REGİONLAR
Naxçıvan Dövlət Universitetində Bədən Tərbiyəsi və İdman Günü qeyd olunub
Naxçıvan, 4 mart, AZƏRTAC
Azərbaycan Respublikasının Prezidenti İlham Əliyevin diqqət və qayğısı nəticəsində ölkəmizin hər yerində müasir idman kompleksləri tikilib istifadəyə verilib, mövcud idman obyektləri günün tələblərinə uyğun yenidən qurulur, maddi-texniki baza möhkəmləndirilir.
Naxçıvan Dövlət Universitetinin Televiziya, mətbuat və ictimaiyyətlə əlaqələr bölməsindən AZƏRTAC-ın Naxçıvan bürosuna bildirilib ki, bu barədə 5 Mart - Bədən Tərbiyəsi və İdman Gününə həsr olunmuş tədbirdə danışılıb.
Ali təhsil ocağının idman kompleksində keçirilən tədbirdə çıxış edən universitetin rektoru Elbrus İsayev qeyd edib ki, dövlətimizin başçısının “Bədən Tərbiyəsi və İdman Günü”nün təsis edilməsi haqqında 2005-ci il martın 4-də imzaladığı Sərəncama əsasən, hər il martın 5-i ölkəmizdə, o cümlədən muxtar respublikamızda “Bədən Tərbiyəsi və İdman Günü” kimi qeyd olunur.
Vurğulanıb ki, bu gün muxtar respublikada idmanın inkişafı diqqət mərkəzindədir. Universitetdəki idman kompleksinin təmir olunması, idman sahəsinin inkişafı üçün həyata keçirilən tədbirlər bunun növbəti nümunəsidir. Əlamətdar gün münasibəti ilə tələbə və müəllim heyətini təbrik edən rektor tələbə-gənclərə idman yarışlarında daha fəal olmağı, ölkəmizi dünya arenasında yüksək səviyyədə təbliğ etməyi tövsiyə edib.
Universitetin Bədən tərbiyəsi və idman kafedrasının dosenti, İdman klubunun sədri Məmmədəli Rəhimov çıxışında qeyd edib ki, ali təhsil ocağında idmanın kütləviliyinə diqqət yetirilir, burada 15 idman növü üzrə məşğələlər fəaliyyət göstərir. Hər il aprel-may aylarında universitetdə təqvim planına uyğun tələbələrin universiadası keçirilir. Bu yarışların məqsədi universitet yığma komandalarının tərkibini müəyyənləşdirməkdir.
Bildirilib ki, universitetin idmançıları bir sıra beynəlxalqmiqyaslı yarışlarda uğur qazanıblar. Universitetdə Bədən tərbiyəsi müəllimi və məşqçi kadrların hazırlanmasına da ciddi diqqət yetirilir. Hər il bu sahədə 70-80 nəfər ixtisaslı kadr hazırlanır.
Bədən tərbiyəsi və idman müəllimliyi ixtisası üzrə II kurs tələbəsi, İbrahim Xəlil Axundlu adına fəxri təqaüdçü, Avropa mükafatçısı Aslan İsmayılov muxtar respublikada gənclərə və idmanın inkişafına göstərilən diqqət və qayğıya görə minnətdarlığını bildirib.
Sonra komandalararası voleybol yarışına start verilib. Pedaqoji və İqtisadiyyat fakültələri arasında keçirilən oyun İqtisadiyyat fakültəsinin qalibiyyəti ilə başa çatıb.
Həmin gün tələbələr arasında əlamətdar tarixi günə həsr edilmiş “Peloton” intellektual bilik yarışı da keçirilib. Yarışda “Qasırğa” komandası qalib olub. Qalib komandanın hər bir üzvünə diplom və kitab verilib.