ELM VƏ TƏHSİL
Peşəkar kadrların hazırlanması keyfiyyətli təhsildən keçir
Bakı, 20 iyun, AZƏRTAC
Azərbaycan Tibb Universitetinin (ATU) rektoru yanında İctimai Nəzarət və Məsləhət Şurasının (İNMŞ) təşkilatçılığı ilə ATU-da imtahanların gedişatına ictimai baxış keçirilib.
AZƏRTAC xəbər verir ki, ictimai baxış 2016-2017-ci tədris ilinin yay imtahan sessiyasında şəffaflığın və obyektivliyin təmin edilməsinin izlənilməsi məqsədilə İNMŞ-nin iclasının qərarına əsasən təşkil edilib.
İctimai baxış zamanı Şura üzvlərinə məlum olub ki, ATU-da təhsil alan tələbələrin – gələcəyin həkim və əczaçıları olacaq gənclərin biliklərinin düzgün, obyektiv qiymətləndirilməsi və şəffaflığın təmin edilməsi üçün imtahanlar mərkəzləşdirilmiş qaydada, universitetin virtual test mərkəzində, kompüterlər vasitəsilə test üsulu ilə həyata keçirilir. VI kurs müalicə-profilaktika, tibbi-profilaktika, hərbi-tibbi fakültələrinin, V kurs stomatologiya və IV kurs əczaçılıq fakültələrinin tələbələrinin buraxılış imtahanları da daxil olmaqla, ümumilikdə, 157 fənn üzrə keçirilən imtahanlar mayın 10-dan başlayaraq iyulun 5-dək davam edəcək.
ATU-nun rektoru yanında İNMŞ-nin üzvləri virtual test mərkəzində olarkən hər gün 220 kompüter vasitəsilə təxminən 2000-ə yaxın sualı cavablandıran tələbələr üçün hər cür şəraitin yaradıldığının və imtahanların şəffaf və obyektiv keçirilməsinin şahidi olublar. Bu faktı imtahan mərkəzində yaradılmış Apellyasiya Komissiyasının fəaliyyət göstərməsi bir daha təsdiq edir. Şura üzvlərinə məlumat verilib ki, komissiya tərəfindən imtahan zamanı baş verən hər hansı anlaşılmazlıq yerində aydınlaşdırılır, tələbələrin test sualları ilə bağlı bütün şikayətlərinə dərhal baxılır və müvafiq tədbirlər görülür.
Baxış zamanı məlum olub ki, indiyə qədər tələbələr tərəfindən daxil olan 180-ə yaxın şikayət yazılı şəkildə qəbul edilib və obyektiv olaraq müvafiq ölçü götürülüb. İNMŞ-nin üzvləri ATU-nun virtual test mərkəzində keçirilən imtahanlarla yanaşı, son illər universitetin Tədris-Cərrahiyyə binasında keçirilən buraxılış kurs tələbələrinin bacarıq vərdişlərinə necə yiyələnmələri ilə bağlı onların əyani vasitələr üzərində təcrübi bacarıqlarını nümayiş etdirmələri ilə əlaqədar keçirilən imtahan-sorğularını da diqqətlə izləyiblər. Əczaçılıq fakültəsində bakalavr pilləsində təhsil alan IV kurs tələbələrinin buraxılışı isə diplom-buraxılış işlərinin müdafiəsi ilə həyata keçirilir. Qeyd etmək lazımdır ki, bu tələbələrin bir hissəsi xarici ölkə vətəndaşlarıdır.
ATU-nun rektoru yanında İctimai Nəzarət və Məsləhət Şurasının sədri, Milli Məclisin deputatı İlham Məmmədov, Şuranın sədr müavini, ATU-nun müəllimi və “Gənc vətəndaş” İB-nin sədr müavini Aidə Bəndəliyeva, Şuranın üzvləri - Azərbaycan Milli Qeyri-Hökumət Təşkilatları Forumunun prezidenti Rauf Zeyni, “İki sahil” qəzetinin baş redaktoru, Mətbuat Şurası İdarə Heyətinin üzvü Vüqar Rəhimzadə, “Cəmiyyətin və Vətəndaş Münasibətlərinin İnkişafı” İctimai Birliyinin sədri, QHT-lərin Antikorrupsiya Şəbəkəsinin üzvü Əhməd Abbasbəyli, ATU-nun müalicə-profilaktika fakültəsinin IV kurs tələbəsi Məhərrəm Amilli buraxılış işlərinin müdafiəsində də iştirak edərək, həm müdafiənin gedişi, həm də müdafiə komissiyasının işi ilə yaxından tanış olublar.
İctimai Nəzarət və Məsləhət Şurasının sədri və Şura üzvləri keçirdikləri ictimai baxış zamanı universitetin kollektivi ilə yaxından tanış olublar və onlara öz tövsiyələrini verməklə yanaşı, ATU-da imtahan sessiyasının mövcud normativ sənədlər əsasında təşkil olunmasını müşahidə ediblər. Bununla yanaşı, Şuranın sədri, Milli Məclisin deputatı İlham Məmmədov gələcəkdə universitetdə yenicə fəaliyyətə başlamış İctimai Nəzarət və Məsləhət Şurasının müvafiq qərargahının yaradılmasının, xüsusi rəy qutularının yerləşdirilməsinin zəruriliyini vurğulayıb. Bildirib ki, bunları yaratmaqda məqsəd gələcəkdə həm imtahanların gedişində, həm də universitetin fəaliyyətində obyektivliyi və şəffaflığı daha da təmin etmək, qərargahın fəaliyyəti barədə müəllim, tələbə və valideynlərə, həmçinin ictimaiyyət nümayəndələrinə mütəmadi məlumat verməkdir.