Bakı, 19 avqust, AZƏRTAC 

Sosial sahibkarlıq sosial, mədəni və ətraf mühit məsələlərinin həllinə istiqamətlənmiş, sərbəst bazar qaydalarına əsaslanan iqtisadi fəaliyyət növüdür. Hazırda dünyada prioritet trendlərdən birinə çevrilmiş bu fəaliyyət növü icma əsaslı problemlərə yeni həll yolları gətirərək ümumi maraqlara xidmət edir. Sosial sahibkarlar isə maddi fayda və mənfəəti ikinci plana alaraq, əsas hədəf kimi sosial problemlərin həllini seçirlər. Azərbaycanda yeni olmasına baxmayaraq, bu sahədə artıq müəyyən addımlar atılıb.

AZƏRTAC xəbər verir ki, təhsil və sosial sahibkarlıq sahəsində ixtisaslaşan “Education HUB” bu sahəyə ictimaiyyətin diqqətini yönəlmək üçün silsilə müzakirələrə başlayıb. Müzakirələrdə QHT-lərin iqtisadi və sosial hədəfləri arasında tarazlıq, sosial sahibkarlıq vasitəsilə dayanıqlı inkişafa nail olmaq, eləcə də Azərbaycan qanunvericiliyində sosial sahibkarlığın hüquqi bazasının yaradılması məsələləri müzakirə olunub.

Müzakirələrdə sosial sahibkarlığın Azərbaycan qanunvericiliyində hüquqi bazası, sosial sahibkarlığın ölkəmizə gətirdiyi və gətirə biləcəyi faydalar, eləcə də rastlaşılan çətinliklər müzakirə edilib.

Növbəti keçirilən müzakirənin moderatorları hüquqşünas Abil Bayramov və “Education HUB”ın proqram meneceri Gülnarə İsmayılova olub.

Türkiyədən müzakirəyə qonaq qismində dəvət olunan sosial sahibkar, “Bir Yudum Kitab” platformasının təsisçisi Alparslan Dəmir ölkəsində sosial sahibkarların fəaliyyət sahələri, cəmiyyətə gətirdiyi töhfə haqda ətraflı məlumat verib, yeni innovativ ideyaları paylaşıb.

QHT-lərin nümayəndələri, Azərbaycana Birgə Yardım İctimai Birliyinin (UAFA) proqram rəhbəri Sevinc Məmmədova sosial biznesin QHT-lərin maliyyə mənbəyinin davamlılığına gətirib çıxardığını qeyd edib. Belə ki, UAFA-nın sosial biznes layihəsi olan “Enjoy Chocolates” çərçivəsində əldə edilmiş gəlir təşkilatın aztəminatlı ailələrə və xüsusi qayğıya ehtiyacı olan uşaqlara göstərdiyi sosial xidmətlərə yönəldilib.

“Odlar Yurdu” Gənclər İctimai Birliyinin sədri Nigar Ələsgərova Azərbaycan Respublikası Gənclər Təşkilatları Milli Şurasının xətti ilə təşkil olunan sosial sahibkarlıq proqramı haqqında məlumat verərək gənclər arasında məlumatlılığı artırılması və bu sahədə ədəbiyyatın hazırlanmasının vacibliyini vurğulayıb.

Şərq Tərəfdaşlıq Vətəndaş Cəmiyyəti proqramının təqaüdçüsü Arzu İsmayılova sosial sahibkarlıqda innovativ təşəbbüslərə daha da əhəmiyyət verilməsini və bu sahə üçün xüsusi fondların ayrılmasına ehtiyac olduğunu deyib.

“Ümid” Sosial İnkişafa Dəstək İctimai Birliyinin sədri, dosent İsrail İsgəndərov sosial sahibkarlıqla bağlı tədqiqatların aparılmasına ehtiyac olduğunu, Əlil Qadınlar Cəmiyyətinin sədri Məhluqə Rəhimova isə sosial sahibkarlığın əhalinin aztəminatlı təbəqəsinin özünü məşğulluq xidmətinə cəlb olunması üçün yeni imkanlar yaradılacağını qeyd edib.

Müzakirə iştirakçıları sosial sahibkarlığın qanunvericiliklə hüquqi statusunun tənzimlənməsi, vergi güzəştlərinin hazırlanması və sair məsələlərlə bağlı fikir mübadiləsi aparıblar.

“Education HUB” tərəfindən Sosial Sahibkarlar Assosiyasının yaradılması təşəbbüsü irəli sürülüb və iştirakçılar tərəfindən rəğbətlə qarşılanıb.