REGİONLAR
Naxçıvan Dövlət Universitetində Milli Mətbuat Günü qeyd edilib
Naxçıvan, 22 iyul, AZƏRTAC
Azərbaycan milli mətbuatının 147-ci ilində Naxçıvan Dövlət Universiteti (NDU) tədbirlərinin işıqlandırılmasında xüsusi fəallıq göstərən kütləvi informasiya vasitələrinin nümayəndələri təltif olunub.
NDU-nun Televiziya, mətbuat və ictimaiyyətlə əlaqələr bölməsindən AZƏRTAC-ın Naxçıvan bürosuna bildirilib ki, bu münasibətlə ali təhsil ocağında keçirilən tədbirdə universitetin rektoru Elbrus İsayev çıxış edərək ölkəmizdə söz, fikir və mətbuat azadlığının təmin edilməsində ümummilli lider Heydər Əliyevin müstəsna xidmətlərindən danışıb. Qeyd olunub ki, bu gün ölkəmizdə, o cümlədən muxtar respublikada söz və mətbuat azadlığına, kütləvi informasiya vasitələrinə ən yüksək səviyyədə diqqət və qayğı göstərilir. Bunun nəticəsidir ki, mətbuatımızda milli jurnalistika ənənələri qorunub saxlanılır, kütləvi informasiya vasitələri cəmiyyətin güzgüsü hesab olunur.
Mediaya göstərilən dövlət dəstəyinin jurnalist kadrların yetişməsində oynadığı rolu xüsusi vurğulayan rektor qeyd edib ki, NDU-nun Media Mərkəzində tələbələrin peşəkar jurnalist kimi yetişməsi, nəzəri biliklərin praktik tətbiqinə nail olunması üçün hər cür şərait var.
Rektor Universitet televiziyasının muxtar respublikada yayımını ali təhsil ocağına göstərilən yüksək dövlət qayğısının bəhrəsi kimi dəyərləndirib.
Elbrus İsayev NDU-da təşkil edilən tədbirlərin işıqlandırılması, muxtar respublika və ölkə mediasına çatdırılması istiqamətində mərkəzin fəaliyyətini, ali təhsil ocağının elektron təhsil şəbəkəsinin idarə olunmasında Universitet televiziyasının xüsusi əhəmiyyətini qeyd edib.
Rektor ali təhsil ocağında keçirilən I Beynəlxalq Tibbi Forumun muxtar respublika, Azərbaycan, hətta dünya mediasına çatdırılmasında əməyi olan muxtar respublikanın kütləvi informasiya vasitələrinin nümayəndələrini təbrik edib, forum çərçivəsində operativlik göstərən media orqanlarına minnətdarlığını bildirib.
“Naxçıvan Muxtar Respublikasında jurnalistika ixtisası üzrə kadr hazırlığı” adlı çıxışında Jurnalistika və xarici ölkələr ədəbiyyatı kafedrasının müdiri, filologiya üzrə fəlsəfə doktoru, dosent Şəhla Şirəliyeva qeyd edib ki, milli mətbuatımızın yaradıcısı Həsən bəy Zərdabidən başlayaraq günümüzə qədər böyük qələm ustaları milli təfəkkürün inkişafı üçün misilsiz xidmətlər göstərib, xalqımızın maariflənməsinə və tərəqqisinə böyük töhfələr veriblər. Vurğulanıb ki, muxtar respublikada mətbuata göstərilən hərtərəfli qayğının tərkib hissəsi kimi, ali təhsil ocağında da milli və müasir jurnalistika ənənələri formalaşaraq inkişaf edib. “Yeni Fikir” qəzetinin nəşr olunması, Universitet televiziyasının, “Nuhçıxan” radiosunun və “Qeyrət” nəşriyyatının fəaliyyət göstərməsi, Media Mərkəzinin yaradılması NDU-nun elmi, sosial və mədəni həyatı üçün mühüm əhəmiyyətə malikdir.
Universitetin Televiziya, mətbuat və ictimaiyyətlə əlaqələr bölməsinin müdiri Səadət Əliyeva Media Mərkəzinin fəaliyyətindən danışıb, jurnalist tələbələrin peşəkar kadr kimi formalaşmasında mərkəzin özünəməxsus rol oynadığını bildirib.
Ölkəmizdə və muxtar respublikada medianın inkişafına göstərilən yüksək dövlət qayğısından danışan AZƏRTAC-ın Naxçıvan bürosunun rəhbəri Rauf Əliyev ali təhsil ocağı ilə media əlaqələrinin uğurlu istiqamətindən söz açıb, büronun fəaliyyətinə verilən qiymətə görə minnətdarlıq edib.
İctimai Televiziya və Radio Yayımları Şirkətinin Naxçıvan üzrə bölgə müxbiri, Azərbaycan Respublikasının Əməkdar jurnalisti Qahirə Hüseynova ulu öndər Heydər Əliyevin mətbuatın inkişafına göstərdiyi diqqət və qayğısından danışıb.
“Nuhçıxan” İnformasiya Agentliyinin baş redaktoru Gülməmməd Əliyev, “Şərq qapısı” qəzetinin müxbiri Güntac Şahməmmədli isə muxtar respublikada medianın inkişafı sahəsində əldə olunan nailiyyətlərdən söhbət açıblar.
Sonda AZƏRTAC-ın Naxçıvan bürosunun rəhbəri Rauf Əliyev, İctimai Televiziya və Radio Yayımları Şirkətinin Naxçıvan üzrə bölgə müxbiri Qahirə Hüseynova, “Naxçıvan Muxtar Respublikası Televiziya və Radio Verilişləri” Qapalı Səhmdar Cəmiyyətinin və “Şərq qapısı” qəzetinin bir qrup əməkdaşı, “Nuhçıxan” İnformasiya Agentliyinin baş redaktoru Gülməmməd Əliyev və digərləri ali təhsil ocağında baş verən yenilikləri operativ şəkildə ictimaiyyətə çatdırdıqları üçün təşəkkürnamə ilə təltif olunublar.
Qeyd edək ki, ötən ay ölkəmizdə ilk dəfə muxtar respublikada keçirilən I Beynəlxalq Tibbi Foruma verilən informasiya dəstəyinə görə müvafiq kütləvi informasiya vasitələri də sertifikatlarla təltif edilib.
Sonda xatirə şəkli çəkdirilib.