Naftalan 3 may, Rauf Hacıyev, AZƏRTAC

Vətən müharibəsindəki döyüşlərdə yaralanmış və müxtəlif xəsarətlər almış qazilərin sağlıqlarına qovuşması üçün aparılan müalicədə yüksək nəticələrin alındığı tibbi reabilitasiya müəssisələrindən biri də Möcüzəli Naftalan Sağlamlıq Mərkəzidir.

AZƏRTAC xəbər verir ki, fəaliyyəti ən son tibbi avadanlıqlar və yüksəkixtisaslı peşəkar həkimlər sayəsində müasir səviyyədə təşkil edilmiş sağlamlıq mərkəzi Qarabağ müharibəsi iştirakçılarının müalicəsini ən çox həyata keçirən sanatoriyalardandır.

Ümumilikdə, 250 xəstənin müalicə alması üçün bütün şəraitin mövcud olduğu sanatoriyada hazırda həm Birinci Qarabağ, həm də Vətən müharibəsinin iştirakçılarına yüksək səviyyədə tibbi xidmət göstərilir. Əmək və Əhalinin Sosial Müdafiəsi Nazirliyinin göndərişi əsasında sanatoriyaya təyinat alan pasiyentlər əvvəlcə ümumi tibbi yoxlanışdan keçirilir və hər bir xəstəyə zəruri müalicə kursu təyin edilir. Möcüzəli Naftalan Sağlamlıq Mərkəzində əsasən dayaq hərəkət sistemindən, oynaq və dəri xəstəliklərindən əziyyət çəkən xəstələr müalicə olunurlar. Sağlamlıq mərkəzində bu xəstəliklərin müalicəsi üçün masaj, müalicəvi bədən tərbiyəsi, fizioterapiya, iqlaterapiya, ozonaterapiya, hidropolonoterapiya, həmçinin möcüzəvi təsirə malik Naftalan neft vannası kabinetləri yaradılıb. Sanatoriyadakı xəstələrə şəfa verən daha bir müalicə proseduru yod brom vannasıdır. Məhz sanatoriyada fəaliyyət göstərən Naftalan və yod brom vannaları dayaq hərəkət sistemindən, oynaq və dəri xəstəliklərindən əziyyət çəkən yerli və xarici turistlərin, o cümlədən Birinci Qarabağ və Vətən müharibəsi iştirakçıları olmuş qazilərin sağlamlıqlarının bərpasında yüksək təsirə malikdir. Göndəriş əsasında Möcüzəli Naftalan Sağlamlıq Mərkəzinə qəbul edilən Birinci Qarabağ və Vətən müharibəsi iştirakçılarının müalicəsi 14 gün davam edir. Ümumi müayinədən sonra tibbi göstəriş olduqda pasiyentlər müalicə kursu müddətində 10-12 neft vannası və müalicə proseduru qəbul edirlər.

Göndəriş əsasında burada müalicə alan çoxsaylı qazilərdən biri Elbrus Rüstəmovdur. Qazi deyir ki, ilk dəfə 1979-cu ildə SSRİ-Əfqanıstan müharibəsində iştirak edib. Ermənistanın Vətənimizə təcavüzü başlayanda yenidən könüllü ordu sıralarına yazılıb. 1992-1994-cü illərdə Birinci Qarabağ müharibəsində kəşfiyyat komandiri kimi Ağdərə istiqamətində gedən ağır döyüşlərdə iştirak edib. Kəlbəcər yolu istiqamətində, Vəng, Sırxavənd və Drambon kəndi uğrunda gedən döyüşlərdə iki dəfə başından və bədəninin müxtəlif yerlərindən qəlpə yarası alıb.

