SİYASƏT
Politoloq: Azərbaycanın Dördüncü Sənaye İnqilabına qoşulmaq üçün imkanları çox genişdir
Bakı, 15 fevral, Səadət Hakıyeva, AZƏRTAC
Azərbaycan artıq 30 ildir ki, müstəqillik yolunda inamla irəliləyir. Ermənistanla münaqişə şəraitində yaşamasına və ərazilərinin 20 faizinin işğal altında olmasına baxmayaraq, ölkəmiz bir sıra göstəricilərə görə dünyanın lider dövlətlərini qabaqlayır. Elə millətlər, xalqlar var ki, nə qədər çalışsalar da, dövlətlərini qura bilməyiblər. Bizə qarşı ərazi iddiaları olan Ermənistan özü hələ də müstəqil dövlət deyil. Bu sözləri eynilə bir sıra digər ölkələr haqqında da demək mümkündür. Bu cəhətdən biz çox xoşbəxt xalqıq. İslahatçı ölkə kimi tanınan respublikamız rəqabət qabiliyyətinə görə dünyada ön sıralarda yer tutur. Davos İqtisadi Forumunun hesabatında da göstərildiyi kimi, bizim qlobal iqtisadiyyatda xüsusi yerimiz var. Qurumun prezidenti Borge Brendenin təşəbbüsü ilə Davos İqtisadi Forumunun Azərbaycanda nümayəndəliyinin açılması ilə bağlı əməkdaşlıq sazişi da imzalanıb. Azərbaycanda sabitlik, təhlükəsizlik olmasaydı, belə bir sənədin imzalanması da mümkün olmazdı.
Bu sözləri AZƏRTAC-a müsahibəsində politoloq Tofiq Abbasov söyləyib.
Onun sözlərinə görə, Azərbaycan, sözün əsl mənasında, sabitlik, əmin-amanlıq məkanına çevrilib. Ölkəmizə gələn turistlərin sayı ildən-ilə artır. Bu da onu deməyə əsas verir ki, Azərbaycanın turizm sənayesi yaxşı inkişaf edib.
“Fevralın 6-da Bakıda Türkdilli Dövlətlərin Əməkdaşlıq Şurasına üzv ölkələrin Xarici İşlər nazirlərinin növbədənkənar iclası keçirildi. İclas çərçivəsində Prezident İlham Əliyev quruma üzv ölkələrin bir neçəsinin Xarici İşlər nazirləri ilə görüşdü. Bu görüşlərin çox böyük əhəmiyyəti var. Bu, bir tərəfdən, dünyanın qlobal problemlərinin Azərbaycanda müzakirə olunduğunu, digər tərəfdən isə ölkəmizin təhlükəsiz məkan kimi nüfuzunun artdığını göstərir.
Azərbaycan Ermənistan istisna olmaqla, regionun bütün ölkələri ilə mehriban qonşuluq münasibətləri qurub və hərtərəfli əməkdaşlıq əlaqələrini genişləndirir. Ermənistan regionda təhlükə ocağıdır və bunu hamı bilir. Prezident İlham Əliyev münaqişənin sülh yolu ilə ədalətli həlli üçün bütün mümkün variantlardan istifadə edir. Azərbaycan sülhməramlı olduğunu hər zaman nümayiş etdirib. Bunu nəinki ayrı-ayrı ölkələr, hətta dünyanın super gücləri də qiymətləndirirlər”, - deyə T.Abbasov əlavə edib.
Azərbaycan Ordusunun dünyanın 50 ən güclü ordusu sırasında yer aldığını bildirən politoloq ordumuz işğal altında olan torpaqlarımızı azad etmək qüdrətində olduğunu bildirib. Qeyd edib ki, buna baxmayaraq, Azərbaycan sülhün tərəfdarıdır və regionda təhlükəsizliyə zərər gəlməsini istəmir.
“Dünya dövlətləri Azərbaycanı etibarlı tərəfdaş kimi tanıyırlar. Azərbaycanın Dördüncü Sənaye İnqilabına qoşulmaq üçün imkanları çox genişdir. Birinci sənaye inqilabı XIX əsrin ortalarında su və buxar qazının ixtirası ilə baş verib. XX əsrin əvvəllərində elektrik enerjisinin ixtirası ilə ikinci inqilab olub. Üçüncü inqilab isə avtomatlaşma idi. Onun başa çatdıra bilmədiyi işləri indi Dördüncü Sənaye İnqilabı yerinə yetirir. Azərbaycan bu inqilaba qoşulmağa hazırdır. Dövlətimizin başçısının dediyi kimi, bu layihədə etibarlı tərəfdaş olan Azərbaycan Dördüncü Sənaye İnqilabının hədəflərinin həyata keçirilməsində çox fəal iştirak edəcək”, - deyə politoloq vurğulayıb.
Azərbaycanın texnoloji cəhətdən yüksək inkişaf etmiş ölkə olduğunu diqqətə çatdıran T.Abbasov ölkəmizin kosmik klubun üzvü olduğunu qeyd edib. Bildirib ki, bu klubun üzvlərinin sayı 20-dən artıq deyil. Diqqətə çatdırıb ki, 2022-ci ildə keçiriləcək Beynəlxalq Astronavtika Konqresinə ev sahibliyinin Azərbaycana verilməsi bu sahədə əldə olunan uğurların nəticəsidir. Bütün bunları nəzərə alsaq görərik ki, Azərbaycanda həqiqətən də hərtərəfli inkişaf gedir.