazılması nəzərdə tutulub. Bundan başqa, elmi-tədqiqat məlumatlarının və texniki materialların, akademik, müəllim və tələbə mübadiləsinin həyata keçirilməsi, konqres, konfrans, simpozium, seminar və digər bu kimi birgə elmi yığıncaqların təşkili, prioritet innovativ layihələrin birgə işlənib hazırlanması və yaradılmış innovativ texnologiyaların, məhsulların tətbiqi üçün şəraitin yaradılması da qarşıya məqsəd qoyulub.
Sonda rektorlar qarşılıqlı olaraq hədiyyələr təqdim ediblər. Professor Gəray Gəraybəyli universitetin xatirə kitabına ürək sözlərini yazıb.