ELM VƏ TƏHSİL
Qarabağda zərb olunmuş gümüş dirhəm sərgidə
Bakı, 4 iyul, AZƏRTAC
AMEA-nın Milli Azərbaycan Tarixi Muzeyində nadir sikkələrdən biri 1,18 qram çəkili, son Elxani hökmdarı Ənuşirvanın dövrünə aid gümüş dirhəm qorunur.
Bu barədə AZƏRTAC-a muzeydən məlumat verilib.
Gümüş dirhəmin üst tərəfində “yeddi yüz əllinci ildə Qarabağda zərb edilib” sözləri yazılıb. Arxa tərəfində, mərkəzdə “Allahdan başqa ilah yoxdur, Muhəmməd onun elçisidir”, ətrafında isə “Əbubəkr, Ömər, Osman, Əli” sözləri qeyd olunub.
Ənuşirvan dövründə yerli sənətkarların əməyi ilə zərb edilən bu gümüş dirhəmə “Qarabağ” sözü ilə inzibati ərazi adı həkk edilib. Məhz bu sikkə XIV əsrin yarısında Qarabağ ərazisinin zəngin metal yataqları və əlverişli coğrafi mövqeyinin zərbxana fəaliyyəti üçün münasib olduğunu deməyə əsas verir.
Həmin Qarabağ gümüş dirhəminə əsasən Elxani hökmdarı Ənuşirvanın titulu – sultan idi. Bu sikkəyə həm də xoşniyyətli ifadələr - “Hakimiyyəti davamlı olsun!” sözləri həkk edilib.
Müvafiq dövrün siyasi və iqtisadi problemləri ilə əlaqədar belə dirhəmlər aşağı çəki ilə zərb edilib. Dövrün pul təsərrüfatında digər sikkələrlə (Cuçilər, Cəlairilər) birgə aşkarlanan və istifadə edilən bu gümüş dirhəm Azərbaycanın dövlətçilik rəmzləri sırasında başlıca faktlardan biridir. Belə sikkələr həm tək sayda, həm də sikkə dəfinələri şəklində Abşeron, Bərdə, Tovuz, Şamaxı, Beyləqan rayonlarında tapılıb.
Numizmatika fondunda qorunan dirhəm hazırda muzeydə təşkil edilən sərgidə ziyarətçilər üçün nümayiş olunur.