SİYASƏT
Pekində Azərbaycanın Dövlət Müstəqilliyi Günü münasibətilə tədbir keçirilib VİDEO
Pekin, 19 oktyabr, AZƏRTAC
Pekində Azərbaycanın Çin Xalq Respublikasındakı səfirliyinin təşkilatçılığı ilə 18 Oktyabr - Dövlət Müstəqilliyi Günü münasibətilə tədbir keçirilib.
AZƏRTAC xəbər verir ki, Çində yaşayan və təhsil alan azərbaycanlıların, Azərbaycanın müxtəlif dövlət qurumları və şirkətlərinin Çindəki nümayəndəliklərinin əməkdaşlarının, Pekin və Pekin Xarici Dillər universitetlərində Azərbaycan dilini öyrənən çinli tələbələrin iştirak etdikləri tədbirdə əvvəlcə Azərbaycanın Dövlət himni səslənib.
Mərasimdə çıxış edən Azərbaycanın Çindəki səfiri Əkrəm Zeynallı 1991-ci il oktyabrın 18-də Ali Sovetin “Dövlət müstəqilliyi haqqında Konstitusiya Aktı”nı qəbul etməsi ilə Azərbaycan xalqının müstəqillik arzusunun həyata keçdiyini deyib. Müstəqilliyin ilk illərində Azərbaycanın xeyli çətinliklərlə üzləşdiyini diqqətə çatdıran diplomat bildirib ki, 1993-cü ildə xalqın təkidli tələbi ilə hakimiyyətə qayıdan ulu öndər Heydər Əliyev özünün zəngin siyasi təcrübəsi və yüksək idarəçilik bacarığı nəticəsində Azərbaycanın müstəqilliyini əbədi və dönməz etdi. Ümummilli Liderin yorulmaz səyləri nəticəsində qısa müddətdə cəmiyyətdə hökm sürən iqtisadi, siyasi və mənəvi psixoloji gərginlik aradan qaldırıldı, dövlət quruculuğu işlərinə başlandı. Məhz həmin işlər Azərbaycanın bugünkü uğurları üçün ən etibarlı təməl oldu.
Səfir Ə.Zeynallı Ulu Öndərin layiqli davamçısı olan Prezident İlham Əliyevin rəhbərliyi ilə Azərbaycanın siyasi, iqtisadi, sosial və hərbi sahələrdə böyük tərəqqi əldə etdiyini, yerləşdiyi bölgədə baş verən strateji, siyasi və iqtisadi proseslərin gedişinə təsir göstərməyə qadir olan dövlətə çevrildiyini deyib.
Prezident İlham Əliyevin rəhbərliyi ilə Azərbaycanın müxtəlif sahələrdə qazandığı nailiyyətlərdən danışan diplomat bu uğurların sayəsində son illərdə ölkəmizin bir çox beynəlxalq tədbirlərin və irimiqyaslı idman yarışlarının keçirildiyi məkana çevrildiyini diqqətə çatdırıb.
Azərbaycan və Çin arasında ikitərəfli münasibətlərdən söz açan səfir Əkrəm Zeynallı deyib ki, hazırda əlaqələrimiz bütün istiqamətlər üzrə sürətlə inkişaf edir. Qarşılıqlı səfərlər, beynəlxalq təşkilatlar çərçivəsində ölkələrimizin bir-birinə verdiyi dəstək, ticarət dövriyyəsinin artması deyilənləri bir daha təsdiq edir.
Diplomat Azərbaycan Prezidenti İlham Əliyevin 2015-ci ildə Çinə dövlət səfəri zamanı əldə olunan razılaşmaların əməkdaşlığımızın müxtəlif istiqamətlərdə daha da genişlənməsinə öz töhfəsini verdiyi vurğulayıb. Azərbaycan Prezidentinin ölkəmizin Çin ilə əlaqələrinin inkişafına böyük önəm verdiyini bildirən səfir qarşıdakı illərdə ikitərəfli münasibətlərimizin genişləndirilməsi üçün daha çox işin görüləcəyini bildirib.
Ə.Zeynallı tarixi İpək yolu üzərində yerləşən Azərbaycanın özünün iqtisadi potensialı və nəqliyyat-logistika imkanları ilə Çinin “Bir kəmər, bir yol” strategiyası üçün vacib ölkə olduğunu diqqətə çatdırıb.
Sonra Azərbaycandan dəvət olunan musiqiçilərin ifasında konsert proqramı təşkil olunub. Mərasimdə milli mətbəximizin təamlarından ibarət süfrə açılıb.
Şahin Cəfərov
AZƏRTAC-ın xüsusi müxbiri
Pekin