“Bədənimdə və ayaqlarımda kəskin ağrılarım vardı. Müalicə almağım üçün göndəriş əsasında Möcüzəli Naftalan Sağlamlıq Mərkəzinə qəbul edildim. İlk gündən gülərüz və peşəkar heyətlə qarşılaşdım. Əvvəlcə bütün müayinələrdən keçdim və təyin olunmuş kurs üzrə 12 gün müalicə aldım. İndi özümü ağrılardan azad və gümrah hiss edirəm. Müharibə iştirakçılarına göstərilən diqqət və qayğıya görə Ali Baş Komandan İlham Əliyevə minnətdarlığımı bildirirəm”, - deyə E.Rüstəmov razılığını ifadə edib.

Əmək və Əhalinin Sosial Müdafiəsi Nazirliyinin göndərişi əsasında Möcüzəli Naftalan Sağlamlıq Mərkəzində müalicə alan çoxsaylı qazilərdən daha biri ehtiyatda olan zabit Bəhmən İmanovdur.

Ermənistanın ölkəmizə təcavüzü başlayanda qazi Rusiyada aldığı ali təhsilini yarımçıq qoyaraq Vətənə qayıdıb və 1992-1994-cü illərdə Qarabağ uğrunda döyüşlərdə iştirak edib. Düşmənin dilində sərbəst danışmağı bacaran Bəhmən İmanov Goranboyun Tap Qaraqoyunlu, Tərtərin Qapanlı, Füzulinin Şükürbəyli, Ədürrəhmanlı, Cəbrayılın Cocuq Mərcanlı, Soltanbəyli, Şuşanın Malıbəyli, Daşaltı kəndlərində, həmçinin Xocavənd istiqamətində gedən ağır döyüşlərdə çətin tapşırıqları icra edib. Növbəti döyüş tapşırığını icra edərkən başından ağır qəlpə yarası alıb və sağlamlığının bərpası üçün həm ölkəmizdə, həm də xaricdə müalicə kursu keçib.

“Xoşbəxtəm ki, bir zabit kimi həm Birinci Qarabağ, həm də Vətən müharibəsində iştirak etmişəm. Bu döyüşlərə Vətən müharibəsinin ilk günündən, yəni sentyabrın 27-dən qoşulmuşdum. Əsas vəzifəm bələdçilik və düşmənin koordinatlarını müəyyən etmək idi. İlk dəfə oktyabrın 17-də Füzuli rayonunun Seyidmahmudlu və Alxanlı kəndləri uğrunda gedən döyüşlərdə yaralandım. Həmin gün düşmən döyüşlərdə qadağan olunmuş fosforlu bombalardan istifadə etməyə başladı. Döyüş yoldaşlarım və mən müxtəlif qəlpə yaraları aldıq. On gün müalicə olunduqdan sonra ikinci dəfə cəbhəyə yollandım və Şuşa yaxınlığındakı Daşaltı kəndinə kimi döyüşlərdə iştirak etdim. Hər iki müharibə dövründə bədənimdən və başımdan qəlpə yaraları almışam. Müharibə vaxtı zərbə dalğasına düşdüyüm üçün danışığımda müəyyən qüsurlar yaranıb. Bir neçə gün əvvəl Əmək və Əhalinin Sosial Müdafiəsi Nazirliyindən məktub aldım. Nazirlikdən mənə deyildi ki, müalicə üçün Möcüzəli Naftalan Sağlamlıq Mərkəzinə göndərilirəm. Sanatoriyaya qəbul olunanda yüksək qan təzyiqim və şəkərim, nitqimdə isə kəkələməm vardı. Demək olar ki, danışa bilmirdim. İlk gündən sanatoriyanın gülərüz tibb heyəti ilə qarşılaşdım. Əvvəlcə bütün müayinələrdən keçirildim. Sonra səhhətimə uyğun müalicə kursu müəyyən edildi. Burada olduğum müddətdə mənə, o cümlədən bütün müharibə iştirakçılarına, şəhid ailələrinin üzvlərinə yüksək xidmət göstərilib. Bizə yaradılan şəraitə görə Prezident İlham Əliyevə təşəkkürümü bildirirəm. Fəxr edirəm ki, azərbaycanlıyam”, - deyə o minnətdarlığını ifadə edib.