Salyan, 11 fevral, Mahir Babayev, AZƏRTAC

Ötən il Salyanda iqtisadiyyatın bütün sahələrində uğurlar qazanılıb, sənaye və kənd təsərrüfatının inkişafı davam etdirilib, abadlıq, quruculuq və tikinti işləri sürətləndirilib. Sahibkarlığın inkişafı üçün yaradılmış münbit şərait nəticəsində rayonda özəl investisiya hesabına kənd təsərrüfatı, sənaye, iaşə və emal sahələri üzrə ümumi dəyəri 169,7 milyon manat olan 56 layihənin icrası davam etdirilib. Artıq bir çox sahələrdə işlər başa çatdırılıb. Görülən işlər 1368 yeni iş yerinin yaradılmasına imkan verəcək.

AZƏRTAC-ın bölgə müxbiri xəbər verir ki, bu barədə Salyanda ötən ilin yekunları və qarşıda duran vəzifələrə həsr olunan hesabat yığıncağında rayon icra hakimiyyətinin başçısı Sevindik Hətəmov məlumat verib.

Yığıncaqda qeyd olunub ki, ötən il rayonda yol infrastrukturunun yaxşılaşdırılması istiqamətində mühüm tədbirlər həyata keçirilib. Belə ki, Ələt-Astara magistralının rayon ərazisindən keçən hissəsində, Salyan-Neftçala və Şirvan-Salyan avtomobil yollarında, Qaraçala-Düzənlik-Peyk kəndlərini və Arbatan-Marışlı-Seyidsadıqlı-Quyçu kəndini birləşdirən kəndarası avtomobil yollarında tikinti işləri başa çatdırılıb.

Hesabat dövründə şəhərin 38 kommunal binasında əsaslı təmir işləri görülüb, su-kanalizasiya xətləri yenisi ilə əvəzlənib.

Qeyd olunub ki, ötən il rayonda qeyri-neft sektorunun, o cümlədən kənd təsərrüfatının inkişaf etdirilməsi, yeni istehsal sahələrinin yaradılması istiqamətində bir sıra tədbirlər həyata keçirilib. Rayonun Həsənli kəndində 100 min başlıq damazlıq quşçuluq təsərrüfatının, Kürsəngi kəndi ərazisində istixana kompleksinin, şəhər ərazisində pivə və limonad istehsalı zavodunun və “Bazar-ticarət mərkəzi”nin tikintisi əsasən başa çatdırılıb. Ümumi sahəsi 25,9 hektar olan daha 19 istixana istifadəyə verilib. Xıdırlı kəndi ərazisində zeytun və meyvə emalı zavodlarının tikintisi başa çatıb, sınaq işləri aparılıb. Zavodların tikintisi yüzdən çox yeni iş yerinin yaranmasına səbəb olacaq.

Ötən il Qızılağac kəndi ərazisində yaradılan aqroparkda da işlər davam etdirilib. Aqroparkda mənbəyi Akkuşa suvarma kanalı olmaqla, ümumi uzunluğu 25 kilometr su kanalı çəkilib, mövcud kollektor-drenaj şəbəkəsinin 50 kilometrlik hissəsi lildən təmizlənib, 25 kilometr uzunluğunda su kanalı, 15 kilometr uzunluğunda elektrik və 1 kilometr qaz xətləri çəkilib. Həmçinin aqroparkda 500 başlıq 4 tövlə, texnika parkı, ofis binası və qonaq evi, 1500 tonluq taxıl anbarı, gücü saatda 10 ton olan yem zavodu və 4500 tonluq yem anbarı tikilib.

2018-ci ildə rayonda əkin sahələrindən 61 min 126 ton taxıl, 10356,3 ton pambıq, 5,1 min ton kartof, 34 min 805 ton tərəvəz, 12,12 min ton bostan məhsulları, 4 min 743,3 ton üzüm, 3 min 370,7 ton meyvə yığılıb. Cari ilin məhsulu üçün rayonda 6 min 833 hektarda buğda, 7 min 50 hektarda arpa, 1780 hektarda yonca, 127 hektarda isə sarımsaq əkilib, digər əkinlər üçün hazırlıq işlərinə başlanılıb.

Yığıncaqda vurğulanıb ki, ötən dövrdə rayonda iribuynuzlu heyvanların sayı 62 min 660, qoyun və keçilərin sayı isə 185 min 762 başa çatıb. Ət istehsalı 13 min 231 ton (diri çəkidə), süd istehsalı 49 min 702 ton, yun istehsalı 348 ton və yumurta istehsalı 34 milyon 865 min ədəd olub.

Məruzə və çıxışlarda rayonda əhalinin elektrik, qaz və içməli su ilə təmin edilməsi sahəsində görülən işlərdən ətraflı söhbət açılıb, təhsil, səhiyyə, mədəniyyət sahəsində qazanılan nailiyyətlər və nöqsanlar göstərilib.

Sonda müzakirə olunan məsələyə dair qərar qəbul edilib.