REGİONLAR
Pomidorun alış qiyməti lənkəranlı fermerləri qane edir - REPORTAJ VİDEO
Lənkəran, 23 iyul, İsmayıl Cəfərli, AZƏRTAC
Lənkəranda açıq sahələrdə pomidor yığımına başlanılıb. Bu günədək artıq 60 ton məhsul tədarük olunub və tələbat da çoxdur. Məhsul respublikanın ayrı-ayrı rayonlarında, həmçinin paytaxtın kənd təsərrüfatı yarmarkalarında satılır.
AZƏRTAC xəbər verir ki, Lənkəranın Ürgə kəndi ərazisində mayın axırlarında açıq sahədə 10 hektarda əkilən “Volqoqrad” sortundan olan pomidor şitillərinə lazımi aqrotexniki qulluq göstərilib. Nəticə ürəkaçandır. Artıq sahələrdə bol məhsul var. İyulun əvvəllərindən başlanan yığım 3-4 gündən bir davam etdirilir.
Təsərrüfatın aqronomu Əlikişi Əliyev: “Əkdiyimiz pomidor həm tez yetişir, həm də bizim şəraitə uyğundur, rayonlaşıb. Uzun illik təcrübəmə əsasən deyə bilərəm ki, “Volqoqrad” sortundan olan şitillər çox sağlamdır və 100 faiz cücərti verir. Əsas şitil mənbəyidir. Yaxşı qidası olan şitil sağlam pomidor deməkdir. Məhsulu da çox keyfiyyətlidir. Satışa çıxarılmalı məhsuldur. Dadına söz ola bilməz”.
Bu il açıq sahədə pomidor hava şəraiti ilə əlaqədar bir qədər gec yetişsə də, məhsulun bolluğu və qiymətlər fermerləri qane edir. Yüksək keyfiyyət göstəricilərinə, ən başlıcası dadına görə bu pomidora tələbat da çoxdur. Təsərrüfatda gündəlik olaraq 50-60 işçi işləyir. Yığılan məhsul yerli bazarlarla yanaşı, Bakı şəhərinə, eləcə də ölkənin digər bölgələrinə göndərilir.
Sahibkar Etibar Kərimov: “Pomidorlar yeşiklərə yığılır və Bakıya göndərilir. Gün ərzində 10 tona qədər məhsul göndəririk və bugünkü qiymətlər bizi qane edir. Bakı bazarlarına təxminən 500 ton məhsul göndərməyi planlaşdırırıq”.
Kənd təsərrüfatına dövlət dəstəyinin ildən-ilə artırılması, subsidiyaların verilməsi, lazımi texnika ilə təminat əkin sahələrini genişləndirməyə, rahat əkin-biçin aparmağa imkan yaradıb.
Təsərrüfatın aqronomu Əlikişi Əliyev: “Sağ olsun Prezidentimiz, kənd təsərrüfatının inkişafı, fermerlər üçün şərait yaradıb. İndi kənd təsərrüfatında ciddi problem yoxdur. Nəyə görə? Çünki torpaq kəndliyə verilib, hər cür texnika var. Fermerlərə subsidiyalar verilir. Bunlar hamısı bizə böyük köməkdir. Əlavə 10 hektar sahəmiz var. Gələcəkdə daha 20 hektar sahədə də pomidor əkəcəyik”.
Rayonda pomidor yığımı sentyabr-oktyabr aylarınadək davam edəcək. Ümumilikdə, 15 min ton məhsul istehsalı gözlənilir.