Ağstafa, 19 may, Ruslan Novruzoğlu, AZƏRTAC

Təbiətin yaratdığı möcüzələr bitib-tükənmir. Odla su bir arada olmaz deyilsə də, bəzən onların harmoniyasını da görürük. Belə təbiət möcüzəsindən biri Ağstafa rayonu ərazisində yerləşir. Bulaqdan çıxan alov əsrarəngiz görüntü yaradır.

AZƏRTAC xəbər verir ki, rayonun Saloğlu qəsəbəsi yaxınlığında, Kür çayı sahilində yerləşən bulaq uzun illərdir buradan keçənlərin marağına səbəb olur. Sakinlər bulağı "yanan su" da adlandırırlar. Tərkibindəki qazla birgə torpaq səthinə çıxan bulaq daim yanır.

Ötən əsrin 70-ci illərində bu ərazilərdə neft axtarışları aparılıb və bu məqsədlə bəzi yerlərdə qazıntı işləri görülüb. Belə qazıntıların birində isə neft deyil, su çıxıb. Suyun içməyə yararlılığı ilə yanaşı, tərkibində müalicəvi maddələrin olması da müəyyənləşib. Rayon sakini Yolçu Ağacanov deyir ki, bulaqdan axan suyun tərkibində kükürd var: “Bu su bədəndə olan yaraları müalicə eləyir. Həm də içməlidir. Mədə-bağırsaq sisteminə də çox xeyri var. Şəxsən özüm hərdən gəlib bu sudan evə aparıram”.

Digər sakin Mətləb Əliyev isə bildirir ki, bu bulağın suyundan dəmlənən çayın gözəl dadı olur. Yanan bulağın suyundan Saloğlu və Poylu qəsəbəsinin sakinləri ilə yanaşı, Kürətrafı kəndlər və digər yaşayış məntəqələrinin sakinləri də istifadə edirlər.

Suyun müalicəvi tərkibi, alovla birgə harmoniyası, içmək üçün yararlı olması insanların bu bulağa marağını artırır. Yoldan keçənlər ayaq saxlayır, sudan içirlər. Yanan bulaqdan bu əraziyə yaxın olan Poylu qəsəbəsində də axır.