CƏMİYYƏT
Paytaxtda tullantıların idarə olunması problemləri müzakirə olunub
Bakı, 24 avqust, AZƏRTAC
Avqustun 24-də Beynəlxalq Mətbuat Mərkəzində paytaxtda tullantıların utilizasiyası vəziyyəti və təmizlik qaydalarına riayət edilməməsinə qarşı görülən tədbirlər barədə mətbuat konfransı keçirilib.
AZƏRTAC xəbər verir ki, tədbirdə çıxış edən "Təmiz şəhər" ASC-nin şöbə müdiri Sabit Zeyniyev Prezident İlham Əliyevin 2008-ci ilin avqustunda “Bakı şəhərində məişət tullantılarının idarə olunmasının təkmilləşdirilməsi haqqında” imzaladığı Sərəncama dair məlumat verərək bildirib ki, 2009-cu ilin martında həmin sənədə uyğun olaraq yaradılan "Təmiz şəhər" ASC fəaliyyətə başlayıb.
Onun dediyinə görə, Ekologiya və Təbii Sərvətlər Nazirliyinin (ETSN) "Təmiz şəhər" ASC ilə birlikdə ötən dövr ərzində həyata keçirdiyi tədbirlər nəticəsində paytaxtda kortəbii şəkildə yaranmış onlarla zibilxana ləğv edilib, Bakı və rayonlarının ekoloji durumu xeyli yaxşılaşıb.
Şöbə müdiri Balaxanı Bərk Məişət Tullantılarının Çeşidlənməsi Zavodu haqqında danışıb: “Bərk Məişət Tullantılarının Yandırılması Zavodunda tullantıların yandırılması nəticəsində elektrik enerjisi alınır və ümumi şəbəkəyə ötürülür. İllik gücü 500 min ton olan zavodda tullantıların yandırılması nəticəsində 231 milyon KVt/saat elektrik enerjisi alınır. Zavod 200 min ton tullantını çeşidləmək qabiliyyətinə malikdir. Çeşidləmə zamanı yararlı məhsullar tullantıların tərkibindən ayrılaraq xammal kimi təkrar emal müəssisələrinə göndərilir və ondan yeni məhsullar alınır. Həmin proses nəticəsində təbii ehtiyatlara qənaət olunur.”
Layihələr haqqında da məlumat verən şöbə müdiri bildirib ki, İqtisadiyyat Nazirliyi və Dünya Bankı ilə birlikdə keçirilən “Bərk məişət tullantılarının vahid idarəçilik layihəsi” çərçivəsində Balaxanı sanitar poliqona çevrilib. Onun ətraf mühitə neqativ təsirləri tam aradan qaldırılaraq sanitar hücrələr yaradılıb və hazırda tullantılar həmin hücrələrdə zərərsizləşdirilir. Bakıda sahəsi 200 kvadratmetrdən çox olan 291 qeyri-qanuni tullantı sahəsi aşkarlanıb və onlardan 40-ı layihə çərçivəsində təmizlənib.
Qurumun digər nümayəndəsi Elmar Məlikov çıxış edərək “Təmiz Qala” pilot layihəsindən, tullantıların düzgün idarə edilməsinin təbliği üçün maarifləndirmə tədbirləri və onun müsbət nəticələrindən bəhs edib: “IDEA” İctimai Birliyi və Təhsil Nazirliyi ilə də maarifləndirici tədbirlər həyata keçirilir. İldə iki dəfə keçirilən “Sahillər təmiz qalsın” layihəsi çərçivəsində Ekologiya və Təbii Sərvətlər Nazirliyinin verdiyi rəyə əsasən “IDEA” İctimai Birliyi ilə çirkli çimərliklərdə təmizlik aksiyası keçirilir. Son təmizlik aksiyasına 250-dən çox könüllü gənc qoşulub və çimərliyin ünvanı artıq dəyişilib. Qeyd olunub ki, tullantıların faydalı əşyalara çevrildiyi “Tullantıdan sənətə” muzeyində növbəti ay altıncı festival keçiriləcək.
Ekologiya və Təbii Sərvətlər Nazirliyinin sektor müdirləri Vaqif Mənsurov və Adil Zeynalov nazirliyin tullantıların idarə edilməsi sahəsində keçirdiyi tədbirlərdən, maarifləndirici aksiya və iməciliklər barədə məlumat veriblər. Bildirilib ki, ötən il tullantıların düzgün idarə olunmamasına görə, 75 akt və 90 protokol tərtib olunub, fiziki, hüquqi və vəzifəli şəxslərə 63 “məcburi göstəriş” verilib. Tullantılar haqqında qanunun pozulmasına görə 89 fakt üzrə 83,2 min manat cərimə tətbiq olunub, 85 fakt hüquq-mühafizə orqanlarına göndərilib.
Tədbirin sonunda mətbuat nümayəndələrini maraqlandıran suallara cavablar verilib.