Bakı, 14 oktyabr, AZƏRTAC

Azərbaycan müstəqilliyini yeni bərpa edəndə ölkədə yaranmış hər-mərclik və özbaşınalıq respublikamızın beynəlxalq aləmə inteqrasiyasında ciddi problem yaradırdı. Daxildə baş verən qarşıdurma, gərginlik vəziyyəti daha da ağırlaşdırırdı. Bir tərəfdən də Azərbaycanın müstəqilliyini istəməyən qüvvələrin ölkəmiz haqqında yaydıqları yalan məlumatlar vəziyyəti getdikcə ağırlaşdırırdı. Digər tərəfdən, erməni lobbisinin və xarici havadarlarının köməyi ilə Azərbaycan haqqında yayılan qərəzli informasiyalar müstəqil dövlət kimi beynəlxalq aləmə inteqrasiya olunmamıza ciddi problem yaradırdı. Azərbaycan demək olar ki, tamamilə informasiya blokadasına alınmışdı.

Bu fikirləri AZƏRTAC-a Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə bildirib.

Ç.Qənizadə deyib ki, erməni lobbisinin “böyük Ermənistan” dövləti yaratmaq uğrunda mübarizəsi Azərbaycanın ərazilərinin işğalı ilə nəticələnirdi. Əvəzində isə bizim millətimiz haqqında mənfi rəy formalaşdırılır, qəddar xalq kimi təqdim olunurduq. Baş verən hadisələr barəsində dünyada informasiya boşluğu yaratmağa, öz yalan, riyakar və ikiüzlü siyasətini beynəlxalq ictimaiyyətə sırımağa cəhd göstərən anti-Azərbaycan qüvvələr getdikcə ölkəmizin informasiya blokadasını daha da möhkəmləndirirdilər.

Azərbaycanın informasiya blokadasından çıxmasının əsasını ulu öndər Heydər Əliyev qoyub. 1990-cı ilin 20 Yanvar hadisələrinin bütün dünyaya çatdırılması məhz bunun sayəsində oldu. 1993-cü ildən sonra isə bu istiqamətdə qətiyyətli addımlar atıldı və Azərbaycan həqiqətləri barədə dünya ictimaiyyətinə müfəssəl məlumatlar verildi. Tarixi faktlar da təsdiqləyir k, məhz ulu öndər Heydər Əliyevin dövlət idarəçiliyindəki zəngin təcrübəsi sayəsində Azərbaycan yeni informasiya məkanına daxil oldu. Müstəqil dövlətimizin dünya birliyinə inteqrasiyasında ermənilərin güclü təbliğat maşınının və ondan da güclü lobbisinin məkrli səylərinin darmadağın edilməsində informasiya blokadasından çıxmamız böyük rol oynadı.

Ulu Öndərin siyasi kursuna sadiqliyini əməlləri ilə nümayiş etdirən Prezident İlham Əliyev informasiya cəbhəsində də qətiyyətli addımlar atdı. Məhz bu sadiqlik, ümummilli liderin müəyyənləşdirdiyi siyasətin uğurla davam etdirilməsi ölkəmizi beynəlxalq aləmdə tanıtdı və dünyanın aparıcı kütləvi informasiya vasitələrinin diqqət mərkəzinə çevirdi. Bütün bunlar dövlət başçımızın informasiya blokadasını yararaq yenilənmiş dünya informasiya məkanına daxil olması sayəsində əldə edildi və erməni təbliğatının yalan, şər-böhtan olduğunu nümayiş etdirdi.

Məlumdur ki, erməni təbliğat maşını yalan və iftira üzərində qurulan bir mexanizmdir. Ermənilər zaman-zaman uydurma “erməni soyqırımı” haqqında saxta məlumatlar yayaraq, guya, azərbaycanlıların “zavallı ermənilərə” qarşı “qəddarlığı” barədə dünya ictimaiyyətini inandırmağa cəhd ediblər. Lakin ölkəmizdə düzgün və düşünülmüş şəkildə qurulmuş informasiya təbliğatı tədricən ermənilərin yalanlarını ifşa etmiş, onların azərbaycanlılara qarşı soyqırımı törətmələri barədə həqiqətlər olduğu kimi dünya birliyinə çatdırılmışdır.

Son illər dövlət başçımızın mötəbər tribunalardakı çıxışları, müxtəlif aparıcı kütləvi informasiya vasitələrinə verdiyi müsahibələr ermənilərin ölkəmizi informasiya blokadasına almaq cəhdlərini darmadağın etdi. Möhtərəm Prezidentimiz həm Silahlı Qüvvələrin Ali Baş Komandanı, həm də dövlət başçısı kimi, eyni vaxtda, həm döyüş, həm də informasiya cəbhəsində məharətli sərkərdə kimi ölkəmizin maraqlarını inamla və qətiyyətlə müdafiə edir.

Azərbaycan Prezidenti son vaxtlar “CNN International”, “CNN-Türk”, “Sky News”, “Euronews”, “Əl-Cəzirə”, “Əl-Ərəbiyə” kimi dünyanın əsas televiziya kanallarına, o cümlədən Türkiyənin “TRT Haber”, Rusiyanın aparıcı “Rossiya-1”, “Pervıy Kanal”, RBK televiziya kanallarına müsahibələrində ermənilərin işğalçı siyasəti, mülki əhalini hədəfə alması, münaqişənin dinc vasitələrlə nizamlanmasından boyun qaçırması və qadağan olunmuş silahlardan atəş açması barədə ətraflı məlumat verib. Bununla da Azərbaycana qarşı feyk xəbərləri ifşa edib. Ölkə başçısı artıq Ermənistanın yalan üzərində qurulmuş informasiya maşınına ağır zərbələr vurub. Bu müsahibələrdən sonra artıq erməni yalanlarına inanan yoxdur.

Ölkə Prezidenti istər daxili, istərsə də xarici auditoriya qarşısındakı çıxışları zamanı, habelə nüfuzlu beynəlxalq təşkilatların tədbirlərində, eləcə də videoformatda keçirdiyi tədbirlərdə, ilk növbədə, dövlətimizin maraqlarını müdafiə edir, ermənilərin və onlara havadarlıq edən qərəzli beynəlxalq təşkilatların yalanlarını faktlarla ifşa edir, dünya birliyini münaqişənin nizamlanmasında ədalətli mövqe tutmağa çağırır. Bu müsahibələr bir daha nümayiş etdirdi ki, Azərbaycan xalqı Prezident İlham Əliyevi onun iradəsini ən layiqli şəkildə müdafiə etmək qabiliyyətinə malik lider hesab edir, ona inanır, güvənir və tam dəstəkləyir.