SİYASƏT
Qazaxıstan KİV-ləri Ermənistanın Azərbaycana qarşı işğalçılıq siyasəti barədə məlumatlandırılıb VİDEO
Nur-Sultan, 6 oktyabr, AZƏRTAC
Azərbaycanın Qazaxıstandakı səfirliyində Ermənistan-Azərbaycan Dağlıq Qarabağ münaqişəsi, Ermənistanın işğalçılıq siyasəti, cəbhədə baş verən son hadisələr, ölkəmizin mülki vətəndaşlarının qətlə yetirilməsi, ərazilərimizin Ermənistan tərəfindən raketlərlə vurulmasına dair yerli KİV nümayəndələri üçün brifinq keçirilib.
AZƏRTAC xəbər verir ki, brifinqdə ölkənin 40-dan çox müxtəlif televiziya kanalı və informasiya agentliyinin rəhbər şəxsləri və ya nümayəndələri, politoloq və ekspertlər iştirak ediblər.
Brifinqin əsas məqsədi Qazaxıstanın informasiya məkanında digər dövlətlərin təsiri altında yayılan təhrif olunmuş, dezinformasiya xarakterli məlumatların qarşısını almaq, yerli medianın, ictimai fikrin formalaşmasına istiqamət verə biləcək nüfuzlu şəxslərin, politoloq və mütəxəssislərin diqqətini bu məsələyə yönəltmək, onları mövzu ilə bağlı həssas davranmağa, Azərbaycanın haqlı mübarizəsini dəstəkləməyə dəvət etmək olub.
Azərbaycanın Qazaxıstandakı səfiri Rəşad Məmmədov son günlər Ermənistan-Azərbaycan qoşunlarının təmas xəttində baş verənlər haqqında ətraflı məlumat verib, Ermənistan silahlı qüvvələrinin ölkəmizdəki mülki obyektlərə hücumlar etdiyini, cəbhə xəttindən kilometrlərlə uzaqda yerləşən Gəncə, Mingəçevir, Tərtər, Bərdə, Göygöl, Xızı və Abşeron kimi şəhər və rayonların təcavüzkar ölkənin ərazisindən raket hücumlarına məruz qaldığını bildirib.
Diplomat qeyd edib ki, Azərbaycan Ordusu öz vətəndaşlarını qorumaq üçün Ermənistan silahlı qüvvələrinin təxribatının qarşısını alıb və əks-hücuma keçərək işğal olunmuş torpaqlarını azad etməyə başlayıb.
Səfir Qazaxıstan da daxil olmaqla, Azərbaycan tərəfinin heç bir xarici ölkənin hərbi köməyinə ehtiyacının olmadığını, bütün dövlətlərin, o cümlədən qardaş Qazaxıstanın beynəlxalq hüququn normalarından irəli gələn siyasi və mənəvi dəstəyini gözlədiyini diqqətə çatdırıb.
Diplomatın sözlərinə görə, təəssüf ki, bir çox hallarda yerli mətbuat, agentliklər fərqinə belə varmadan münaqişədə maraqlı olan üçüncü ölkənin informasiya resurslarına, hətta heç bir ölkə tərəfindən tanınmayan separatçı rejimin qondarma qurumlarına istinadla yalan, təhrif olunmuş və dezinformasiya xarakterli xəbərlər yaymaqdadır. Bu da Qazaxıstan dövlətinin rəsmi mövqeyinə uyğun gəlmir və beynəlxalq hüquq normalarının pozulmasıdır. Digər narahatedici məqam isə ondan ibarətdir ki, yerli medianın saxta informasiyalar yayması qardaş qazax xalqının fikirlərinin yanlış istiqamətləndirilməsinə və Azərbaycanla bağlı arzuolunmaz imicin formalaşmasına rəvac verə bilər. Bunların qarşısının alınması məqsədilə səfirlik tərəfindən xüsusi bəyanat hazırlanaraq bütün media qurumlarına göndərilib, eyni zamanda, Qazaxıstanın yerli mediasının baş verənlərlə bağlı dəqiq və dolğun informasiya əldə etməsi üçün ölkəmizin müvafiq dövlət qurumlarının və əsas KİV-lərinin saytları təqdim edilib.
Tədbir zamanı videoproyektor vasitəsilə son günlərdə Ermənistan silahlı qüvvələri tərəfindən işğal altında saxlanılan ərazilərimizdən beynəlxalq humanitar hüququn normaları pozulmaqla Tərtər, Ağdam, Füzuli, Cəbrayıl rayonlarında, həmçinin münaqişə bölgəsindən uzaqda yerləşən Gəncə, Mingəçevir şəhərlərində və Xızı rayonunda yaşayan mülki şəxslərin və obyektlərin atəşə tutulması nəticəsində vətəndaşlarımızın həlak olması, xəsarət alması, habelə yaşayış evlərinin və mülki infrastrukturunun dağıdılması faktlarını özündə əks etdirən video və fotomateriallar tədbir iştirakçılarına nümayiş etdirilib. Bundan başqa, Azərbaycan tarixinin müxtəlif dövrlərini əks etdirən, ermənilərin Qafqaza köçürülməsi faktlarını göstərən xəritələr, Ermənistandan azərbaycanlıların deportasiya ilə bağlı statistik məlumatlar vizual şəkildə təqdim olunub. Tədbir zamanı Ermənistan-Azərbaycan Dağlıq Qarabağ münaqişəsinə aid ayrı-ayrı jurnal, broşürlər və digər sənədlər iştirakçılara paylanılıb.
Brifinqdə səfir yerli jurnalistlərin, politoloqların suallarını cavablandırıb.
İlahə Əhmədova
AZƏRTAC-ın xüsusi müxbiri
Nur-Sultan