REGİONLAR
Naxçıvan Dövlət Universitetində keçirilən fotoslayd müsabiqəsinə yekun vurulub
Naxçıvan, 27 fevral, AZƏRTAC
Naxçıvan Dövlət Universitetində Tələbə-Gənclər Təşkilatı böyük şairimiz Nizami Gəncəvinin həyat və yaradıcılığından bəhs edən slaydların təqdimatına həsr olunmuş “Söz sənətinin dahisi – Nizami” adlı tədbir təşkil edib.
Universitetin Televiziya, mətbuat və ictimaiyyətlə əlaqələr bölməsindən AZƏRTAC-ın Naxçıvan bürosuna bildirilib ki, tədbirdə çıxış edən ali təhsil ocağının rektoru, dosent Elbrus İsayev Azərbaycan Respublikasının Prezidenti İlham Əliyevin 2021-ci ilin “Nizami Gəncəvi İli” elan edilməsi haqqında Sərəncamının əhəmiyyətindən danışıb. Vurğulanıb ki, Ulu Öndərin təşəbbüsü və iştirakı ilə 1981-ci ildə ölməz sənətkarın 840 illik yubiley mərasimləri ölkənin mədəni həyatında əlamətdar hadisəyə çevrilib. 2011-ci ildə Nizami Gəncəvinin 870 illiyi dövlət səviyyəsində silsilə tədbirlərlə geniş şəkildə qeyd edilib. Nizami dühası hər zaman dünya şərqşünaslığının diqqət mərkəzində olub, şairin əsərlərinin nizamişünaslıqda yüksək qiymətləndirilən elmi-tənqidi mətni hazırlanıb, kitabları nəfis tərtibatda və kütləvi tirajla nəşr edilib.
Azərbaycan dili və ədəbiyyatı kafedrasının müdiri, professor Əsgər Qədimov “Nizami və Azərbaycan – Şərq intibahı” mövzusunda çıxışında dahi Nizami Gəncəvinin müxtəlif xarici ölkələrin kitabxana, arxiv və muzeylərində saxlanılan əlyazma nüsxələri, ona həsr olunan elmi-tədqiqat əsərləri barədə məlumat verib.
Universitet Tələbə-Gənclər Təşkilatının sədri, Hüquq kafedrasının müəllimi Əziz Qasımov bildirib ki, layihənin əsas məqsədi tələbələrin Nizami irsi barədə daha məlumatlı olmaları və dahi şairin yaradıcılığını daha dərindən mənimsəmələridir.
Təqdim edilən slaydlar yaradıcılıq, mövzu rəngarəngliyi, proqramlardan istifadə bacarığı baxımından dəyərləndirilib.
Sonda tələbələr diplom və kitabla mükafatlandırılıb.